خطأ يقع فيه أكثر الناس! تحاليل طبية غير مفيدة!

سبع تحاليل ما تعملهاش الا في حالات قليله جدا لما دكتور متخصص يطلبهم منك لانها بتضر اكث ما بتنفع. على مدار سنين طويله جدا كثير جدا بتتبعت لي تحاليل نتائجها مش طبيعيه واصحابها قلقانين وعايزين يعرفوا يعملوا فيها ايه والمفروض ما يعملوش حاجه. هو في الحقيقه كان المفروض ما يعملوهاش اصلا.

كلامي النهارده غالبا هيكون مفاجاه وصادم لناس كتير وعكس فيديوهات كتير قوي منتشره مع ان دي التوصيات الطبيه الدوليه اللي مبنيه على دراسات كتير قوي وهقنعك بيها بالعقل وبالمنطق وبالعلم زي ما احنا متعودين. ايه هي التحاليل دي وليه ما تعملهمش ولو عملتهم خلاص تفهمهم ازاي وتعمل فيهم ايه وايه الحالات القليله اللي بيفيدوا فيها هقول لك دلوقتي. ركز معايا دلوقتي 10 دقاق ممكن يوفروا عليك قلق وتعب وادويه وعمليات سنين كتير قوي. فيديو مهم. ابعته لحد تعرفه بيحب يطمن على صحته بالتحاليل كل شويه ممكن يستفيد منه ويدعيلك. من بريطانيا دكتور محمد منصور استشاري البطنه والكلى. قناة الدكتور.

أول واحد تحليل سرعه الترسيب الـ ESR. هو التحليل اللي كل الناس رايحه جايه عماله تعمله نهار وليل بسبب وبدون سبب. التحليل ده انا ما اقدرش اطلبه من المعمل هنا في الجامعه بتاعتي مع اني استشاري غير لما اتصل بالمعمل بالتليفون الاول واعرف اقنعهم يعملوا لي المريض بتاعي تخيل. ولازم يكون عندي سبب معين ما يتشخصش غير بالتحليل ده. بتسالني ليه؟ خليني انا اسالك. هو انت بتعمله ليه؟ عشان بتطمن على نفسك وعايز تعرف اذا كنت مريض ولا عندك التهاب مستخبي ولا كانسر مثلا لا قدر الله. ما هي دي المشكله. سرعه الترسيب ممكن تطلع عاليه لاسباب ما لهاش اي علاقه بالمشاكل اللي انت بتدور عليها دي. اسباب زي السن وزياده الوزن والحمل وفقر الدم وبعض الادويه اللي بناخدها وحتى ركنه العينه في المعمل شويه. كل ده ممكن يطلع نتيجه التحليل عليها او زي ما بنسميها ايجابيه كاذبه. لكن مش ده المهم فعلا هو ان تحليل سرعه الترسيب مش بيقول لك على حاله جسمك دلوقتي ده بيقول لك على حاله جسمك الفتره اللي فاتت. لانه تحليل بطيء وبيقيس حاجات اتكونت في جسمك على مدار الفتره اللي فاتت. فممكن يطلع عالي لان كان عندك دور برد من كام يوم لكن دلوقتي ما فيش حاجه. فانت تقلق ويبقى مطلوب منك تروح تعيد التحليل بعد كام يوم عشان بس تعرف ان ما كانش ليه لازمه تعمله من الاول. والعكس اللي هو اخطر بقى ان ممكن يطلع التحليل طبيعي او سلبي مع ان جسمك فيه مشكله دلوقتي. لكن التحليل بطيء زي ما قلت فلسه مش مبين حاجه. الحل ايه؟ لما تحب تطمن في بدايل كتير احسن منه زي الـ CRP او الـ C-reactive protein مثلا بروتين سي التفاعلي اللي شرحت الفرق بينه وبين الـ ESR في فيديو قبل كده هسيب لك الرابط بتاعه في وصف الفيديو.

