عاجل | السعودية تطلب اجتماع عاجل مع وزير الخارجية المصري و التركي و اقتراب إعلان الحرب

مساء الفل، ازيكم؟ إيه الأخبار؟ مش عارف أنا أعد كده ولا كده، مش عارف كده أحسن. عاملين إيه؟ أخبار كتيرة وأخبار متسارعة بشكل كبير قوي. كلنا في انتظار الـ 48 ساعة اللي مرّوا. الإنذار بتاع ترامب، والله ترامب المفروض بعد 24 ساعة هيبدأ في تنفيذ تهديده إن هو هيبدأ يتخذ إجراءات عسكرية ضد إيران.

ماشي، عندي كم خبر كده لازم تعرفهم بشكل كبير. أولاً، إيران نزلت بيان رسمي وقالت إنها بتحذر أي مساس بمنشآت الطاقة بتاعتها، هترد على منشآت الطاقة في المنطقة كلها. يعني لأول مرة إيران ما بتقولش إنها تستهدف قواعد عسكرية أمريكية، ما بتقولش إنها تستهدف إسرائيل. صراحة كده تقول لك يا باشا تضرب منشآت الطاقة هنضرب منشآت الطاقة في الخليج. هتضرب محطة تحلية ميه هنضرب محطة تحلية ميه في الخليج. وده أمر يعني مهم جداً حضرتك لازم تعرفه، لأن إيران أصبح خلاص بتتكلم على عينك يا تاجر، يعني ما عندهاش أي مشكلة إنها يعني تنذر الخليج وبتقول لترامب ما تتهورش.

طيب، إيه اللي طالع دلوقتي؟ والله بص أنا هقول لك كم خبر كده لسه نازلين حالا، يعني يعني حالا دلوقتي. أول خبر طلع في الديلي ميل، وده لسه حالا ماتنقلش حتى على وكالات الأنباء. الديلي ميل طلعت تقول لك: على فكرة بريطانيا منعت أمريكا إنها تشن هجمات على إيران من القواعد بتاعتها. يعني بريطانيا عندها قاعدتين أمريكا بتستخدمهم. أول قاعدة اسمها RAF Fairford ودي القاعدة اللي فيها القاذفات النووية الأمريكية، ماشي. والقاعدة الثانية اللي هي دييغو غارسيا اللي هي في المحيط الهندي اللي إيران استهدفتها.

فأول خبر قال لك: والله بريطانيا بتقول لأمريكا، انتوا ممكن تستخدموا في أعمال دفاعية، يعني عاوزين تقضوا على الصواريخ الإيرانية، ماشي، عاوزين إن أنتم تفتحوا مضيق هرمز، ماشي، إنما الجنون اللي بيخطط ليه ترامب إن هو عاوز يعمل عملية عسكرية تصعيدية ضد إيران، إحنا مش هنشارك في الموضوع ده والقواعد البريطانية مش هتشارك أو مش هتكون جزء من الهجوم اللي ترامب بيخطط ليه بعد 24 ساعة. فده أول تراجع في الأمر.

طيب، تاني تراجع. تاني تراجع إن والله إسرائيل دلوقتي بتقول لك: إحنا ابتدينا نستخدم ذخيرة بقى لها يعني عقدين من الزمن، بقى لها 20 سنة في المخازن بتاعتنا بنضرب بيها إيران دلوقتي وهي إشارة. يعني إشارة خطيرة. أول حاجة خلي بالك إن إسرائيل أكتر يعني كيان بيقصف إيران، ماشي، وإسرائيل مش أمريكا. وحتى لو أمريكا بتدعم إسرائيل في تأخير في شحنات الأسلحة وده طبيعي جداً، لأن وتيرة القصف بتاعة إسرائيل أسرع من شحنات الأسلحة اللي جايه لإسرائيل. ولو أنت أخدت بالك هتلاقي إن يعني الناس تطلع تقول لك: أكيد إسرائيل كانت عاملة حسابها قبل الحرب. بص، كل الخطط اللي محطوطة للحرب دي هي أسبوعها اللي إحنا فيه دلوقتي، إحنا يعني بره الجدول وبره الخطط خالص.

فدلوقتي إسرائيل بتقول لك إن الأسلحة بتاعتها أو الذخيرة بتاعتها ما بقتش موجهة والدقة اللي فيها ما بقتش قد كده. طيب، اللي تفهم تفهم منه إن والله إسرائيل عندها مشكلة في الذخيرة الهجومية ده أولاً. والأمر الثاني إن إسرائيل بعد الضربات الإيرانية اللي تمت على مناطق مدنية في ديمونا، هتلوش يعني هتضرب مدنيين هي كمان، وهم أساتذة في الموضوع ده وسيد يعني أساتذة الإجراء. يعني خلاص أديك شايف بيعملوا إيه في لبنان. فإسرائيل بتقول لك: إحنا نبتدي نستخدم أسلحة يعني أو ذخيرة متقدمة نسبة التوجيه فيها مش قد كده، بس يعني عشان إيه تبقى عامل حسابك لو إيه 1000 مدني سقط تبقى أنت عارف إن إحنا مش بنضرب توجيه كويس. يعني فده أول أمر ودي حاجة يعني خد بالك منها.

طيب، دول الخليج حالياً عندهم صدمة من إنذار دونالد ترامب. وأنا قلت لك الصبح، هو ده أسلوب ترامب إن هو يطلع يقول لك إيه؟ يقول لك: أنا بدي مهلة. ودونالد ترامب دي طريقته، لأن هو راجل صفقات. فرجال الصفقات هم بيعملوا كده، يدي مهلة يا باشا هتنفذ ولا مش هتنفذ خلاص. فايران ردت على المهلة دي مش هينفذوا. فتوقع إن ترامب هيعمل حاجة كبيرة جداً. صحيفة جورزم بوست بتقول إن أمريكا بدأت تسرع من وتيرة إرسال القوات البرية للشرق الأوسط، وإن الجنود اللي بيتدفقوا للشرق الأوسط أسرع من المخطط ليه. ما معناه إن المهلة فعلاً بتنم عن عمل عسكري ضخم، ماشي، وعمل بري.

تانية، آسفين جداً معلش. فـ يعني تاني، كنا بنقول إيه؟ كنت بقول لك إن يعني وتيرة إرسال الجنود الأمريكان للمنطقة في تزايد، وإن والله أمريكا حالياً بتعد العدة لغزو عسكري. طيب، الغزو البري أو الكلام اللي طالع دلوقتي هل هو هيتم بعد الهدنة على طول؟ هم مستبعدين حاجة زي كده. يعني آه صحيح في جنود عمالين يجوا بوتيرة أسرع والكلام ده كله، بس لا تتوقع إن بعد 24 ساعة من دلوقتي في جنود أمريكان هينزلوا على الأرض. ليه؟ لأن هم بيتكلموا على الفرقة 82، هي عاوزة لها لسه أسبوع عشان تكمل استعداداتها. على فكرة الفرقة 82 دي فرقة تدخل سريع، بس معاها دفاعات جوية ومعاها راجمات صواريخ ومعاها هلم. يعني يعني دي مش قوات خاصة وخلاص، دي بتنزل بتجهيزاتها. فهم طالبين أسبوع. فلو لو هنمشي على تقدير إن الفرقة 82 هي اللي هتتدخل، لا هي لسه قدامها أسبوع. بس ظهر كده إن دونالد ترامب يعني هيعمل حاجة قوية الفترة القادمة. لا دي مش ساعة، دي مش ساعة.

