كيف تبني الصلابة الذهنية؟ | القوة الذهنية | دوباميكافين+

صديقي الجميل، من أغرب الأشياء التي نعيشها في زمننا الحالي هي أننا في هذه الأيام نعيش حياة أفضل بكثير من أجدادنا والأزمنة والعصور السابقة. والأغرب أننا مصابون بالاكتئاب والاعتلالات النفسية والاضطرابات النفسية والأحزان أكثر منهم. والأهم من هذا كله أننا فقدنا جزءًا كبيرًا ولا نزال نفقد الصلابة الذهنية.

يعني على سبيل المثال، إذا بعطيك مثال بسيط جدًا، وهذا ينطبق علي أنا شخصيًا: لو خليتك تتصور معيشتك أنت قبل 1000 سنة من اليوم. شفت لما نتابع مثلًا أفلامًا أو مسلسلات تتكلم عن الحقب التاريخية القديمة؟ بالله عليك يا صديقي الجميل، هل يمكنك أن تتصور أنك ممكن تستيقظ في الشتاء القارص وتستحم بمياه تكاد تكون مجمدة، باردة جدًا؟ ليش؟ ما في سخانات! والله ممكن تسخن مويه عن طريق الجمر، أوكي ما عندي مشكلة، لقيت لك مهرب.

خذ المثال الثاني: تقدر تقوم وتمارس أعمالك اليومية الشاقة من أول النهار لين آخر الليل في عز الصيف والحر والقايلة، ولا في لا مكيفات ولا ثلاجات؟ يا صديقي الجميل، تقدر تتصور معيشة بهذا الشكل؟ إذا قلت لي "إيه"، بقول لك يا رجال خلنا نكون صادقين أنا وياك. أنا وياك يا رجل لو انقطعت الكهرباء نص ساعة ما عرفنا نعيش! ليه؟ لأننا عايشين على الجوالات والأجهزة، بمعنى لو قطعت عني الجوالات والأجهزة ما راح أقدر أعيش.

لو أقول لك بسفرك أجمل دولة في العالم وبخليك تعيش في كوخ ما فيه لا إنترنت ولا نقاط تواصل ولا أي نوع من أنواع التقنية الحديثة ولا حتى كهرب، كيف ممكن تعيش؟ بتعيش؟ في بعضنا بيستمتع، أنا يمكن من المهووسين بالأجواء هذه ممكن أستمتع، لكن ممكن أستمتع بها يومين، أسبوع، يا عمي شهر، لكن أكثر من كذا لا، الموضوع جدًا متعب. تخيل بس أنك تتنقل في المدينة يا صديقي العسل بدون تطبيق خرائط! تخيل أنك كل مكان تبغى تروح له ما تعرف له، تقعد تسأل 70,000 واحد! الموضوع صعب، لا نكذب على بعض، جدًا صعب.

حياتهم كانت أصعب ولكن كانوا يتمتعون بصلابة ذهنية أقوى، وهذا هو السر الذي يتكلم عنه الكتاب اليوم. الكتاب اليوم اسمه "كتيب القوة الذهنية" للمؤلف دايموند زهرايدس زهارس، هم اثنين. والله يا صديقي الجميل اسم الثاني صعب، بس عمومًا أن أوريك إياه، هذا هو. يلا عاد ما أدري شو اسمه، زهرايدس زهارديس، اللي هو هو والنعم فيه. فخلنا ندخل في شرح الجزء الأول من كتيب القوة الذهنية.

[موسيقى]

السلام عليكم ورحمة الله وبركاته، أهلًا بك يا صديقي الجميل في برنامج "الفصل الأول من دوفا ميكافين" معكم ناصر عقيل، يا أهلًا وسهلًا تشرفنا. فكرة البرنامج أننا نشرح الفصل الأول من كل كتاب، وأحيانًا نزيد على ذلك. فإذا عجبتك فكرة البرنامج تقدر تشرفنا باشتراكك، الموضوع بسيط يعني.