ثاني حاجه هي هرمونات الغده الدرقيه. لو ما فيش اعراض واضحه او ما فيش طبيب طلبها برده بتسال ليه؟ في في الطب اسمها سكريننج او فحص عام بنعمله لكل الناس عشان نكتشف الامراض بدري ونعالجها وهي لسه في بدايتها. والطبيعي اننا نعمل سكريننج عشان في فايده ثبتت لما يكون تشخيص المرض ده بدري بيساعدنا فعلا نتجنب مضاعفاته. زي لما نقيس الضغط فنلاقيه عالي من غير لسه اعراض فنبدا نظبطه فنحمي القلب والكلى والمخ. او زي لما نقيس تحاليل وظائف الكلى ولسه الانسان سليم ما عندوش اعراض فنكتشف انها قليله شويه وفي قصور مزمن فنبدا نخلي بالنا ونحافظ على الكلى ونظبط كل حاجه عشان نمنع التدهور الزياده. لكن مع الغده الدرقيه ما فيش فايده ثبتت لاننا نعمل سكريننج لكل الناس. التشخيص البدري لاضطرابات الغده الدرقيه البسيطه ما فيش فايده ثبتت لعلاجه عند اكث الناس. ده غير ان بعض الناس بتحلل فتتشخص بخمول بسيط في الغده وتبدا علاج الهرمون يقوم يسبب لهم مضاعفات ما كانش ليها لازمه زي ارتعاش الاذين او غيره. وبعض الناس بيعملوا التحليل بدون سبب فنلاقي الهرمون مش متظبط قوي فنقوم نقلع على الغده فنفحص رقبتهم او نعمل موجات صوتيه على الرقبه فنلاقي نوديولز او كتل او كلاكيع اللي هي طبيعيه عند ناس كتير. وحتى لما بتكون علامه على ورم فبيكون ورم نموه بطيء جدا عند يمكن 80% من الناس اللي هو بنسميه بابيلري كارسينوما. لكن بما اننا لقينا كتل او نوديولز فلازم نقلق ونبدا بقى نعمل خزعات وعمليات نشيل الغده ونستاصلها ونقوم نشيل الغدد الجاردرقيه بدون قصد زي ما بيحصل كتير وندخل في تشنجات ونقص كالسيوم شديد ورعايه مركزه وغيره. كل ده ما كانش له لازمه اصلا لو ما عملناش تحليل بدون داعي. وبالمره بقى ما دام اتكلمنا عن اخطاء تحاليل هرمون الغده الدرقيه فخلينا نتكلم عن خطا ثاني مهم ومنتشر هو كمان. القاعده ما تعملش تحاليل الغده الدرقيه لما تكون عيان او مريض بمرض حاد مؤقت خصوصا لو شديد زي دور برد جامد او اي عدوى شديده عموما. لان التحاليل ممكن تطلع مش مظبوطه مع ان الغده سليمه. هي الغده بس تعبانه شويه ومش بتفرز هرموناتها بشكل طبيعي مؤقتا بسبب تعب جسمك ودي حاله بنسميها سيك ايوثيرويد سندروم. مش صح انك تحلل وتبدا تاخد لها علاج لانها كانت هتتضبط لوحدها لما التعب اللي عندك يخف. وبالمره خطا ثاني شهير كمان. لما تعمل تحليل الغده الدرقيه ما تعملش تحليل الـ T3 والـ T4 الكليه او العاديه دي كانت الطريقه القديمه ومش دقيقه ابدا التشخيص بيها غالبا مش صح. ممكن يظهر ان عندك كسل او نشاط زايد في الغده ده مع ان الرقم الكلي ده اصلا مش مفيد. اللي احنا بنحتاجه عشان نشخص بيه هو كميه الهرمون الحر الهرمون النشط اللي شغال مش الهرمون الكلي اللي مرتبط ببروتين ومش بيعمل اي وظيفه. عشان كده في العالم كله تقريبا تحليل الغده الدرقيه معناه TSH وفري T4. الـ T3 نادرا ما بينطلب. فالخلاصه ان تحاليل الغده الدرقيه نعملها بس لما يكون في اعراض زياده او اعراض نقص لهرمون الغده الدرقيه ودول شرحتهم بالتفصيل في فيديو منفصل لوحده.