فـ ده أمر مهم. في ظل الأحداث دي بطبيعة الحال طلع خبر في منتهى الخطورة. إيه هو؟ وزير الخارجية السعودي طلب دلوقتي اجتماع عاجل مع مصر وتركيا وباكستان. أكيد أكيد أول ما أقول الكلمتين دول هتلاقي حد يقول لك: الكلام ده كلام فارغ، أنت بتتمنى الحرب، أنت نفسك إن الحرب تقوم. السعودية عملاً ما هتحارب. والله البيان ده نازل على وزارة الخارجية أو موقع وزارة الخارجية السعودية، يعني أنا مش جايبه حتى من وكالة أنباء، ده نازل على موقع وزارة الخارجية السعودية. فسيبك من توجهاتي وسيبك أنا شايف إيه والكلام ده كله. ماشي.

ولما تيجي تبص بص، السعودية عاوزة اجتماع عاجل يوم الخميس. على فكرة يوم الخميس القادم على مستوى وزراء الخارجية. طيب، مش كان لسه في قمة عربية؟ صح؟ هو مش كان وزراء الخارجية الإسلاميين كلهم مجتمعين في السعودية في الرياض؟ ده أمر أمر ثاني. ليه الثلاث دول دول؟ ليه باكستان؟ ليه تركيا؟ وليه مصر؟ أنت بتتكلم على تلصيق عسكري، حتى لو على مستوى وزراء الخارجية بس، ده تلصيق عسكري. الثلاث دول دول أنت عارف إن دول التحالف الأساسي للسعودية. وبالمناسبة، حتى لو ما فيش إعلان حرب، ده تنسيق وده تقدير موقف خطير جداً، وإن السعودية بتطلق أو بتطلع حلفائها على تقديراتها إنها ممكن تتدخل ولا لا، واستعداداتهم هيكونوا معانا ولا مش هيكونوا معانا.

البيان اللي نزل واضح جداً إن السعودية بتستدعي حلفائها لتغيير موقفها. وما تنساش إن الخبر ده لسه نازل بعد خبر إن السعودية طردت الملحق العسكري الإيراني، ونتوقع برضه السفير الإيراني في السكة. مع إن على فكرة في دول ممكن تكون بتحارب بعض وسفراء موجودين، ده عرف. وعلى فكرة الرئيس مبارك كان أكتر واحد كان بيحب الاستراتيجية دي ويقول لك: أنا عمري ما هطرد السفير الإسرائيلي، أو هو ما كانش بيحب يعمل الكلام ده وقال لك: والله في دول بتضرب بعض وأنا ما بطردش السفير. الرئيس مبارك كان بيتكلم في كده.

اللي أنا عاوز أقول لك عليه إيه؟ اللي أنا عاوز أقول لك عليه إن والله أنت شايف دلوقتي الحرب ما فيهاش مخرج. ماشي، وأنت شايف دلوقتي إن الحرب كل سيناريوهاتها تصعيد، ما ما فيش سيناريوهات للتهدئة. وبالمناسبة، النهارده موقع إسرائيلي اسمه i24 المراسل بتاعه بيسأل دونالد ترامب بيقول له: إنت إنت يعني إيه رؤيتك لنهاية الحرب؟ قال له: بص، حتة إن إيران تستسلم، إنتوا هتعرفوا الكلام ده قريباً جداً وهيبقى الأمر ممتع جداً بالنسبة لي. ده على فكرة تصريح لسه نازل. يعني برضه لو أنت حابب تتأكد، ده تصريح لسه نازل من دونالد ترامب. قال له: إيران، حتة إنها تستسلم هيبقى قريب جداً وما هيبقى شيء ممتع. ترامب بيراهن إن هو هيقضي على إيران، وتاني، إيران مش هترفع راية بيضا، إيران يعني هتقع. قدرتها لو هي بتطلق 100 صاروخ هتنزل 10 صواريخ. شكراً، أمريكا هتعمل الانتصار. ماشي.

فـ ده أمر مهم. صحيفة الديلي ميل كانت منزلة تقرير قالت لك: على فكرة مكتب خامنئي رجله مقطوعة وراجل مشوه، ولا تنتظر إن هو إن أنت تشوفه أو تسمع صوته، لأن الراجل يعني صحته مش موجودة تقريباً أو صحته تعبانة جداً بعد محاولة الاغتيال. فالكلام اللي طالع في الديلي ميل بيرد على تقرير اكسس اللي النهارده بتقول لك: المقررات الأمريكية الظاهر كده بتعمل تقييم إن مكتب خامنئي ده مش موجود أصلاً أو ميت. فدي الديلي ميل ردت قالت: والله لأ، هو موجود بس رجله مقطوعة وراجل مشوه. يعني زي ما قال وزير الدفاع الأمريكي. هو قال كده. وزير الدفاع الأمريكي قال لك: مكتب خامنئي مشوه. فالظاهر إن الديلي ميل بترد على الكلام ده. فده أمر مهم.

النهاردة طلع خمس تقديرات لاحتمالية تدخل دونالد ترامب، اللي هو اللي هيتم بعد 24 ساعة. هم شايفين دونالد ترامب ممكن يعمل إيه؟ فقال لك: أول تقدير إن دونالد ترامب ممكن ينزل الجيش الأمريكي بكاسحات الألغام، يجيبها من اليابان وكوريا الجنوبية، يخشوا عشان يزيلوا الألغام بتاعة إيران في مضيق هرمز ويفتح مضيق هرمز. قال لك: الموضوع ده عاوز أسابيع وعملية ما ينفعش تتم في وقت القتال. يعني لو في حرب مع إيران ما ينفعش كاسحات ألغام تخش تزيل الألغام، لأن بالمناسبة كاسحات الألغام بتمشي لوحدها، ما ينفعش يبقى في سفن بتأمن كاسحات الألغام وكاسحات الألغام دي بتنفجر فيها ألغام. ماشي، فلو سفينة أو كاسحة ألغام مشيت لوحدها تبقى هدف لإيران سهل جداً. ده أمر. فقال لك: استبعد الحتة دي إن دونالد ترامب هيدخل كاسحات ألغام. انساها.

طيب، قال لك جزء ثاني: قال لك والله دونالد ترامب هيخش وإن هو يركز على الساحل بتاع إيران اللي بيطل على مضيق هرمز ويبتدي إن هو ينفذ عمليات عسكرية مكثفة للقضاء على الصواريخ الإيرانية والمسيرات ومناطق إطلاق المسيرات والكلام ده كله. الحقيقة الأوبشن ده أو الخيار ده تم الرد عليه إن مشكلة إيران حاجة واحدة بس إن صواريخها والمسيرات بتاعتها بتعرف تتحرك، أو سهولة نقل حركتهم. ماشي، وسهولة نقل حركتهم دي بتصعب على الجيش الأمريكي إن هو يطهر الشاطئ الإيراني اللي بيطل على مضيق هرمز. فهتبقى عملية معقدة. ماشي، عاوز تنزل بري ده قصة تانية، بس هم حتى الخيار ده صعب جداً إن أنت تبيد الكلام ده.

طيب، الخيار الرابع، آسف، الخيار الثالث. قال لك والله هينزل طيارات الأباتشي والـ A-10 يقعدوا ماشيين فوق مضيق هرمز طول ما السفن أو حملات النفط، ناقلات النفط يعني، بتمر بمضيق هرمز. قال لك والله الخيار ده هو اللي بيحصل حالياً، بس هو مش فعال لحد دلوقتي، لأن الظاهر كده إن إيران قادرة إنها لسه تقفل مضيق هرمز لحد دلوقتي. لأن على فكرة رئيس أركان الجيش الأمريكي طلع قال إن والله في الـ A-10 اللي هي بيسموها Flying Tanks أو الدبابات الطائرة. ماشي، بيسموها كده على فكرة من كتر قدرتها على حمل أسلحة.