شوف، أفضل من تكلم عن صراحة يعني بصراحة من وجهة نظري الشخصية، أفضل كتاب قرأته عن الصلابة الذهنية كان كتاب "لا يمكن إيذائي" للمؤلف ديفيد جاجنز. يا عفو الله، ذاك الكتاب كان أسطوري! وسبحان الله قبل لا أشتري هذا الكتاب بيوم تابعت مقطع لديفيد جاجنز، يمكن هو اللي حفزني أصلًا أشتري هذا الكتاب يوم شفته على الرف. كان يتكلم فيه عن الصلابة الذهنية يقول: "أنا أصبحت مهووسًا بأن أكون الرجل الأكثر صلابة على الإطلاق في العالم". يقول: "أنا خلاص أنا كذا صرت مهووس إني أنا أبغى أصير أرجل الواحد فيك يا الكون" كذا وكررها "أوبسيست، أوبسيست" يقول مهووس. وبعدين برر موقفه قال: "أنا صرت مهووس بموضوع الصلابة الذهنية لأن عندي يقين إني إذا كنت صلب جدًا أقدر أحقق أي شيء أنا أبغاه، أي شيء ممكن يخطر في بالك يا صديقي الجميل بمشيئة الله طبعًا، بعد مشيئة الله أقدر أحققه إذا كنت صلب ذهنيًا".

نقطته قد يتفق معها الكثير وقد يختلف معها الكثير، لكن أنا من الناس اللي يتفقون معاه. أشوف أنا من عوامل يا صديقي العسل تحقيق الغايات والأهداف في الحياة هو أنك تكون صلب ذهنيًا. وأنا أعلمك ليش، ليش أنا اللي أعلمك؟ خلنا نخلي مؤلف كتابنا اليوم يعلمك ليش. طبعًا هو في الجزء الأول قال: "أول شيء بعرف لك أنا ش الصلابة الذهنية، يعني بنعرفها بشكل سريع، وبعد كذا راح أعدد لك عشر فوائد راح تحصل عليها إذا كانت عندك صلابة ذهنية قوية". وهذا اللي أنا جاي أعلمك إياه في هذه الحلقة. طبعًا هو للأمانة يعني ذكر أشياء كثيرة غير هالموضوعين، حتى ذكر السمات، سمات الأشخاص، الأشخاص اللي يتمتعون بالصلابة الذهنية. فخلنا نشوف إذا كان عندنا وقت في هذه الحلقة قلناها، إذا ما عندنا وقت نقولها في الحلقة اللي بعدها عادي، الموضوع بسيط.

قبل لا أعلمك ليش كلمة ديفيد جاجنز صحيحة من وجهة نظري أنه فعلًا الصلابة الذهنية راح تخليك تحقق أي شيء أنت تبغاه أو تساعدك على الأقل في تحقيق أي شيء أنت تبغاه، خلنا نتكلم عن ش الصلابة أصلًا. شوف يا عسل، ما راح أصدع راسك وأطول عليك الكلام، باختصار الصلابة الذهنية هي كالتالي: هي الثبات الانفعالي لذهنك في أحلك الظروف والمواقف اللي تواجهها في الحياة. باختصار ما أبغى أصدع عليك كثرة قرقرة وكلام.

عكس الصلابة الذهنية عشان يتضح لك المفهوم هي الهشاشة الذهنية. تعرف اللي مثلًا مثلًا شوف بقول لك شيء، بقول لك شيء أنا وياك سبق وحطينا أهداف صح؟ أنه والله أنا السنة هذه بحقق الشيء هذا أو على الأقل الشهر هذا راح أحقق الشيء الفلاني. تبدأ بالصلاة على النبي أحسن وتحاول تطبق الخطوات وصولًا للهدف اللي أنت تبغاه، وبعدين شوي تكتشف أن الحياة كل يوم تعطيك صفعة، أوب مصيبة يمين، أوب مصيبة يسار، هوب عائق يمين، هوب عائق يسار، ويستمر الحال زي كذا. تحس أننا تحس أننا يعني كأنك ماشي في طريق وقاعدين في ناس كذا بس يحاولون يعرقلونك. فلما نجيب شخصين واحد عنده صلابة ذهنية والثاني عنده هشاشة ذهنية، صاحب الصلابة الذهنية بيعدي كل هذه العقبات لأن عقله وذهنه صلب، شخصيته صلبة، ومهما حاولوا إيقافه راح يواصل عشان يوصل الشيء اللي هو يبغاه. فتلقاه يتطور في هذه الرحلة مع الوقت ويتعلم مع كل عقبة. أما الشخص اللي عنده هشاشة نفسية مع أقرب وأطرف عائق يسقط على طول، على طول. هذه من أبرز صفات الصلابة الذهنية.