ثالث واحد هو تحليل لهرمون الذكوره او التستوستيرون عشان تطمن او عشان عندك اعراض تعب واعراض ارهاق عامه. وده الكارثه اللي بقى الترند دلوقتي. تقول لي ليه؟ هقول لك ان في اغلب الاحوال الرجاله بيعملوا التحليل ده بسبب اعراض عامه مش محدده. تعب ارهاق قلة طاقة خمول او حتى اعراض اكتئاب او شبيهه بالاكتئاب. مع ان في الغالبيه العظمى من الحالات دي بيكون سبب الاعراض هو حاجه ثانيه خالص. لكن اللي بيحصل ان الواحد عنده شويه اعراض من دي فيقوم يروح يحلل هرمون تستوستيرون يقوم يلاقي النتيجه قليله سنه فيقوم يفكر ان هي دي سبب المشكله فيبدا ياخد الهرمون ويعيش عليه طول العمر ويعيش فاكر ان هو مريض بنقص هرمون الذكوره مع ان الموضوع مالوش علاقه بيه نهائي. هتقول لي طب ليه مالوش علاقه ما انا حللت اهو وطالع ناقص فعلا؟ هقول لك لا ما هو احد مشاكل التحليل ده انه في اغلب الاحيان بيكون مش دقيق ومش سهل اصلا يتفسر وفي حاجات كثير جدا بتاثر عليه وبيعتمد انت عملته في اي وقت من اليوم عملته وانت سليم ولا وانت عيان حتى بدور برد ولا حتى بتخف من اي مرض شديد ولا عندك مشاكل ولا ضغوط نفسيه الفتره دي عملته في الدم ولا في اللعاب عملته حر ولا مرتبط بالبروتين. البروتين اللي بيرتبط بيه ده بتاثر بحاجات كثير جدا في جسمك كلها ما لهاش علاقه بهرمون الذكوره اصلا. وعشان كده لما بنحتاج نعمل التحليل بشكل صح غالبا بنحتاج نعمل التستوستيرون الكلي والبروتين المرتبط بيه وبنعمله الساعة 8:00 الصبح وبنعيده كذا مره مع شويه احتياطات ثانيه علشان بس نقدر نفسر التحليل بشكل مفيد. وده ثاني لما يكون في اعراض مظبوطه وحتى لما نلاقي النتيجه قليله شويه يعني مش نورمال ده مش لازم يكون معانا نقص. لان ممكن يبقى معدل الهرمون اقل من الطبيعي بتاع المعمل لكن طبيعي بالنسبه لجسمك لان مستقبلات الهرمون في جسمك حساسه زياده شويه. وعشان كده ثاني بنقول ان الاعراض المظبوطه وراي الطبيب المتخصص قبل التحليل اللي بنسميها البري تست بروبابيليتيز اهم من التحليل نفسه. لو اتعمل بدون سياق. المهم انت بمجرد انك حللت وده اللي بيحصل كتير ولقيته ناقص شويه بتعيش في وهم ونكد المرض وتحس ان انت ناقص رجوله خلي بالك ده تستوستيرون مع ان ده مش حقيقي وتفضل بقى تعمل تحاليل ثانيه واشعات وتدخل في اكتئاب وهم ودوامه زيارات لدكاتره كتير لغايه ما يعرفوا يقنعوك بس ان انت شخص طبيعي وان الرقم اللي طلع لك في المعمل ده مالوش معنى. الأهم بقى واللي انتشر الفتره الأخيرة والترند زي ما بقول لكم ان اغلب الشباب اللي بيروح جيم وبدي بيلدينج وبيتابع فيديوهات بعض الكوتشز اللي بيبيعوا أي مكملات بيبدا يطلع لهم عشرات الفيديوهات تنصحهم يبدأوا مكملات هرمون التستوستيرون او التستوستيرون ريبليسمنت ثرابي تي آر تي. مع انها لا ريبليسمنت ولا ثرابي دي كارثه. لكن للأسف مش ممنوعه ومش مقننة في دول كتير. وبمجرد ما تبدأها فانت صحيح غالبا هتبدأ تحس عضلاتك بتكبر وتلاقي عندك طاقة ونشاط أكتر من الأول. لكن قابل بقى مصايب من أول ضعف جنسي وضمور في الخصية وعقم لغاية الاعتماد الكلي على الهرمون وجسمك يبدأ يقلل تصنيعه وتبقى مدمن وما ينفعش توقفه طول حياتك. ده غير جلطات القلب والمخ اللي بقينا بنشوفها بشكل غريب في الشباب الصغير اللي بيلعب رياضة وهيلثي وصحي وشكل جسمه حلو بسبب الهرمون اللي بياخده. وعشان كل ده فهتلاقي ان أقوى التوصيات العلمية سواء من جمعيات الغدد أو جمعيات المسالك العالمية بتقول ان تحليل هرمون التستوستيرون ما يتعملش غير لو في شك حقيقي ان المريض عنده نقص فيه. وكمان دايما بياكدوا ان لازم نكرر التحليل الصبح بدري ونقيس التستسترون الكلي قبل ما نشخص أي نقص. ده أنا نسيت أقول لك كمان ان الناس اللي بتاخد هرمون التستوستيرون ده بدون نقص طبي حقيقي نقص حقيقي في مستوى الهرمون ممكن يبقوا معرضين أن يجيلهم سرطان البروستاتا.