فقال لك الطيارات دي أصلاً بتطير حالياً فوق مضيق هرمز، بس مش عارفة تمنع مع التهديد الإيراني. ماشي، وطيارات الأباتشي المفروض طالعة من دول الجوار المفترض يعني إنها طالعة من الإمارات. ما حدش متأكد يعني، بس هي الطيارات أصلاً بتعمل كده والامر غير مقنع. طيب، قال لك يا باشا يدخل يعني مدمرات ترافق ناقلات النفط. قال لك على فكرة الخيار ده لو هو منطقي أصلاً كان عمله من الأول. أولاً، ده خيار مكلف جداً. ثاني حاجة، توقع إصابات في المدمرات فهيبقى أكثر تكلفة من يعني إن أنت تنقل النفط. يعني ناقلة النفط دي هتدفع أنت ثمنها معدات عسكرية أمريكية.

فالتقرير اللي كان عاوز يقوله لك إيه؟ قال لك الخمس خيارات المطروحة قصاد الرئيس الأمريكي لفتح مضيق هرمز سيئة. ما عندوش خيار لفتح مضيق هرمز. ماشي، وحتى لو معاه تحالف دولي ما عندوش خيار لفتح مضيق هرمز. ماشي. الحاجة الوحيدة اللي تفتح مضيق هرمز إن هو يبيد الجيش الإيراني. لأن أنت يعني أديك شايف ما فيش خيارات جيدة. أما لو والله عاوز ينزل ويحتل جزيرة خرج زي ما هو قال. على فكرة، على فكرة كل التقديرات دلوقتي بتتكلم على عملية برية وبيركزوا على خرج. وطلعت قناة اسمها i24. قناة i24 قالت إن ترامب أخبر دول الجوار إنه هينفذ عملية برية تقريباً في جزيرة خرج. التقرير اللي نزل ده أنا مش بلعبه ليه؟ فاكر أنت لما كان دونالد ترامب قاعد جنب رئيس رئيس وزراء اليابان ومراسل ياباني قال له: إنت ليه ما قلتش لدول الجوار قبل ما تشن الحرب وتنسق معاها؟ قال له: أقول لدول الجوار يعني وقعد يتريق عليه. قال له: ده أنتوا أساتذة في المفاجآت. أنا ما ينفعش أقول لدول الجوار أو دول المنطقة عشان عنصر المفاجأة. خلاص، وأنتم أصلاً اليابان دي بتاعة عنصر المفاجأة وبتاعة بيرل هاربر وفاجأة الأمريكان والكلام ده كله. فما ينفعش أقول لدول الجوار.

فـ تقرير i24 بيقول لك إن ترامب أخبر دول الجوار إنه هينفذ عملية برية في خرج. مش مش بالع التقرير ومش مصدقه قوي. بمناسبة i24 يعني مش مش الحاجة العظيمة، بس هم كاتبين التقرير كده. طيب، الله يخليك متشكر جداً يا. طيب، هو القصة كلها دلوقتي في حاجة إن والله إحنا أصبحنا قدام خيارات قليلة. على فكرة في الحرب دي ما فيش خيارات كتيرة. أنت شايف إن إحنا رايحين بطريق واحد وهو التصعيد، وما فيش أي حاجة بتنم على إن إحنا هنهدي الأمور ولا أي حاجة.

طيب، خليني أقول لك خبر يفرق معاك أنت كمصري. يعني النهاردة أنا كنت بقرا تقرير كان نازل في العربية Business كان بيقول لك إيه؟ بيقول لك: في ناس فرحانين في مصر يعني إن والله برميل النفط رايح لـ 112 دولار. التقرير كان بيتكلم إن كل دولار زيادة في برميل النفط بيكلف مصر 4 مليار جنيه. تاني، كل دولار زيادة في برميل النفط بتكلف مصر 4 مليار جنيه تكلفة على الحكومة. ده أمر. الأمر الثاني، النهاردة كانوا بيتكلموا إن مصر لما يعني بتقول إنها بعد العيد هتخلي كل الكافيهات والمصالح الحكومية، مصالح حكومية، الحي الحكومي هيقفل الساعة 6، وكل الشركات والكلام ده كله بيقفلوا الساعة 9. قال لك: ده خراب بيوت. ليه؟ خلي بالك اقتصاد مصر تحول من اقتصاد يعني في إيد الحكومة بس وعندك قناة السويس والسياحة، دلوقتي أنت اقتصادك مبني 78% منه قطاع خاص. ماشي، هتيجي تقول لي: على فكرة نسبة غلط، هم اللي قايلين كده، يعني أنا ما جبتش حاجة من دماغي.

القصه بيقول لك إيه؟ بيقول لك: خلي بالك دلوقتي القطاع الخاص ده هيلبس، لأن سلوك المواطن المصري إن هو بينزل بالليل والكافيهات على فكرة بتشتغل بعد 8. فـ أنت كده مش هتدي الكافيهات فرصة إن هم يشتغلوا أصلاً. يعني الناس تنزل 8، تمشي 9، فالكافيهات هتبتدي تسرح الموظفين عندها. خلاص، بالمناسبة هي المشكلة في الخبر ده كله أو تقدير الاقتصاد المصري إيه؟ إن ما فيش رؤية الموضوع ده هيخلص إمتى. وده اللي بيعمله الخليج. على فكرة، الخليج مش عارف القصة دي هتخلص إمتى. وكل التقديرات اللي طلعت، أديك شايف إن من ساعة ما إسرائيل ضربت حقل البارس الجنوبي ده في إيران، وإحنا كل التقديرات كانت بتتكلم إن الحرب دي هتخلص آخر الشهر أو مع بداية عيد الفصح، زي ما إسرائيل كانت بتتكلم. يعني أنت بتتكلم في تقديرات أبعد، لأن إيران ما زالت تمتلك صواريخ وما زالت بتضرب صواريخ. ماشي، فـ القصة هنا يعني التقرير بتاع العربية Business ده كان بيتكلم إن الاقتصاد المصري بيواجه صحيح مشكلة في إنه يدبر عملة عشان يجيب نفط أو طاقة، بس الاقتصاد، الاقتصاد المصري بيواجه تحدي ثاني إن أنت بتتكلم إن هيتم شل الاقتصاد المصري. يعني إن عندك كل الكافيهات والمولات والكلام ده كله لما تقفل بالليل الساعة 9، ده أنت كده بتخرب بيوتهم، أو أنت كده بتوقف. وبالمناسبة، أنا مش جاي أقول لك يعني ده خطأ الحكومة، بس هي يعني أديك شايف كل دولار بـ 4 مليار جنيه، فالحكومة هتعمل إيه؟ ولو أنت فاكر إن والله ده إجراء مصري إحنا مبتدعينه، والله بص على دول آسيا أصلاً مخلية العمل الحكومي عن بعد ومنعت المدارس أو قفلت المدارس وخلت الدراسة عن بعد. على فكرة آسيا متبهدلة أكتر مننا بكتير. يعني أنت على الأقل عندك جزء أنت بتنتجه، أو أنت عندك حقول نفط وغاز. صحيح ما عندكش اتفاق ذاتي من غاز والنفط، بس عندك جزء. في دول آسيوية ما عندهاش حاجة. فـ في دول آسيوية يا باشا قفلت قفلت قفلت، يعني خلاص، وحالياً شغالين على المخزون بتاعهم.

فـ أنا عاوز أقول لك إن الحرب دي، أوعى تبقى أنت يعني فاكر إن إحنا بعيد عنها. إحنا بندفع تمنها. ماشي، وكل ده كنت ماتكلمتش إن مصر هتخش الحرب. هتبقى قصة تانية خالص. فواتير تانية خالص تدفع. فـ ده أمر مهم. وده تبقى واخد بالك منه. إيه أخبار جيش التحالف العربي؟ معلش تاني كده عشان أنا إيه ما سمعتكش. والله ما في جيش تحالف عربي. الخليج مش هيعمل جيش تحالف عربي وانسى الكلام ده. ماشي، وما حدش هيعمل تحالف عربي وهو بيحارب عشان بس تبقى عارف حاجة زي كده.