فالآن خلنا ندخل في العشر فوائد اللي ممكن تعطيك إياها الصلابة الذهنية.

الفائدة الأولى: مقاومة أكبر للانفعالات والعواطف السلبية. يا أخي بالله علمني يا صديقي الجميل، من منا اليوم ما تجاوز عمر الـ 20 سنة وما انصدم بخيبات أمل ومشاعر سلبية كثيرة؟ علمني إذا أنت من الأشخاص اللي تعدوا الـ 20 سنة وما واجهت في حياتك خيبات أمل كبيرة ومشاعر سلبية كبيرة وصدمات من أشخاص أو أشياء، بالله اكتب لنا في التعليقات نبغى نحتفل فيك ونقول لك ما شاء الله تبارك الرحمن الله يزيد عليك من واسع فضله يا رب العالمين. لكن كلنا تقريبًا يتعرض لمواقف فيها خيبات أمل قوية جدًا ومشاعر سلبية قوية جدًا. فقدان أشخاص، أخوياك يغدرون فيك، مدراؤك، زملاؤك، أيًا كان. الحياة بشكل عام فيها كثير من المواقف هذه. الصلابة الذهنية هي اللي بتخليك تكون صلب جدًا وتعدي هذا الموقف عادي، ممكن تتأثر فترة بسيطة بعدين تقول: "حبيبي أنا أقوى من هذا الموقف السلبي، أنا أقوى من خيبة الأمل هذه". يعني شفت الناس اللي يكتبون "كيف نتخطى" في السوشيال ميديا؟ الصلابة الذهنية تخليك تتخطى حرفيًا. فهذه الفائدة الأولى: تقدر تتجاوز مشاعرك السلبية بقوة إذا كان عندك صلابة ذهنية قوية.

الفائدة الثانية: تحسين القدرة على الأداء. إيش دخل الأداء في الصلابة الذهنية؟ لا بعلمك ليش. شفت أنا مرة مقطع محاكاة كذا سيموليشن، جايب لك مجموعة من الحيوانات وقاعد يقول لك كم منهم بيقطع أول 100 متر بسرعة، ما أدري أول كيلو بسرعة وهكذا، وحاط لك الأسد والفيل والنمر والفهد والتمساح، أتوقع أنه ممكن يكون مر عليك المقطع هذا في برامج التواصل الاجتماعي، يعني مقطع ما أدري عن دقته ومصداقيته لكنه مثير للاهتمام. فالمهم بدأ يعرض لك هو قال لك الفهد يقطع هذه في ما أدري كم دقيقة وهذه يقطعها ما أدري في كم ثانية وهكذا يعني. بعدين جاب الإنسان حط الإنسان آخر واحد، أنا ضحكت يعني قلت يعني أوكي شوف الإنسان يعتبر سريع، أسرع من كثير من المخلوقات، لكن بالنسبة للـ خلنا نقول الحيوانات المفترسة حيعتبر بطيء جدًا يا صديقي العسل. سيد قشطة، فرس النهر أسرع منك بمراحل، الدب أسرع منك بمراحل، سرعات فائقة. أنا بخلي شباب الإنتاج يكتبون سرعات الحيوانات هذه اللي أنا أقولها، سرعات فائقة لا تقارن سرعة الإنسان فيهم. ولكن الصدمة، ركز على الصدمة هذه: الإنسان كان المخلوق الوحيد اللي استطاع أن يجري عشرات الكيلومترات، هو الوحيد اللي عنده استعداد يجري لمسافات ماراثون، مسافات طويلة.