وده ينقلنا لتحليل كمان المفروض ما تعملهوش غير لو الطبيب بتاعك طلبه منك لسبب طبي محدد. تحليل البروستاتا أو الـ PSA. لو عامله لمجرد الاطمئنان أو حتى للتشخيص المبكر بدون ما طبيب متخصص ياخد تاريخك المرضي ويفحص البروستاتا ويتفق معاك أنك تعمله. أنا عارف أن الكلام ده هيزعل الناس كتير مع أن هو ده العلم المبني على الدليل وده اللي بتقول بيه التوصيات الطبية في أغلب دول العالم. ليه؟ خليني أقول لك هو إيه الـ PSA ده أصلاً؟ الـ PSA ده بروتين بتفرزه البروستاتا اللي هي غدة موجودة عند الرجالة بتفرزه عشان يدوب ويطري السائل اللي بتعوم فيه الحيوانات المنوية عشان تتحرك براحتها. وطبيعي أن نسبة صغيرة من البروتين ده يكون موجود في الدم عند الرجالة طول الوقت. طب إيه المشكلة؟ ما أعملش التحليل ليه بقى مع نفسي عشان أطمن؟ لأن التحليل ده في أوقات كتير جدا بيطلع عالي بدون ما يكون علامة على أي شيء مرضي. حاجات كتير جدا ممكن تعليه. السن تضخم البروستاتا الحميد التهابات البول التهابات البروستاتا أي عدوى في الجسم أو بعد علاقة أو بعد تركيب قسطرة بول أو فحص بروستاتا أو أو. ده حتى ركوب العجل وركوب الخيل بيرفعوه عشان البروستاتا بتتخبط في ركوب الخيل تفضل تتخبط أو بتتزنق أثناء القاعدة على كرسي العجلة. فالبروتين بيخرج من البروستاتا اللي اتفصت بنسبة زيادة ويعلى في الدم. ده حتى معنى التحليل أو الرقم نفسه لا يعني شيء بدون سياق. يعني أنا كطبيب أقلق أكتر من تحليل نتيجته طبيعية في النورمال أو عالية سنة صغيرة في واحد أنا عارف أن حجم البروستاتا بتاعته صغيرة أكتر ما أقلق من تحليل نتيجته عالية شوية في واحد أنا عارف أن حجم البروستاتا عنده كبير أو فيها تضخم حميد مش قلقان منه. فالسياق ممكن يبقى أهم من الرقم. واللي بيحصل أن حضرتك أول ما تلاقيه عالي فانت دخلت برضه في دوامة من القلق وزيارات الدكاترة وناخد عينة من البروستاتا غالبا ما كانش لها لازمة أصلا. وطبعا العينة دي ممكن يبقى لها مضاعفات ونزيف وغيره. كل ده وتطلع في الآخر العينة سليمة وتضخم بروستاتا حميد وما فيش كانسر ولا حاجة. هتقول لي طب حلو أهو استحمل البهدلة دي والعينة والتحاليل والقلق والدكاترة في مقابل أن على الأقل عملت التحليل وعملت العينة وطالع ورم حميد ف أنا اطمنت أهو ما طلعش كانسر ولا حاجة. استحمل وحتى لو طالع كانسر ما هو يبقى برضه برضه شخصت الكانسر بدري فيبقى في فرصة أحسن للعلاج. ما هو هنا بقى هقول لك الصدمة الكبيرة أن الكلام ده مش حقيقي للأسف مع سرطان البروستاتا. عارف إيه اللي بيحصل في أغلب حالات سرطان البروستاتا اللي بنشخصها كأطباء كل يوم في الناس الكبار في السن بنقول للمريض ما تقلقش أنت عندك سرطان لكن نموه غالبا