طيب، خليني أقول لك آخر الأخبار من الإعلام الإسرائيلي عشان نبقى إيه. طبعاً أنت إيه، اللي بيحصل ده دلوقتي كله الإسرائيليين شغالين في الضفة الغربية. الله ينور. ده على فكرة صحيفة هآرتس هي اللي كاتبة كده. قالت لك: الصهاينة عمالين يهجروا الفلسطينيين في الضفة الغربية مستغلين الحرب. يعني بيهجروا الفلسطينيين. تهجير الفلسطينيين ده هيفتح جبهة الأردن، والأردن مش هتعرف تلاحق على الهجرة غير الشرعية اللي بتتم عندها. وهم حتى جريدة هآرتس مسمينه Nightmare أو الكابوس. يعني. في سبع جنود النهاردة أُصيبوا في لبنان من إسرائيل، وإن حالياً في صواريخ إيرانية عمالة تنزل على تل أبيب. هم كاتبينها Central Israel Location، يعني في وسط إسرائيل. وهنا سفارات الإنذار بتشتغل في الضفة الغربية. خلي بالك، في أربع فلسطينيين استشهدوا بصواريخ إيرانية سقطت على الضفة الغربية. ماشي. بس الخبر ده قديم، مش النهاردة.

طيب، صحيفة بتتكلم إن السعودية اعترضت سبع مسيرات النهاردة في الصحراء، الصحراء الغربية، آسف، الصحراء الشرقية اللي جاية من إيران، وإن والله إسرائيل مبسوطة جداً من حاجة زي كده، إن هي بتراهن إن السعودية تخش الحرب. خلي بالك، إسرائيل بتنام وتحلم إن الخليج يخش. السعودية هي الخليج. ماشي، فهم يعني إيه نفسهم الخليج يخش.

النهاردة الاتحاد الأوروبي حاول يتواصل مع سفير إيران في الاتحاد الأوروبي وحاول إن هو يوضح له يعني إن إحنا مش عاوزين حرب ونهدي الدنيا والكلام ده كله، بس طبعاً هم بيكلموا الشخص الغلط، لأن ترامب بنفسه بيقول لك: يعني أنا مش عارف حد في إيران أعرف أكلمه. على فكرة، ترامب لما بيطلع يقول لك: يعني إيران هتستسلم قريباً، هو بيراهن زي ما بقول لك كده، خفض كفاءة إطلاق الصواريخ في إيران ويطلع النص. ماشي، ده ساعتها.

طيب، وزارة الخارجية الأمريكية منزلة بيان دلوقتي بتقول لك: على العالم، هو مش بيحذروا دول المنطقة في الشرق الأوسط، لا، هم بيقولوا العالم كله يجب إنه يبقى حذر، لأن إيران هتبدأ تستهدف المصالح الأمريكية في الخارج، وإن على كل القنصليات والسفارات الأمريكية في الخارج إنها يعني تبقى حذرة، خاصة في المجال الجوي بتاعها، يعني السفارات تخلي بالها إن في مسيرات ممكن تنشأ فيها. ماشي، فده تحذير نازل من وزارة الخارجية الأمريكية حالاً.

طيب، النهاردة ميتاليس متريتش، وزير المالية الصهيوني، عاوز إنه يحتل الضفة الغربية بأي شكل. يعني وقال لك والله إحنا نزيل السلطة الفلسطينية ونحتل الضفة الغربية. أنا زي ما بقول لك كده، هم واخدين الحرب كغطاء. فض. طيب، كان نزل تقرير في نيويورك تايمز وأنا حابب برضه إن أنت إيه تسمع الأخبار كلها بتحليل مختلف شوية. كان نزل تقرير في نيويورك تايمز إن والله ترامب بعد التهديد اللي هو هينفذه ده وبعد التصعيد الخطير اللي هو هينفذه، أياً كان هو إيه، عمل بدري ضرب إيران، الكلام ده كله، ترامب عاوز يتسحب من الحرب دي، عاوز يوقف الحرب خلاص. أياً كان قدرة إيران هتبقى عاملة إزاي. وعلى فكرة، ترامب على قناعة النظام مش هيقع، وعلى قناعة إن سيناريو فنزويلا راح، ما فيش بقى حد هيجي يمسك مكان المكتب ولا الكلام ده كله.

فقال لك إيه؟ قال لك ترامب بعد العملية الجبارة اللي هينفذها هيمشي. طب مين اللي ماسك فيه؟ نتنياهو. نتنياهو رافض تماماً إن ترامب ينهي العملية في أي وقت، حتى لو منتصف أبريل، ما ينفعش خلاص. نتنياهو عاوز يكمل العملية بأي شكل. وبيقال على فكرة، بيقال هنا وفقاً لنيويورك تايمز، إن يعني اللوبي الصهيوني هيلعب دور جبار خلال الفترة القادمة في محاولة إقناع ترامب إنه ما ينهيش العمليات ويفضل يستمر في العمليات على الأقل يعني كم أسبوع كمان عشان العمليات ما تنتهيش.

هم قارئين إيه؟ هم قارئين إن سلوك ترامب إنه يصعد قبل النهاية، Escalade to de-escalate، يعني تصعيد لإنهاء الحرب أو تصعيد لخفض التصعيد. ماشي، هيعمل جبار بس هيمشي بعدها. دي الاستراتيجية اللي دونالد ترامب ماشي بيها. هيعمل جبار عشان يعلن النصر خلاص. نتنياهو شايف الموضوع ما يمشيش كده، ونتنياهو مصر إن ترامب يغرس في إيران ويكمل الحرب اللي بدأها. فـ أنت هنا بتتكلم عن اختلاف. إسرائيل لو إحنا مشينا على نماذج إسرائيل إن إسرائيل قدامها لا أسابيع، أول أسبوع منهم فات، أنت بتتكلم على أسبوعين كمان في أبريل. ممكن ده التوقيت. إسرائيل عاوزة ترامب يحارب. ماعرفش ترامب هيبقى عاوز يعمل إيه. اللافت للنظر إن النهاردة، إيه، وده خبر على جامد على فكرة، إن النهاردة مصر، الطيران رجعت خطوطها لمطار دبي. وقلت لك إن عدم استهداف مطارات الإمارات وقطر ده نتيجة وساطات، مش نتيجة إن إيران والله صحيت الصبح قالت لك: والله مش هنستهدف المطارات. نتيجة وساطات، وأنا أعتقد إن وساطة مصرية لعبت دور كبير جداً في الأمر ده. فـ ده قصة خد بالك منها.

خليني أقول لك اللي بيحصل من الإعلام الأمريكي أو وجهة نظر أمريكا في العربية. طبعاً دلوقتي السوشيال ميديا الأمريكية بيركزوا على سماء طهران إنها باللون الأحمر. إيران على فكرة ما بتشوفش نهار وليل، السما بتاعتها على طول حمراء. حمراء يعني إيه؟ مش دم، حمراء يعني انفجارات. خلاص، فـ صورة النار أو اللهيب اللي بيندلع ده بيخلي السما على طول فيها انفجارات وفيها دخان. فـ إيران على طول مولعة.