يعني على سبيل المثال، خلنا نفرض أن في أسد يلحقني في السافانا الأفريقية زين، بعيد الشر عني وعنك يعني، ولنفرض أن الأسد يبعد عني نص كيلو. الأسد إذا جرى بأقصى سرعة له أو بسرعة يعني مش أقصى سرعة اللي هي الجري مرة لكنه يجري يركض ران مش سبيد ران لا رن، وأنا برضه كذلك أجري مش بالسرعة القصوى سبيد ران لا جري جري الماراثون. تخيل يا صديقي الجميل أن الأسد بيتعب وبتنهار قواه قبل لا يوصلني، وأنا راح أستمر أركض لساعات وساعات بل وأيام! لك أن تتخيل! ممكن تقول أيام مستحيل! لا لا مو مستحيل، ديفيد جاجنز كان يركض لأيام. كل اللي يشاركون في سباقات الماراثون عندهم القدرة يجرون لأيام، أيام يا صديقي، أيام سلام عليكم يوم الأحد أهلًا وسهلًا الاثنين تخيل! هذا ما يتميز به الإنسان وعشان كذا كان ينجو لما كان يعني يعيش في تقريبًا وما كان في محميات وما كان في مدن بعيدة عن الحيوانات وهكذا. عنده استعداد يجري لأيام. ش اللي يخليه يجري لأيام؟ مش سرعته، هو الأبطأ بين الحيوانات المفترسة طبعًا، ولكن قوة تحمله واستمراريته. هذا الفرق يا صديقي الجميل هو اللي تجده بين التحفيز والثبات والاستمرارية. اللي عنده تحفيز يتحفز عشان ينجز المهام لما يكون عنده طاقة ومود حلو، لكن اللي يتمتع بالصلابة الذهنية ينجز المهام حتى وهو كاره لها، تخيل! عشان كذا بيفرق معك، بتقوم كل يوم تؤدي أعمالك وتسعى نحو هدفك رغم كل الظروف حتى لو كنت كاره لهذا الشيء، حتى لو كان مودك سيء، حتى لو كنت أصبت ببعض الصدمات مؤخرًا، ستستمر لأن عندك صلابة ذهنية. فالصلابة الذهنية تحسن الأداء أكثر بكثير من التحفيز. مو عشان كذا ديفيد جاجنز يوم كنا نتكلم عن ذيك السلسلة "لا يمكن إيذائي" كان يقول: "أنا أروح للنادي بدون سماعات، أنا ما أحتاج أغاني تحفزني، لا لا لا، أنا لازم أتعلم كيف أتمرن من دون محفزات عشان أتمرن بقوة صلابتي الذهنية فقط، إني أنا لازم أتمرن". أنت الموضوع حمسني أروح للنادي. عمومًا هذه الفائدة الثانية.

الفائدة الثالثة: الثقة بأن الظروف سوف تتحسن. ترى على فكرة والله يا صديقي الجميل أنا قابلت أشخاص كثير يعيشون يعني هالة من السلبية والتشاؤم. إذا مر بموقف تلقاه خلاص يعني يقول مثلًا مثلًا: "أنا مليت ما عاد أبغى أكمل جامعة لأن ما عندي سيارة ولأن مثلًا والله فقدت فلان ولا أبوي ولا ما عندي أحد يصرف علي وهكذا يعني". فتلقاه من كثر المشاعر السلبية هذه يفقد الأمل أصلًا. ودائمًا أذكرهم يعني إذا حصل لي فرصة أقول له: "اسمعني وأذكرك أنت وأذكر نفسي أيضًا، ارجع لشريط حياتك للوراء، ستكتشف أن الحياة ما كانت سهلة بالنسبة لك في الأيام الماضية ولا في السنوات الماضية، ودائمًا تذكر أن الظروف القاسية عدت". ارجع ارجع بالله ارجع لأحلك الأيام، أكثر الأيام تعاسة لو تتذكرها بتقول: "أنا كنت عايش مواقف ما كنت متصور أنها بتنحل، مرت علي مشاكل ما كنت مصدق أبدًا أنها ممكن تنحل". أبشرك يا صديقي الجميل، طالع نفسك اليوم، انحلت وعدت. طب في بعضها ما انحل؟ حينحل، بينحل يا صديقي الجميل، بتنحل هذه المشاكل وبتعدي الحياة وتستمر الحياة، والله الحياة ما توقف لا على موقف ولا على أحد والله العظيم. الصلابة الذهنية هي اللي تخليك دائمًا ترى أنه في نور في نهاية هذا النفق، وتبدأ خلاص تتقبل المشاكل، العقبات بالنسبة لك تشوفها ولا شيء، إيه فترة وتعدي. خلصنا هذه الفائدة الثالثة.