هيكون بطيء جدا ومش مطلوب أن احنا نعمل أي حاجة عيش حياتك وانسى السرطان ده خالص وغالبا هتموت يوم ما تموت بمرض تاني مالوش علاقة بسرطان البروستاتا اللي عندك. يعني لو هو سرطان محتاج علاج عند أكث الناس ولا هياثر على حياتهم عند أكث الناس فيبقى حتى لو التحليل ده شخص لنا حاجة وعملنا أشعات ورنين وتحاليل وخدنا عينات وطلعت كانسر فمش بنستفيد حاجة في الغالبية العظمى من الحالات. لكن المريض طبعاً بيعيش قلقان كل ما يجيله يا عيني وجع في ضهره ولا شوية صداع يقوم يفكر السرطان انتشر في جسمه ويروح يجري على مستشفى ويعمل أشعات جديدة وتحاليل تانية وهو وعيلته يا عيني يعيشوا في هم أو وهم المرض الخبيث. هو مرض خبيث بس مختلف تماماً وأحيانا مهما طمناهم وحاولنا نقنعهم مش بيطمنوا نتيجة السمعة المعروفة للسرطانات عموما. ودي حالياً مشكلة بدأت تنتشر بنسميها الأوفر داياجنوزيس أننا بنحس أننا بنعمل خير في المجتمع وبنشخص سرطانات كتيرة وبنشخصها بدري بينما في الحقيقة التشخيص ده مش مفيد في حاجة في أغلب الحالات. وعشان كده هتلاقي أن الهيئات الطبية الكبيرة اللي بتدي الإرشادات للأطباء في أوروبا زي الاتحاد الأوروبي لجراحي المسالك مش بينصح أن حد يعمل التحليل ده بدون سبب طبي أو للـ screening اللي هو التشخيص المبكر زي ما قلنا ليه؟ بسبب الأضرار اللي ممكن تحصل بسبب نتيجة عالية تدخلنا في دوامات. بينما في أمريكا الوضع مختلف شوية واتحاد جراحي المسالك الأمريكي بينصح أنك لو عملت التحليل للاطمئنان فلقيته عالي تستنى شوية وتعيده قبل ما تاخد أي إجراء. لكن لازال في ناس كتير بتروح المعمل تقول له أنا عايز أطمن أعمل لي تحليل سرطان البروستاتا كده.

كام؟ أربعة. فاضل ثلاثة منتشرين جدا منهم اثنين هيزعلوا ناس كتير وواحد هيزعل الأمهات جدا جدا جدا. بس قبل ما أقول لك عليهم خليني أقول لك أن لو أنت عايش في مصر وعايز تعمل أي تحليل فأنصحك تنزل تطبيق بوكينج لاب وتحجز تحاليلك من عليه. التطبيق مجاني وما فيهوش أي رسوم مخفية. هتلاقي التطبيق مجمع لك أسعار مئات المعامل ومراكز الأشعة في مكان واحد وتقدر تقارن بينهم وتشوف الأقرب لك وكل ده بخصومات ممكن توصل لـ 70%. تقدر كمان ترفع روشيتا وفريق بوكينج لاب هيراجع لك التحاليل أو الأشعة المطلوبة ويختار لك الأنسب من ناحية السعر والجودة. ولو مش فاضي تروح المعمل تقدر تحجز سحب العينات في البيت بسهولة. طبعاً كل الأماكن اللي بيشتغل معاها التطبيق مرخصة ومتابعة من وزارة الصحة وده شيء مهم جدا لأي حد بيهتم بسلامة التحاليل اللي بيستلمها. الميزة الجميلة أنك تقدر تحجز في أي وقت 24 ساعة في الأسبوع وتقدر تشوف العروض بتاعتهم وتعرف إزاي تستعد لأي تحليل قبل ما تعمله بخطوات بسيطة.