حالياً كوبا منزلة بيان بتقول لك إنها بتستعد لعدوان عسكري أمريكي محتمل بعد الحرب الإيرانية، أو في وسط الحرب الإيرانية. يعني كوبا مش مستنية إن ترامب ينهي حرب إيران، ده هي بتستعد إنه ممكن يكون الأسطول الأمريكي اللي واقف في أمريكا الجنوبية هيبدأ ينفذ هجمات على كوبا. وعلى فكرة كوبا أصلاً بتقع لوحدها. يعني كوبا عندها نقص في البترول وعندها نقص في الطاقة كبير جداً، لأن ترامب محاصرها. فـ يعني عاوز أقول لك إن هو مش عارفين يمونوا الطيارات اللي بتنزل في مطار كوبا. أي طيارة تنزل في مطار كوبا لا تتوقع إنها تملى التانك بتاعها، لا تبقى عاملة حسابها تروح وترجع. ما عندهمش طاقة.

طيب، دونالد ترامب نشر فيديو لكير ستارمر، رئيس وزراء البريطاني، وقال لك والله كير ستارمر خايف يكلمني ومدعوب إنه لو كلمني أقسى عليه حبتين، فخايف يكلمني. وطبعاً نزله فيديو يعني بيتريق عليه وبيقول لك: أنا الرئيس المخيف ده، رئيس وزراء بريطاني. ماشي.

طيب، أمين عام، أمين عام حلف الناتو، مارك روتا، قال لك: على فكرة يعني ما حدش يتكلم يا جماعة إن دونالد ترامب بيهاجم دول حلف الناتو. دول حلف الناتو 22 دولة. تتوقع إنه لما يقول 22 دولة يعني مش محتاجين أمريكا. قال لك: كلهم على استعداد لتلبية أمر دونالد ترامب لو هو أشهر. مذيعة إم بي سي نيوز بتسأل وزير الطاقة الأمريكي بتقول له: يعني إيه التهديد أو التصعيد اللي هيعمله ترامب ضد إيران؟ وليه أصلاً يروح للغة التصعيد؟ هيحاول يكف معاهم ويكون ناعم. ماشي، الإيرانيين ما بيفهموش غير كده. وع فكرة عنده حق. مناسبة يعني. ليه؟ أنا كنت على فكرة مش بهاجم إيران، بس أنا بقول لك هو عنده حق. ليه؟ لأن كان في مقالة كاتباها واحدة اسمها هقول لك اسمها إيه عشان كنت لسه جايب المقالة بتاعتها الفيديو اللي فات. فـ عشان تبقى إيه أعلى دراية بالخور. مش مشكلة اسمها يعني. اسمها تقريباً سارة حاجة. إيرانية بتقول لك: يعني أنت دلوقتي حالياً فهمت ليه ولا رئيس أمريكي حب إنه يضرب إيران. ماشي. اللي أنت شايفه قدامك ده، كل ده هو تقدير الرؤساء الأمريكان السابقين كانوا عارفين إن الحرب مع إيران مش حرب سياسية ولا عسكرية، حرب دينية. الإيرانيين حالياً بيحاربوا جهات مش بيحاربوا لتحقيق مصر. ماشي، لأن مرشدهم أو موجههم اتقتل. فـ كل رؤساء الأمريكان السابقين كانوا مدركين تماماً إن حرب إيران صعبة، وعشان كده كل رؤساء الأمريكان بيروحوا للطريق الأسهل وهو إن هم يفرضوا عقوبات. والعقوبات كانت بتجيب مع إيران على فكرة، كانت رجعت الاقتصاد الإيراني عشرات السنين لورا. يعني بس دونالد ترامب كان عنده وجهة نظر تانية مدفوعة إنه والله هو الرئيس الوحيد اللي قتل قاسم سليماني، وهو الرئيس الوحيد الوحيد اللي انسحب من الاتفاق النووي، وإنه خد إجراءات إيران أصلاً ما عرفتش ترد عليها. فـ دونالد ترامب غروره صور له إنه والله دي هتبقى نزهة، وجت عملية فنزويلا إنه خطف نيكولاس مادورو. فـ ترامب اتأكد إن دي نزهة. ماشي، وإن الإيرانيين مش هيعملوا حاجة، وإن إيران هتسقط في خلال أسبوع. وعلى فكرة حتة أسبوع دي متقالة برضه النهاردة في صحيفة اسمها يديعوت أحرونوت. قال لك إن والله تقديرات إسرائيل إن الشعب الإيراني هينزل بعد أسبوع من إزالة النظام الإيراني. أديك شايف إن اللي بينزل هو الحرس الثوري مش الناس. ماشي، فـ أنا عجبتني المقالة لأن هو كلامها منطقي. كل المشهد اللي أنت شايفه ده، أي رئيس أمريكي كان الرؤساء أو قالوا له: أنت هيحصل واحد اثنين ثلاثة. قال لهم: لا، أنا عارف أنا بعمل إيه. وأصر إنه يطلق الحرب دي. وأديك شايف إحنا فين.

وهقول لك تقرير أكتر كارثية نزل النهاردة في جريدة الإيكونوميست. بيقول لك إيه؟ بيقول لك: على فكرة أسعار النفط دلوقتي عالية جداً، وده أمر خطير. ولازم تعرف إن الخطورة ما تقفش عند هنا. أنت هنا بتتكلم إن برميل، آسف، الجالون مثلاً في أمريكا أسعاره بترتفع بشكل كبير قوي. فقال لك: خد بالك إن دونالد ترامب مش هيحب إنه يشوف أسعار النفط عمالة ترتفع عنده في بلاده. طب هيعمل إيه؟ قال لك: ممكن يجي في لحظة ويمنع تصدير النفط. على فكرة التقرير نزل في الإيكونوميست بكده. قال لك: ممكن ترامب يتهور ويقول لك: مش هطلع النفط بره أمريكا. ليه؟ عشان أسعار النفط تفضل في أمريكا ومش هيطلعها كمان عشان تفضل الطاقة عشان ما يخسرش سياسياً، لأن الراجل ده عنده انتخابات تجديد نصفي. طب هو لو عمل كده، أنت دلوقتي عندك برميل النفط 111 دولار و يعني كام يا باشا؟ أنت عندك 111 و8 سنت. أقول 112 صح؟ لو ترامب قفل النفط عنده ما خرجوش بره أمريكا، 200 دولار وش. لأن أنت عندك أصلاً 20% من صادرات النفط ما بتطلعش مضيق هرمز. مضيق هرمز ده بيعدي منه 20 مليون برميل في اليوم. مش موجودين. ما فيش حاجة بتطلع. فـ السوق فيه نقص. وتيجي أمريكا كمان ما تصدرش نفط. شكراً، شكراً.

فـ جريدة الإيكونوميست معرفش هم فكروا في التحليل ده إزاي، بس هم كانوا كاتبين التقرير ده. وقال لك: على فكرة ترامب ممكن ما يصدرش نفط. وعلى فكرة الإيكونوميست أكتر تقريباً أكتر جريدة بتشن عملية يعني سخرية من ترامب. وقال لك: على فكرة العملية العسكرية، على فكرة لحد دلوقتي هي عملية عسكرية مش حرب. ماشي. العملية العسكرية الجيش الأمريكي مسميها إيه؟ مسميها Epic Fury. المفروض تسمى، اسمها إيه؟ Blind Fury. ماشي، العمى التاريخي أو العمى الجبار. ماشي، وملبسين ترامب خوذة كده وايه. وقال يعني الراجل ده ما كانش شايف كل التحذيرات الاستشارية قعدوا يقولوها له، والراجل خد قرار إنه يضرب إيران. وقال لك: على فكرة دونالد ترامب دلوقتي أضعف وأكثر تهوراً. توقع منه أي حاجة. أي قرار ممكن أنت تشوفه مش منطقي وما يطلعش. لا، حالياً.