الفائدة الرابعة: قدرة أكبر على إدارة مشاعر التوتر. شوف بقول لك شيء، أنا في حياتي في حياتي شوف حياتي كلها كلها ما عمري وصلت لدرجات من التوتر أعتقد يعني يعني إذا ما كانت خانت الذاكرة ما عمري وصلت لدرجات من التوتر زي الدرجات اللي قاعد أعيشها الأيام هذه، شيء مو بطبيعي يا صديقي الجميل. طبعًا لا الحمد لله يعني الأيام هذه أفضل بكثير من الأيام اللي قبل يعني شهور، لو ترجع بالشهور اللي ورا يا ساتر يا التوتر، يا ساتر التوتر باني يا صديقي الجميل في لغة جسدي في مودي في سواليفي بكلامي حتى على شكلي تخيل! حتى على مظهري بان التوتر، كانت الناس تقابلني تقول: "أوه ناصر إيش فيك؟ عسى ما شر؟ ش صاير؟ مريض؟ تعبان؟" شيء مو بطبيعي. فأنا أحتاج هذا الكلام أكثر من أي شخص ممكن يتابع هذا الفيديو، لا في ناس عايشة توتر أكثر مني معلش يعني. لكن الصلابة الذهنية بتخليك تعرف كيف تتعامل مع التوتر. إحنا يا صديقي الجميل التوتر هو اللي يخلينا نروح نمارس بس أفعال خلنا نقول أو عادات سيئة جدًا عشان نتخلص من هذا التوتر، وهو اللي يخلينا نقع في الإدمان، إدمان أي شيء، أفلام، مسلسلات، ألعاب، أشياء زينة، أشياء شينة، أيًا كان، إدمان حتى لو إدمان سوشيال ميديا ترى التوتر هو اللي خلينا نروح هناك. ليه؟ لأننا ما نعرف كيف نتعامل معاه، وأنا قلت لك بنتكلم عن التوتر بنجيب كتب كذا وبنشرحها بالتفصيل عن التوتر لأن من أكثر الأشياء اللي لعبت دور كبير جدًا في صحتنا البدنية والذهنية ترى على فكرة يعني. لأننا ما نعرف كيف نتعامل معاه نحاول نهرب منه، ما نحاول نعالجه ونصلحه أو حتى نتقبله. صار منا أشخاص كثير يا صديقي الجميل ينحاش من المسؤولية، ليش؟ لأنه ما عنده القدرة أنه يتحمل هذا الكم الهائل من التوتر. "أشيل مسؤولية بيت وأشخاص ويعيشون على رقبتي؟ لا الموضوع صعب، خليني أعيش عزابي لحالي الأمور تمام، التوتر اللي أنا فيه يكفيني". شفت يا صديقي الجميل هذه من الهشاشة النفسية.

الفائدة الخامسة: قابلية أقل للشك في الذات. اللي عنده صلابة ذهنية لما يمر بمواقف جدًا سلبية وصعبة ما يشك في نفسه، يقول: "هذه مواقف وبتعدي". لكن اللي عنده هشاشة نفسية أو صلابة ذهنية أقل أول ما يمر بعقبة عقبتين أو يفشل فشل فشلين يقول: "شكلي أنا ما عندي القدرة إني أحقق هذا الشيء". شفت شلون؟ هذا فرق هائل والله فرق هائل في العقلية يا صديقي الجميل، فرق هائل. عاجبني الكتاب أنا، خفيف لطيف ما فيه قرقرة واجدة، تخيل نقاط كذا سريع واحد اثنين ثلاثة ولا بيبو بالإشارة يفهم. فلما يكون عندك صلابة ذهنية تكون عندك ثقة أكبر، ما تشك في نفسك كثير أنك هل أنت عندك القدرة تحقق هذا الشيء ولا لا؟ لا، يكون عندك ثقة في نفسك أنك قادر على تحقيق هذا الشيء وأقدر أعدي هذه العقبة. شوف أنا ممكن أقول لك كلام تقول: "ناصر بديهي"، صدقني في ناس كثير الكلام هذا لا يجول في عقلها. أنا من الناس اللي إذا قابلني أي شيء صعب عنادي يا صديقي الجميل وشخصيتي الحمراء تقول: "لا بعديه". عناد مير مو أنا ما عاد أبغى أوصل للهدف مير بعديك أنت فاهم شلون؟ لكن في ناس كثير تحتاج هذا، تخيل أنها في ناس كثير الحديث اللي يدور بينها وبين من عقله يكون سلبي وتشاؤمي وفيه شك في الذات أكثر من الثقة بالنفس. الصلابة الذهنية تعطيك ثقة بالنفس أعلى.

