ليس كما تعتقد ، اليك اكبر اكاذيب تم وضعها في رأسك عن المرأة

ونتكلم عن الستات. سجل يا ابني، ونقول بسم الله الرحمن الرحيم. تمام كده؟ الصوت واصل هناك؟ نبدأ يعني؟ توكلنا على الله. بص يا ابني لو أنت أصغر مني، يعني بص يا أخويا لو أنت من سني، وبص يا حاج لو أنت أكبر مني. في حاجات كتير غلط أنتم فاهمينها عن الستات، مع احترامي لكم كلكم، العبد لله هو اللي هيصلحها لكم.

بص يا باشا، أنتم قالوا لكم الستات بتيجي بالفلوس. اعمل أنت بس فلوس وهتلاقي الستات بقت تجري ورا الجري. طب أحلف لك أن أنت ممكن تبقى ملياردير وما فيش ولا واحدة في حياتك؟ أقول لك إزاي؟ أنت دلوقتي راجل مثلاً عندك سلسلة مطاعم، بتمتلك أكبر سلسلة مطاعم في البلد. بتخرج الصبح من فيلتك، تركب عربيتك، بتروح تبص وتتابع شغلك، وترجع بيتك تاني. بالطريقة دي هتجيلك الستات منين؟ آه، ملياردير وكل حاجة، بس الحريم مش موجودة في حياتك.

واحد تاني يقول لك: لو أنت واد أمور وسيم، الستات هتموت عليك وكل يوم هتبقى مع واحدة. طب أقول لك حاجة؟ في شباب قمة في الوسامة والحلاوة، ومع ذلك سناجل وما فيش ولا واحدة في حياتهم.

واحد تاني يقول لك: العضلات. أنت لو واد جسم وفورمة وعضلات، الحريم هتترمى تحت رجليك. مش شرط، أنت ممكن تبقى روني كولمان ولا ليك علاقة بالحريم خالص. مش حكاية أنت مؤدب ومحترم، وأنت اللي باعد نفسك حتى لو أنت عاوز. ما فيش.

هتقولي: الله، إيه يا عم؟ هو لا الفلوس نافعة ولا الحلاوة نافعة ولا الجسم نافع؟ أنت شكلك بتقول كلام وخلاص!

طيب، سيدنا يوسف عليه السلام، مش ده يعتبر أجمل راجل اتخلق وكان قمة في الوسامة؟ عمرك سمعت أن في واحدة غير زليخاء، امرأة العزيز، حاولت مع سيدنا يوسف أو جريت وراه؟ برغم حلاوة سيدنا يوسف دي كلها، ومع ذلك ست واحدة بس هي اللي جريت وراه. وأقول لك حاجة كمان: لولا أن سيدنا يوسف كان مقيم على طول في بيت العزيز وزوجته، ما كانتش عملت معاه كده. يعني لو زليخاء كانت شافت سيدنا يوسف مرة واحدة كده وخلاص، كانت آه ممكن تعجب بيه فترة، بس هتنساه بعد كده. أما اللي خلاها تحب تعمل معاه علاقة هو التواجد.

هو ده بقى اللي أنا عاوزك تفهمه: هل الستات متواجدة في حياتك ولا لأ؟ أنت غني جداً بس المرأة مش متواجدة في حياتك. أنت وسيم جداً بس المرأة مش متواجدة في حياتك. أنت عضلات جداً بس المرأة مش متواجدة في حياتك. يبقى مش هيبقى في ولا واحدة في حياتك.

معظم علاقات الحب والجنس بتحصل بسبب تواجد الطرفين مع بعض باستمرار. زمايل في الشغل وقاعدين في مكتب واحد على طول. واد وبنت شغالين في صيدلية وما فيش حد معاهم. بياع إكسسوارات حريمي، بياع ملابس حريمي. جيران وفي وش بعض وبيشوفوا بعض كتير من البلكونة. قعدة النادي باستمرار. العلاقات بتيجي من كده. قرب الراجل من الست وقرب الست من الراجل هو اللي بينشئ العلاقات ما بينهم.

إنما وسيم ولا غني ولا واد عضلات، وما فيش حاجة تجمعك بالستات لا في الشغل ولا في الشارع ولا في السكن، يبقى ما تنتظرش وجود المرأة في حياتك. مش زي ما هم فهموك: اهتم بنفسك والستات هتجيلك. هيجوا لك بأي صفة يعني؟ وأنتم ما فيش حاجة مشتركة تجمعكم ببعض؟ علشان ما تفتكرش أن أنت لو بقيت حاجة كبيرة الستات هتجي. لا يا حبيبي، مش شرط. الفكرة في تواجدكم مع بعض. الغنى والوسامة والعضلات عوامل مساعدة، الأساس هو التواجد والتقارب.

معلومة كمان الشباب فاهمينها غلط. الشباب فاهمة أن تقلك على البنت اللي معاك، وأنك ما تبقاش متاح باستمرار ليها، ده كده بيعلقها بيك أكتر. فعلاً صح: "ابعد حبة تزيد محبة". إنما أما أنك تبقى موجود على طول، على طول واتس بعد شوية، تليفون بعد شوية، ماسنجر آخر اليوم نتقابل، التواجد المستمر ده هيخليها تعوفك وتبتدي تمل منك. الصح أنك تبقى موجود مرة وتختفي مرة.