شوف، أنا عاوز أقول لك أنا قبل ما أطلع لايف كنت بشوف لقاء بتاع يعني مسؤولة في الدنمارك. أنا ماعرفش هي رئيسة وزراء ولا رئيس، مش عارف الدنمارك عندها رئيس ولا ناسي. الست عمالة تقول لك: دونالد ترامب التعامل معاه صعب جداً. الراجل ده يعني بيفرض ضغوط غير طبيعية. ليه؟ هي طبعاً بتتكلم على جزيرة، نسيت اسمها إيه؟ الجزيرة دي. اسمها جرينلاند. ماشي.

فقال لك والله ترامب يعني بيمارس. أيوه هي جرينلاند. والله الناس محترمة. والله العظيم. يعني عندنا متابعين. طب أنا أقول لك حاجة، أنت عارف مرة كنت بكلم سبونسر يعني. فبقول له: أنت ما، في ناس على فكرة بتجيب فيوز أكتر مني. قالوا: لا، قال لك: لا، أصل المتابعين عندك مهتمين فعلاً بالسياسة. أنت مش بتعمل سيرفرات ولا بتاع. أنت المتابعين عندك بيقعدوا يكملوا فيديو ومشاهدات كويسة. لا، أنتوا ناس محترمة بصراحة. المهم اللي أنا عاوز أقوله إن يعني الست بتاعة الدنمارك كانت بتتكلم إن دونالد ترامب طريقته مش مش طبيعية. راجل يعني أنت بتشوف تصريحات، بس الست دي هي بتاعة الدنمارك تقول لك: لا، خلف الأبواب المغلقة هو مش طبيعي. خلاص. فا الأمر ده الست كانت واقفة عنده بشكل كبير قوي.

طبعاً طبعاً أنت دلوقتي تنسى موضوع جرينلاند. ماشي، يعني ما تحطش في بالك إن الجيش الأمريكي هيطلع على جرينلاند ويحتل جرينلاند، لأن تاني، الجيش الأمريكي هيطلع من الحرب دي أضعف وعنده مشكلة في الذخيرة وعنده مشكلة في صواريخ الاعتراض الجوي والكلام ده. فهيبقى عنده مشكلة كبيرة جداً. فحته جرينلاند دي دونالد ترامب هيلم التصريحات ومش هيعملها.

طيب، إيران بتقول إنها فعلت الدفاعات الجوية في شمال ووسط إيران. ماشي، وده خبر مهم، لأن إحنا النهاردة بنتكلم على إن إيران قفلت رادار أو صورت مقاتلة F-15. على فكرة المقاتلة 15 اللي إيران صورتها النهاردة ما كانتش بتطير فوق سماء طهران، دي كانت بتطير عند مضيق هرمز. خد بالك بس من الفيديو اللي طلع ده. ماشي، كانت بتطير عند مضيق هرمز.

فايران بتقول لك: إحنا فعلنا الدفاعات الجوية بتاعتنا. طيب، ولي العهد السعودي بيبحث مع ماكرون التطورات اللي بتتم في المنطقة. إيه، وايه، يعني هنروح لفين؟ بس أنا بقول الاجتماع الأهم هو يوم الخميس. نهاية الأسبوع ده هتعرف حاجات كتير قوي بعد اجتماع وزراء خارجية مصر وتركيا وباكستان مع وزير الخارجية السعودي. وتاني، البيان ده نزل على موقع وزارة الخارجية السعودية.

بص، هو حالياً الأخبار كلها إن طيب، يعني بص أنا هقول لك مثلاً قناة العربية دلوقتي. عشان تعرف إن إحنا أصبحنا في إعلام زمن الحرب. والله العظيم مش بنتقدها، يعني عشان بس ما تاخدش الكلام إن أنا بنتقد قناة العربية. أنا بحاول أفسر لك وكالات الأنباء أصبحت عاملة إزاي دلوقتي. هي حرب إعلامية. ماشي، فقناة العربية مستضيفة مختص في الشؤون الإيرانية بيقول لهم إيه؟ بيقول لهم: على فكرة غلق مضيق هرمز بيقوي موقف أمريكا. غلق مضيق هرمز بيقوي موقف أمريكا. هو ده جزء من الحرب الإعلامية. وعلى فكرة أنا لو عندي وكالة أنباء هطلع أقول الكلمتين دول. بس حالياً الكلام اللي أنت هتسمعه في نشرات الأخبار ده هو جزء من حرب إعلامية. ماشي، الجزيرة غيرت موقفها من إيران، مش عارفة تغير موقفها من إسرائيل. يعني هي مثلاً إيران لما تضرب إسرائيل، الجزيرة مش هينفع إنها تبرر. بس مثلاً إيران تضرب صواريخ على دول عربية، الجزيرة ما بقتش تقول لك إن الصواريخ الإيرانية دي خلاص بقت صريحة جداً من الصواريخ دي صواريخ اعتداء. والكلام ده. سكاي نيوز من الأول وهي بتشن هجوم على على إيران. فـ يعني اللي أنا عاوز أقول لك عليه إن حالياً لازم تنصت لحياة، لأن على فكرة في أخبار ممكن تكون في صالح إيران مش هتذاع، مش هتذاع. وده الصح.

بالمناسبة، الترند دلوقتي في أمريكا دلوقتي حال على النص X في أمريكا إيه هو؟ ترامب نتنياهو، أو ترامب آند نتنياهو. يعني ترامب ونتنياهو. ماشي، الأمريكان كلهم بيتكلموا ترامب ونتنياهو عشان نتنياهو مش عاوز ترامب ينسحب. طبعاً. لو خدت بالك كان بيقول ليندسي جراهام ده، فاكر أنت ليندسي جراهام ده السناتور الأمريكي اللي كل شوية عمال يشن. الراجل ده لو كان عايش في إسرائيل كان هيبقى لغته مختلفة شوية. هو دلوقتي عمال يطلق تصريحات إن العرب لازم يخشوا وفين العرب وكلام. طيب، حالياً ماسك يعني أصبح مرضي عنه من قبل بيطلب. ماشي.

ليه؟ ليه؟ لازم تعرف دلوقتي Star X، ماشي، Star X دي، آسف، Starlink. Starlink دي اللي هي شبكة الأقمار الصناعية اللي بتدي إنترنت، أصبح ليها دور فعال بشكل غير طبيعي في إيران. فعال للإيرانيين؟ لا، فعال للجيش الأمريكي، لأن الجيش الأمريكي محتاج إنترنت لتوجيه الصواريخ والذخيرة بتاعته. فـ Starlink أصبحت هي السلاح الأساسي لجيش أمريكي للعمل في المناطق اللي ما فيهاش نت، لأن على فكرة إيران قطعت النت من أول الحرب وهي ما فيش نت عندهم وما فيش كهرباء بالمناسبة. فـ Starlink حالياً يعني لما قالوا ماسك دلوقتي بيساعد الجيش الأمريكي وبطبيعة الحال بيساعد دونالد ترامب، لازم تعرف إنه دونالد ترامب حالياً راضي عنه بشكل كبير.

حته بس إن الراجل اللي طلع على العربية وقال لك: غلق مضيق هرمز ده بيقوي موقف أمريكا. طبعاً ده كلام فارغ. ولازم تعرف إن إيران أصلاً اكتشفت إن مضيق هرمز ده القنبلة النووية الجديدة بتاعتها. ماشي، إيران مش محتاجة القنبلة النووية. الدمار اللي عملته إيران في العالم كله نتيجة إغلاق مضيق هرمز مش عايز أكتر من كده. أنتوا عاوزين إيه يعني؟ فطبعاً الراجل ده إيه بيقول أي كلام فارغ في أي حتة.