الفائدة السادسة: المزيد من الوضوح حول أهدافك ودوافعك. هذه الصلابة الذهنية ترى اللي عنده صلابة ذهنية أقل أو هشاشة نفسية يكون متشتت دائمًا، ما يعرف هو ش يبغى ولا يعرف يثبت على شيء هو يبغاه، ما يعرف تلقاه متذبذب متشتت. وكلنا نعاني من هذا الشيء في كثير من جوانب حياتنا على الأقل، ممكن مو في حياتنا كلها بس يصيبنا بعض الريب في بعض الأمور والأمور والتشتت كذا يعني تحس أنك حاير ما أدري إيش تبغى. الصلابة الذهنية تقول لك: "حبيبي أنا إيش أبغى؟ أبغى كذا وبثبت على هذا الشيء، انتهى الموضوع". حتى لو أموت وأنا ما حققته أهم شيء إني كنت ثابت على موقفي ودائمًا عندي إصرار إني أوصل له. ترى والله عشان كذا الناس تنجح صدقني، يعني عطني شخصية واحدة ناجحة ما تتمتع بصلابة ذهنية، أتحداك يا صديقي الجميل، عندك التعليقات يلا ورنا ورنا أبدأك.

الفائدة السابعة: اكتساب الجرأة والشجاعة. أكيد، بالله واحد عنده صلابة ذهنية وواحد عنده هشاشة نفسية، من تعتقد أشجع من الآخر؟ يحتاج أقول لك؟ ما يحتاج أقول لك، خلصنا.

الفائدة الثامنة: القدرة على تقبل الفشل والتعلم منه. أنا قاعد أقرأ كلام ممكن بالنسبة لي ولك يعتبر بديهي جدًا أننا نتقبل الفشل، لكن أبغاك تنتبه لنقطتين مهمة: واحدة هو أننا ممكن نكون نؤمن بأن الفكرة هذه صحيحة لكننا في الواقع لا نتقبل الفشل، ما نتقبل أننا نخسر شخص أو نخسر شركة أو نخسر مشروع أو نخسر حتى في مباراة، مباراة كرة قدم. صدقني في ناس كثير منا وأنا من ضمنهم أكون مؤمن بأن الكلام هذا صح بس على أرض الواقع لا أطبق عكسه. وفي ناس لا ما تؤمن أن الكلام هذا صحيح أصلًا، خلاص يرى الفشل فشل ما يتقبله. القدرة على تقبل الفشل من أكثر الأشياء اللي بتفرق في حياتك كثير، ليه؟ لأنك بتفشل في حياتك كثير، والله أكره أقول لك هذا الكلام ولكن الحقيقة أنه إذا أنت أردت النجاح فتأكد أنك ستفشل أكثر بكثير من النجاح صدقني. فلازم تعرف كيف تتقبل الفشل. الصلابة الذهنية تخليك تتقبل الفشل عادي، شو المشكلة؟ فشل ويسولف عن الفشل حقه بكل فخر لأنه يتعلم منه ويتطور منه.