في شباب بتعمل كده بس بالكذب. يعمل نفسه مشغول ويعمل نفسه مش فاضي من باب التقل يعني، والحقيقة أن هو دلوقتي نايم على السرير ممدد وماسك تليفون عمال يقلب فيه. النوع ده بيتفقس. بيقول لها: مشغول ومش فاضي وعامل حسابه أنه يكلمها بكرة. بس كام فاضي ما بيعملش حاجة، ما بيستحملش يصبر لبكرة، يزهق يروح مكلمها بعد ساعة. إيه ده؟ أنت مش قلت أنك مشغول وهتكلمني بكرة؟

الصح أنك تبقى مشغول فعلاً. شغلك هيلهيك عنها شوية ومش هتبقى متواجد باستمرار علشان ما تملش هي منك. ده غير أن شغلك مش هيخليك تتعلق بيها قوي وتبقى لعبة في إيديها. لأن أنت طول ما أنت فاضي، هي اللي هتفضل شاغلة حياتك. ما أنت ما وراكش غيرها وهتتعلق بها جداً وما تقدرش بعد كده ترفض لها طلب. لا، تبعد عنك. والست بطبيعتها لما تحس أن الراجل متعلق بيها قوي وما يقدرش يستغنى عنها، بتعوفه. إنما لو حياتك فيها نشاطات تانية غيرها: شغل، رياضة، تعليم، مش هتعرف هي تستحوذ على عقلك كله لأن عقلك في حاجات تانية غيرها.

طب أحكي لك حكاية حصلت معايا أنا. من كام سنة اتعرفت على واحدة أربعينية، وطبعاً الرجالة عارفة يعني إيه ست أربعينية. وكنا بنتكلم في كل حاجة من اللي بالك فيها. بس لما عملت قناة يوتيوب وبقيت أعمل استشارات، ده غير شغلي، ده غير الجيم بتاعي، ما بقتش فاضلها. يومي كله مشغول وعندي طموح أني أكبر. بقت تبعت وترن، ما بردش. بتعطلني. عملت لها بلوك. بقت تكلمني من أرقام تانية، برضه أعمل لها بلوك.

طبعاً أنت ممكن تقولي: يا غبي، هو حد لاقي؟ وكمان أربعينية! بترفس النعمة يا كافر! أنا كنت بفكر كده زيك برضه الأول: ست وناضجة وجامدة. بس صدقني لما تبقى حياتك مشغولة وعندك أهداف، مش هتسمح لأي حد يعطلك، حتى لو كنت بتكلم هيفاء وهبي. المهم، تقلي ده وغيابي مش مصطنع. فعلاً حياتي مشغولة وما بقتش فاضلها. وأقعد فترة ما أكلمهاش، فكنت بوحشها وتدور هي عليا. إنما لو بمثل الغياب وأنا حياتي أساساً فاضية، هزهق وهبقى عاوز أكلمها كل يوم ما أنا فاضي. فالغياب لازم يكون حقيقي علشان يجيب نتائجه، إنما تمثيل مش هينفع وهيبان.

في برضه معلومة غلط الشاب الخام ما يعرفهاش، وهي أن معاملة المرأة الكويسة معاك دليل على إعجابها بيك، والمعاملة الوحشة دليل على أنها مش طايقاك. لا يا حبيبي، العكس. الست لو معجبة بيك، زميلتك في الشغل، جارتك، تلاقيها بتزعق معاك. تعامل الناس كلها عادي وتيجي عندك أنت وتحس أنها قرفانة منك. دي كده معجبة بيك بس بتعمل الشويتين دول علشان تداري على إعجابها. إنما لو أنت بالنسبة لها شخص عادي، هتعاملك عادي.

طيب، معنى كده أن أي واحدة بتعامل واحد وحش دي كده معجبة بيه؟ لا. بنسأل هنا: بتعامله وحش ليه؟ في سبب؟ في مشكلة؟ في داعي؟ آه، في سبب: أسلوبه وحش، في مشكلة بينهم. كده طبيعي تعاملك وحش، يعني متخانقين مع بعض وهتعاملك حلو. إنما ما فيش سبب خالص وليس هناك ما يستدعي للمعامله الوحشة وبتعاملك وحش، ده كده إعجاب. فالمعاملة السيئة مع عدم وجود سبب، ده كده دليل على الإعجاب.

طب هل كل واحدة معجبة بواحد بتعامله وحش؟ لا، مش شرط. في واحدة معجبة بيك وبتعاملك باهتمام. دي مش محتاجة أني أعرفك أن دي معجبة بيك، باينة قوي أهي. إنما اللي مش باينة واللي أنت ممكن ما تاخدش بالك منها أنها بتعاملك وحش وأنت تفتكر أنها مش طايقاك، وهتاريها معجبة بيك.

وخد بالك كمان، الست كلامها حاجة واللي عاوزاه حاجة تانية، وهي مش عارفة هي عاوزة إيه أساساً. تقعد تقول لك: سيبني براحتي وما تدخلش في تصرفاتي علشان أنا ما بحبش كده. ده الكلام. إنما لو جيت تنفذه وسبت لها السايب في السايب، هتقول لك: أنت ما بتسألش، أنت مش مهتم، أنت مش بتغير عليا. الله! مش أنت اللي عاوزة كده؟ أنا بقول لك هم مش عارفين هم عاوزين إيه.

الست يا حبيبي عاوزة اللي يوجهها. هي تقول اللي تقوله، اعمل أنت الصح مش اللي يرضيها حتى لو غلط. اللي بتقوله صح؟ ماشي. اللي بتقوله غلط؟ لا، ما تسمعش كلامها. وزي ما قلت لك، هي لو حست أنك عاوز ترضيها بأي شكل، هتعوفك.

ماشي. ومعانا المرة الجاية عن موضوع مختلف أكثر متعة وتشويق.