في مناظر في إسرائيل دلوقتي إن إسرائيل عمالة تضرب فقط بصواريخ انشطارية. الصواريخ الانشطارية دي مشكلتها إيه؟ إن الصاروخ بيتم اعتراض بس بينشطر، الرأس بتاعته بتنشطر فبتسبب ضربات قوية جداً على المواقع. خلي بالك، هم بيضربوا وسط إسرائيل، مش بيضربوا في بس. هقول لك حاجة مهمة جداً تعرفها. طب ثانية واحدة. فاكر أنت إيهود باراك؟ إيهود باراك ده راجل مجرم، رئيس وزراء إسرائيل السابق. يعني وبيقول إن إسرائيل بتكذب بشأن إيران، وبيأكد إن إسرائيل بتكذب، لأن ما ينفعش فتح مضيق هرمز ولا تدمير قدرات إيران النووية والقدرات الصاروخية الإيرانية. ده هو ده اللي بيقول ده رئيس وزراء على فكرة صادق. قال لك: إسرائيل تكذب ولا ينفع فتح مضيق هرمز ولا تدمير قدرات صاروخية ولا تدمير القدرات النووية. الثلاثة دول مش هيتدمروا. فـ ده تصريح خطير جداً. ماشي، ده إيهود باراك. وعلى فكرة هو طالع على قناة إسرائيلية، مش طالع على قناة.

مثلاً، حاجة طيب. هو التصريح اللي بيقوله ده إيه؟ هو تصريح؟ هو مش عسكري، بس هو تصريح طبعاً سياسي. هو عاوز يأذي نتنياهو. بس كلام منطقي؟ آه. مش هتنفع تقضي على القدرات الصاروخية، لأن انت لازم تنزل كل مخازن الصواريخ، تنزل مش تضربها بالقنابل، تنزل وتدمرها. القدرات النووية لازم تنزل على الأرض وتجيب جيشك وتخش جوه ترفع الردم بقى اللي مرزدوم ده وتخش جوه وتجيب اليورانيوم المخصص. آه. ولا إن انت تفتح مضيق هرمز. وأنا قلت لك إن الخمس خيارات قصاد الرئيس الأمريكي كلها سيئة. في فتح مضيق هرمز. ماشي. هي المشكلة دلوقتي دونالد ترامب عاوز يمشي، بس هيعلن نصر إزاي؟ لأن هو خسر في الثلاث ملفات دول. خسر في الثلاث. لأن بالمناسبة، كلام ده سندور أمريكي يعني بيظبطوه معايا. المهم، القصة كلها في إيه؟ القصة كلها إن أنا نسيت. ده تشتيت انتباهي.

طيب، ترامب بيقول للقناة الـ 13 الإسرائيلية: "هندمر إيران بشكل كامل". قال لك خلاص، إحنا هندمر إيران بشكل كامل. وافتكر الثلاث حاجات دول مش هيتدمروا. ماشي. لا صواريخ ولا يورانيوم ولا هرمز. بس هو هيدمر إيران بشكل كامل. وأحقاً الحق، يعني إيران أصلاً متدمرة بشكل كامل. ماشي. هو حالياً هو الحرس الثوري الإيراني اللي عنده صواريخ وبيضرب، بس ما فيش حاجة تاني. بس هو إيه؟ تصريح سياسي. إسرائيل ضربت صاروخ على ريف دمشق. ماشي. وعلى فكرة، إسرائيل ضربت القوات السورية من كام يوم. قال لك والله أصل هم هاجموا هجوم على الدروس. فإحنا ردينا الهجوم ده. إسرائيل عاوزة تقول يعني إن هي مسيطرة.

طيب، موقع فلايت تريدر كشف حاجة خطيرة جداً. بيقول لك في 43 رحلة شحن عسكري من اليابان وكوريا الجنوبية لأمريكا. ماشي. ليه بقى؟ ليه 43 رحلة شحن عسكري؟ وليه مش نازلة في الخليج؟ الظاهر تفسير تفسير الظاهر كده إن أمريكا. أنت بتنقل منظومات دفاع جوي لأمريكا. بتاخدها من كوريا الجنوبية وبتاخدها من اليابان وبتعمل عليها تعديلات معينة قبل ما تدفع بيها للشرق الأوسط. ده اللي أنا قدرت أفهمه. يعني. وقال لك أكتر الشحنات دي 43 رحلة. ماشي. تمت عن طريق السي 17. سي 17 دي طيارات نقل شحن عسكري تقيل. ماشي. وقال لك إن في رحلات برضه تمت بالسي 5 إم. وسي 5 إم دي أثقل وطيارة استراتيجية أتقل من سي 17. و يعني بيتكلموا إن الظاهر كده بيتم نقل منظومات دفاع جوي قبل ما يتم دفع بيها للدول الخليجية. فده أمر. أنا بس اللي واقف عنده إن والله لو دونالد ترامب هيضرب إيران ويضرب منشآت الطاقة في إيران. أنا بس متوقف. متوقف إن إيران ما تردش في محطات تحلية المياه. لأن لو ردت في محطات تحلية المياه زي ما هو باين على فكرة إن في بعض الأخبار اتكتبت كده. لو إيران ضربت محطات تحلية المياه في الخليج بالذات تبقى مشكلة كبيرة جداً أكبر ما أنت ممكن تتخيل. يعني بص لو إحنا بنتكلم على محطات طاقة. إحنا نتفهم. ماشي. كهربا وبتاع. ممكن مصر بتتكلم على نفط وغاز. هتفهمها. مطارات. هتحتفل. كله. كله. ماشي. فهي دي القصة. فاهم حاجة؟ إسرائيل ما تروحش تضرب محطات الميه عشان تخلي دول الخليج تخش الحرب. أهم حاجة في الموضوع ده كله ومدى سيطرة ترامب على إسرائيل إنها تقومش بالعملية دي. وما تنساش إن إسرائيل من مصلحتها إن الخليج تخش الحرب بأي شكل.

بمناسبة، أنا بس عاوز أكد على. طيب، الكويت بتعترض صواريخ دلوقتي. بيتم إطلاق صواريخ. ماشي. طيب، دونالد ترامب كان بيتكلم لمذيع. فبيقول له يعني عباس عراقجي قال إن ما فيش مفاوضات وإن إيران لن تخضع لـ يعني. لن ترتخ. يعني التهديدات بضرب محطات الطاقة. فدونالد ترامب قال له إيه؟ قال له: "هنشوف". "هنشوف إيران تستسلم ولا لا". أنا ما أعرفش هو هيعمل إيه. أنا مش عارف هو هيعمل إيه. بس توقع أي حاجة من راجل. طيب، إحنا يا جماعة النهارده بنتكلم على الموجه 75 من الصواريخ الإيرانية على إسرائيل. ماشي. مشكلة إسرائيل إن كل شوية عمال يقع لها ضحايا. ماشي. فده أمر وقف عنده. لأن على فكرة إسرائيل ما اتصاب لهاش ضحايا بالكم ده كله في حرب الـ 12 يوم.

طيب، صحيفة أحرنوت بتقول إن المسؤولين الإسرائيليين رافعين المستوى بيقولوا إن في تحرك دولي واسع بيحصل حالياً خلف الكواليس من قبل قطر وتركيا ومصر لمحاولة التوسط في اتفاق بين الرئيس الأمريكي ترامب والإيرانيين. على فكرة الخبر ده أنا كنت قلته الصبح. بس هو يعني كاتبينه بـ يعني طريقة تانية. وبيقولوا إن أحد الاحتمالات هو التوصل اتفاق في اللحظة الأخيرة. يعني هو اللي عاوز يقوله لك إيه؟ إن ترامب قبل ما ينفذ هجوم اللي بعد 24 ساعة ده متوقع إن إيران تستسلم أو إنها تقبل الست شروط اللي هو فرضها عليه. خلاص. لو الـ 24 ساعة خلصوا ما تتوقعش الوصول لصفقة. أو ده اللي أنا أقدر أفهمه من المقالة. وترامب عامل المهلة دي مخصوص مش عشان هو منتظر تحرك عسكري. هو منتظر إن إيران ترد بإيجاب أو تقول فتح التفاوض. عاوز يمشي. بس صدقني اللي إحنا واصلينه ده كله ده يعني نتيجة سوء تخطيط كبير جداً من قبل الرئيس الأمريكي والجيش الأمريكي. وده اللي أنا واقف عنده. لأن أنا على ثقة الناس دي لو هي مخططة كويس ما كناش وصلنا للي إحنا فيه ده. عايز أقول لك إن طهران عمالة تضرب يعني بشكل هستيري.