الفائدة التاسعة: وهذه حلوة، قدرة أكبر على تأخير الرغبة في الشعور بالإشباع والله المستعان. هذه حلقة يا صديقي، هذه شفت النقطة ذي؟ هذه حلقة كاملة. يا ساتر يا العصر اللي إحنا نعيش فيه يا صديقي الجميل، كل واحد فينا يفكر كيف يعيش بالمتعة والإشباع بأقرب وقت وأسرع وقت ممكن. وطبعًا العالم اللي إحنا نعيش فيه مصمم أنه يعطيك الإشباع بأسرع طريقة ممكنة. عرفت ليش أنا وياك نفشل في تحقيق الأهداف طويلة المدى؟ لأننا نبحث عن النتائج السريعة والإشباع السريع. والأهداف طويلة المدى تبغى طول بال، تبغاك تكون طويل بال، تبغاك تأجل الفرح والمتعة بعدين. تمسك فلوسك اليوم عشان تستمتع فيها أكثر غدًا بعد 15 سنة. اليوم اجلس عند أي واحد قل له: "اسمع عطني 10,000 وبعد 15 سنة برجع لك 150,000"، يقول لك: "لا شكرًا، خليني أروح بالـ 10,000 أسافر ولا أشتري لي كم حاجة أنبسط فيها وخلي الـ 150,000 هذه اللي بعد 15 سنة لك". هل معقولة أنه يكون في إنسان يوفر كل فلوسه ولا يستمتع بأي لحظة إلا بعد 15 سنة؟ لا، لكن في بعضنا عنده اتزان، يستمتع بأشياء بسرعة ويستثمر بأشياء لبعدين. هذا هو الفرق. يعني مثلًا مثلًا يكون عندك راتب تستقطع منه 10% كل شهر، نهاية السنة بيكون عندك مثلًا 120% صح؟ يعني راتبك هو شوي عليه تقول هذا اللي أنا بحاول أستثمره لـ 15 سنة قدام. في كثير مننا ما يسوي الشيء هذا، اللي ما يقدر عنده ظروف، لكن كثير مننا يقدر وأنا من ضمنهم وللأسف أطير فلوسي أشياء تافهة يا صديقي العسل، تافهة، أشري بس أشري بس. الحمد لله تعدل هذا السلوك ترى، تعدل هذا السلوك الحمد لله، وأنا قلت لك من كم سنة أموري الحمد لله عال العال مو بلأن دخلي زاد لا، لأني قللت في الصرف أكثر ولا زال فيني مشاكل أحتاج أصلحها. بس هذا هو المهم أنه أنت يكون عندك القدرة أنك ما تشبع رغبتك الآن، ما تسعى وراء المتعة اللحظية. لازم تستثمر جزء بسيط من وقت وجهد ومعرفة وعلم وفلوس وصحة وأي شيء للمستقبل البعيد. والصلابة الذهنية هي اللي تخليك تقول: "ها أقدر أستمتع الحين وأعيش كم سنة جايع وحالتي حالة"، تقدر تقول: "لا أجوع الآن عشان أستمتع بكرة، عشان أبني بيت، عشان أوفر معيشة كريمة لعيالي". هذه صلابة ذهنية يا صديقي الجميل، صلابة ذهنية أنك تتحمل الملذات وتأجلها صدقني.

الفائدة العاشرة والأخيرة: الاستعداد للتخلي عن بعض الأمور. في ناس ما عندها استعداد يا صديقي الجميل تتخلى عن كثير من الأشياء اللي هي تحبها. الصلب ذهنيًا عنده استعداد يتخلى، عنده استعداد يتخلى عن أكثر الأشياء اللي هو يحبها بس عشان أشياء أهم وأكبر في المستقبل. هذا الشخص صلب ذهنيًا يا صديقي الجميل. الصلابة الذهنية من أكثر العوامل اللي تخليك تحقق أي شيء أنت تبغاه. هذه بس عشر فوائد وأنا متأكد في فوائد أكثر بكثير من كذا.

فممكن تسألني سؤال: "ناصر كيف ممكن أصير صلب ذهنيًا؟" والله الكتاب تكلم عن هذه الجزئية الصراحة بس مو في الجزء الأول، في الجزء الثالث. فممكن ممكن نعطيك حلقة ثانية نتكلم فيها عن كيف تجعل صلابتك الذهنية أقوى. طبعًا أنا أنصحك تروح تشتري الكتاب وتقرأه لأنه خفيف لطيف، حتى هو سماه كتيب، كتيب واضح ومباشر للنقطة، ما في قرقرة حكي. 200 صفحة لو تقرأ خلنا نقول 30 صفحة في اليوم بتخلصها في 10 أيام، أقل حتى من 10 أيام، أسبوع يمكن. 10 أيام تخلص 300 صفحة، هذا 200. فعلمني يا صديقي الجميل أيًا من النقاط هذه اللي إحنا ذكرناها تحس أنك بحاجة لها؟ لأنه واحدة من التدريبات اللي هو ذكرها في هذا الكتاب قال لك: "حدد النقاط اللي أنت تبغاها أو تفتقر لها". يعني ش واحدة من النقاط والفوائد اللي ذكرناها العشر اللي تحس أنها بتفيدك في الحياة؟ اكتبها، اكتبها يا صديقي العسل. وفي الفيديو القادم إن شاء الله بنستعرض بعض النقاط اللي تساعدك في أنك تبني صلابة ذهنية أفضل واكتب اللي أنت تحتاجه تطبقها منها. أوكي.

إلى هنا يا صديقي العسل تكون انتهت جرعتنا لهذا اليوم. إذا عجبتك عطني عليها لايك وشاركها مع من تحب ولا تنسى تشترك وتفعل الجرس عشان يجيك تنبيه بصدور الحلقة القادمة. شكرًا لحسن الاستماع يا صديقي العسل، سلام.

[موسيقى]