ونروح للتحليل الخامس. لما تشك أن عندك التهابات في البول وبتتكرر عليك فتروح تعمل تحليل بول بدون مزرعة. وممكن نزود مع دي كمان الناس اللي بتعمل تحليل بول عادي بدون سبب ولا أعراض وبعدها تروح تاخد له علاج. ده إحنا بنلاقي واحدة تروح معمل تعمل تحليل بول عادي بدون أي سبب فتلاقي شوية كرات دم بيضا أو صديد في البول تقوم تضرب مضاد حيوي مالوش أي فايدة. فتبقى أخذت أضرار المضادات الحيوية. حساسية ممكن تكون شديدة وتموت فشل كلوي حاد إسهال مقاومة مضادات حيوية وغيره. كل ده وهي أصلاً ممكن ما عندهاش التهاب في الجهاز البولي ده كان شوية كرات دم بيضا بسبب التهاب في المهبل ولا نوع من الحساسية في الكلى ولا بسبب قسطرة ولا حتى حمل. ده غير أن أحيانا تحليل البول العادي اللي اتعمل بدون سبب ولا أعراض ده تلاقي طالع فيه شوية خلايا طلائية طبيعية أو شوية أملاح بسيطة لا تدل على أي شيء وتلاقي أنك بعد التحليل ده لبست بقى كمية فوارات وأعشاب وعلاجات مالهاش أي فايدة مثبتة ولا ليها أي داعي أصلاً. اشرب شوية ميه طيب. الصح نعمل إيه؟ تعمل تحليل البول لما يكون عندك أعراض التهابات في البول ووقتها لو الالتهاب ده بيتكرر عليك أو كنت أخذت له علاج قبل كده وماتحسنش بشكل كامل يبقى تعمل معاه مزرعة بول وحساسية مضادات حيوية عشان نعرف نوع الميكروب اللي سبب الالتهاب ونعرف المضاد الحيوي الأنسب له. ما نبقاش بنضرب مضادات عمال على بطال. طبعاً في أسباب تانية لتحليل البول بتتعمل شرحتها في فيديو قبل كده بالتفصيل في سلسلة طبيب الكلى. لكن بتكلم المرة دي على تحليل البول بدون مزرعة للناس اللي عندها التهابات متكررة.

وننقل على التحليل السادس. تحليل معامل الروماتويد الـ Rheumatoid Factor. لما مفصلك تكون بتوجعك. أهو ده المصيبة الكبيرة بقى. كل واحد عنده شوية أوجاع في مفاصله تلاقيه عامل تحليل روماتويد فاكتور أو عمل الروماتويد وجاي يقول الحق طلعت إيجابي للروماتويد أخذ علاج إيه يا دكتور؟ طب وأنت مين قال لك تعمله أصلاً؟ ما فيش دكتور في الدنيا هيقول لك اعمل معامل روماتويد غير في حالات معينة لما يكون شاكك في مرض الروماتويد أو بعض الأمراض المناعية الثانية اللي لها علامات تانية كتير بنشوفها الأول بالفحص وبالتاريخ المرضي الطويل قبل ما نعمل أي تحليل. وساعتها لما بنشك بنعمل تحاليل مختلفة بيكون واحد منها هو روماتويد فاكتور. لكن هو لوحده كده مع أي أوجاع في المفاصل ولا له أي معنى ولا له أي لازمة. عارف ليه؟ بدون تطويل عليك التحليل ده بيطلع إيجابي مع أنواع عدوى كتير مختلفة. بيطلع إيجابي مع كتير من الأمراض المناعية المختلفة. بيطلع إيجابي مع بعض السرطانات. ده حتى بيطلع إيجابي عند ناس كتير أصلاً ما عندهمش مرض. ده غير أن أغلب وأكثر أوجاع المفاصل مش روماتويد زي مثلا خشونة المفاصل دي منتشرة أكتر بـ 100 مرة من الروماتويد. لكن لما تكون خشونة مفاصل وتلاقي المريض جايب لك تحليل روماتويد فاكتور إيجابي مش بيبقى سهل أبداً أنك تقنعه أن اللي عنده ده مجرد خشونة في المفاصل. أمال تحليل الروماتويد الإيجابي ده نعمل بيه إيه؟