طيب، صحيفة فاينانشال تايمز كانت بتتكلم إن الميه بالنسبة لدول الخليج شيء كريتيكال أو خطير أو حساس أو مهم. وإن ده أكبر درجة من المخاطر الخليج خايف منها دلوقتي إن إيران ترد في محطات تحلية المياه الخليجية. ماشي. وده وفقاً لوكالة اسمها يو كيه إم تي أو. يو كيه يعني بريطانية. إم تي أو بقى مش عارف إيه. آه. هي وكالة تابعة للبحرية الملكية البريطانية. إن مستوى التهديد الإقليمي يعني وصل لأعلى مستوى ليه. وهو مستوى حرج.

عامه أنا أرد على أسئلة. لو أنت عاوز ضربوا الكهرباء في إيران. بص كل يعني أنا ما أعرفش هم ضربوها دلوقتي ولا لا. بس أي ضربة قبل 24 ساعة مش هي دي اللي هم بيتكلموا عليها. يعني لو ضربوا محطة كهرباء مش هي المحطة الأساسية. ترامب بيتكلم على أكبر محطة كهرباء في إيران اللي هي أبو شهر. هي دي اللي هيبتدي بيها بعد 24 ساعة. لو ضربها إيران كلها هتضلم. لأن خلي بالك إيران انضرب عندها المنشآت في عقل بارس الجنوبي خلاص. فلو ضرب أبو شهر إيران ما عندهاش طاقة. وهو عاوز يعمل كده عشان إيران ما تعرفش تنتج صواريخ. لأن إنتاج الصواريخ يتطلب طاقة. فهو عاوز يعمل نفس اللي بيعمله في أوكرانيا. آه. يو كيه مارين تريد أوبريشن. صح. أنا مش ملاحق على الكومنت. أنا أتوقع كده إن أمريكا هتدخل أسلحة جديدة في الحرب. خلي بالك هو دونالد ترامب بقى له فترة عمال يلمح كده إن مش كل الأسلحة الجيش الأمريكي يستخدمها في إيران. ماشي. وإني ده. لأن ترامب كان فاكر إنها نزهة. ثاني حاجة. لأن هو شايف إن يعني الروس والصينيين شغالين الله ينور يعني فاتحين الأقمار الصناعية بتاعتهم ترصد كل حاجة. فهو مش عاوز يظهر أسلحة جديدة. بس لو ترامب مش عارف يطلع من الحرب هيستخدم الكل في الكل. هيضرب كل حاجة حتى لو أسلحة ماتشفتش قبل كده. هيضرب. ماشي. لأن هو عاوز يمشي دلوقتي.

ماذا عن أوكرانيا؟ والله بص هقول لك حاجة. هو أوكرانيا في انتقادات كبيرة جداً ليها. لأن والله أوكرانيا ما بتعملش أي حاجة. عمالين بس يتكلموا يقول لك إحنا هنساعد دول الخليج. هنبعت مسيرات. هنبعت خبراء. يعني هم حتى تقارير بريطانية بيقول لك الأوكرانيين بيلموا فلوس. إنما مش جايين عشان يحاربوا فعلاً. ماشي. أما الروس فهم بيعدوا. يعني حالياً الروس ماسكين روزهم كده عاملين يعدوا. ما لهمش أي حاجة خلاص. واضرب يا إيراني. ويدي الإحداثيات بتاعة الهدف لإيران. وإيران تضرب. هو عمال يعد فلوس. وعلى فكرة روسيا دلوقتي في طلبات جت لها من أوروبا عشان صفقات نفط. عاوزين يشتروا منهم نفط. قالوا لا. كل نفط هيتم تلبية طلبات الصين الأول. وبعد كده الدول الصديقة. وبعد كده نشوف أوروبا. نشوف قد إيه. والله بص هو ترامب لحد دلوقتي ما استبعدش الخيار النووي. بس أنا بقول لك إن الموضوع بالنسبة لي صعب. بس هو ترامب ما استبعدش. ما قالكش استحالة يضرب. وخلي بالك إن دونالد ترامب الراجل اللي قال لك إسرائيل ما تضربش محطات الطاقة. هو اللي هيضرب محطات الطاقة بعد 24 ساعة. ماشي. قال لإسرائيل: "أوعى تضربي مع أي محطة طاقة". هو نفس الراجل اللي هيضرب أكبر محطة طاقة في إيران. والله كلام ترامب إن مش هتصمد. أو مش هتعرف تصمد بعد الضربة اللي هو عايزها. لو إيران صمدت ما أعرفش هيبقى مشهد معقد. وخلي بالك إحنا مش ماشيين وفقاً لسيناريو محطوط أو كتاب متألف. كيف تحارب؟ خطط كلها ما فيش خطط. هو كل واحد بيصعد على كيفه. تعرفش إيه المنطق. مش عارف أقول لك إيه.

الصين ما بتبعتش صواريخ. الصين بتبعت مكونات صواريخ زي ما بتعمل مع روسيا بالظبط. يعني عاوز أقول لك إن الاتحاد الأوروبي كان على قناعة تامة إن الصين بتاعة روسيا. بس مش عارفين يعملوا إيه. الصين ما بتبعتش أسلحة تامة الصنع للروس. بعتوا لهم مكونات. فعشان كده الاتحاد الأوروبي لما جه يفرض عقوبات على الصين ابتدوا يفرضوا عقوبات على الشركات. لأن ما فيش ما فيش سلاح. فده نفس اللي بيحصل مع إيران بس في المستخبي بقى. الشحنات بتيجي من طاجيكستان. شحنات إنسانية. بس هي مش كلها إنسانية. بيبقى فيها مكونات أسلحة رايحة للحرس الثوري.

طيب، عامة أنا مش هطول عليكم أكتر من كده. أتمنى إن يعني نفضل عرب جبهة واحدة. حالياً إحنا كلنا بنحارب. مصر بتحارب اقتصادياً. الخليج بيحارب أو في وضع دفاعي عسكرياً لحد ما يتخذ إجراءات أكثر تصعيداً ضد إيران. السعودية فتح المجال الجوي للطائرات الأمريكية. فتحت قاعدة الملك فهد للأسطول الأمريكي الجوي إن هو ينزل في قاعدة الملك فهد. بتطلب اجتماع عاجل مع وزراء خارجية مصر والسعودية. مصر وتركيا وباكستان. الظاهر كده هيكون في إجراءات. بس كل الموضوع مترتب على 24 ساعة. هننظر فيها دونالد ترامب هيضرب إيران إزاي. أو الرهان بتاع ترامب إن بعد 24 ساعة أو بعد الضربة اللي هينفذها ترامب إيران هتستسلم. ماشي. فهنشوف إيه اللي هيحصل. متشكر لكم ومتشكر جداً على متابعاتكم اليومية. وعلى فكرة ناس كتيرة بتكتب تقول لي يعني إن اللايف كويس. فشكراً لكم جداً. ويا رب أكون عند حسن ظنكم. وأشوفكم على خير إن شاء الله. سلام.