وننقل للتحليل رقم سبعة اللي هيزعل الأمهات مننا. تحاليل حساسية الطعام بدون فحص وطلب من طبيب متخصص. ده الترند اللي كثير من الأمهات الجداد طالعين فيه وبيعملوه عشان بيحبوا أطفالهم وخايفين عليهم. الكلام ده غلط وخطير خصوصاً في الأطفال. عشان نقول أن في حساسية طعام لازم يكون في أعراض فرط حساسية حقيقية وتكون مرتبطة بأكل أكل معين. وساعتها لما الدكتور يشك أن في حساسية لنوع معين من أنواع الطعام بيكون أحد أهم أدوات التشخيص الصح هي الأورال فود تشالنج أو أنك تجرب الأكل ده تحت إشراف طبي مش أننا نروح نعمل فود بانل وفود برنت وسكين بريك لمجرد أن الطفل بيجي له إسهال أو وجع في البطن. التحاليل دي نتائجها الإيجابية الكاذبة الفولس بوزيتيفز كتير جدا والتحاليل دي لوحدها مالهاش معنى. دي بقت موضة وفلوس بتندفع على الفاضي. لكن الخسارة الأكبر والأهم مش الفلوس. الخسارة الحقيقية أن الأطفال بيتحرموا من أكلات كتير مهمة ومفيدة وضرورية لنمو جسمهم وعقلهم بشكل سليم بدون سبب ولا فايدة لمجرد أن التحليل طلع إيجابي لبعض مكونات الأكل اللي الطفل ما عندوش حساسية حقيقية لها. وبنشوف أطفال وكبار أحيانا عايشين مقتنعين أن عندهم حساسية من القمح ومن اللبن ومن حاجات كتير مع أن ما عندهمش. لما بندخل لهم الأكل تاني بالتدريج ما بيحصل لهمش حاجة. منهم بعد ما عاشوا سنين محرومين من أكل كتير. العلم علم واللي عايز يزعل يزعل. ولو مش مصدقني في أي تحليل من اللي قلتهم كلهم بما فيهم ده روح لطبيب متخصص في التخصص ده تحديداً واسأله وهياكد لك كلامي بأحدث كلام علم مبني على أقوى الأدلة. وشوف الجمعيات العلمية في الدول المتقدمة كلها تقريباً مش بتوصي أن حد يعمل التحاليل دي إلا في حالات معينة وقليلة جدا. دول كانوا سبع تحاليل منتشرين جدا جدا مع أن أضرارهم لغالبية الناس أكتر من فوائتهم. خلي بالك أنا ما قلتش أن دي تحاليل مضرة ولا غلط أنها تتعمل بالعكس بعضهم مهم ومفيد جدا لما ينطلب في الحالات الصح بتاعته. لكن اللي بنشوفه أغلب الوقت هو أن الناس بتعملهم عشان تطمن وبعدين لا تطمن ولا حاجة بالعكس يعيشوا سنين متورطين بيلفوا بنتائج التحاليل دي وبيعملوا أشعات وعينات وخزعات ويمكن عمليات مالهاش لازمة بسبب التحاليل اللي عملوها من غير ما تنطلب منهم. ولو عايزني أعمل فيديو زي ده للاشعات والرنين اللي المفروض تتجنبهم لأن ضررهم أكبر من نفعهم اكتب لي في التعليقات. ولو عايز تعرف إيه التحاليل المفروض تعملها لو عايز تطمن فعلاً على نفسك وتعملها إمتى وإزاي إزاي اتفرج على الفيديو ده. نشوفكم الفيديو الجاي سلام.