Transcription
اللي حضرتك شايفه ده، يبقى هجوم بالصواريخ الهندية على الأراضي الباكستانية. الهجوم بدأ خلال الكام ساعة اللي فاتوا، وده بعد ما الهند أعلنت بشكل رسمي قطع المية عن باكستان. بالبلدي كده، الهند أعلنت الحرب على باكستان. اللي كنا خايفين منه حصل. الهجوم اللي نفذته الهند بتسميه بـ"عملية سندور"، وقسمته على 24 ضربة، اتوجهوا كلهم ضد تسع مواقع باكستانية.
طب والجيش الباكستاني في المقابل عمل إيه؟ أقول لك إن باكستان ما وقفتش تتفرج، ردت بهجوم مضاد نتج عنه إسقاط تسع طيارات هندية. خمس طيارات منهم طيارات مقاتلة، والأربعة الباقيين طيارات مسيرة. الطيارات المقاتلة، واحدة منهم سوخوي 30، والثانية ميج 29، والثلاثة الباقيين طيارات فرنسية. بالمناسبة، فكرة إن أي جيش في العالم يقع له خمس طيارات مقاتلة في أول ساعتين بس من الحرب، ده رقم كبير، مش قليل. خصوصًا وإن الهند ما قدرتش توقع طيارات باكستانية. يعني صحيح الاثنين حصل بينهم اشتباك جوي، وباكستان وقعت خمس طيارات مقاتلة هندية، لكن الطيارين الهنود ما قدروش يوقعوا ولا طيارة باكستانية. وده بيعكس تفوق سلاح الجو الباكستاني في الاشتباكات الجوية المباشرة.
وهنا تيجي الأسئلة المهمة: إيه اللي بيحصل في باكستان دلوقتي؟ وإيه هي الأهداف اللي ضربتها الهند بالصواريخ؟ وإزاي سلاح الجو الباكستاني قدر يوقع خمس طيارات هندية مقاتلة في ضربة واحدة؟ وهل اكتفى بإسقاط الطيارات الهندية، ولا نفذ هجمات ضد مواقع الجيش الهندي؟ يعني الهند بمجرد ما باكستان بدأت ترد عليها، طلعت تشتكي وتقول لك إن باكستان كسرت حظر إطلاق النار، وضربت لها خمس مواقع عسكرية. دي الهند اللي بتشتكي، اللي هو أنت منين رايح تضرب باكستان بالصواريخ، ودلوقتي زعلان إن باكستان بترد عليك وبتضربك؟
طيب، بعد ما نجاوب على كل الأسئلة دي، أمريكا واقفة مع مين ضد مين؟ يعني وزير الدفاع الأمريكي طلع قال لك: "احنا بندعم حق الهند في محاربة الإرهاب". فهل ده معناه إن أمريكا بتدعم الهند في الحرب؟ طب والصين موقفها إيه؟ هي كمان هتدعم الهند ولا هتدعم باكستان؟ طب اتفاقية المية اللي ما بينهم أخبارها إيه؟ اللي عرفناه إن الهند قطعت المية فعليًا وبشكل رسمي عن باكستان. وباكستان بتعتمد على المية اللي جايلها من الهند بنسبة 80% للشرب والري والزراعة. فباكستان هتعمل إيه، وهتتصرف إزاي؟ هتجيب مية منين؟ والسؤال الأهم من كل اللي فات: حجم القوة العسكرية للهند وباكستان أخباره إيه؟ مين فيهم أقوى من الثاني، الهند ولا باكستان؟ أقول لك: الله ينور عليك، هي دي الأسئلة المهمة. تعال بقى نجاوب عليها بسرعة كده.
اللي ما يعرفش الحرب اندلعت ليه بين الهند وباكستان، فاللي حصل إن في ثلاثة إرهابيين، اثنين منهم باكستانيين، نفذوا هجوم إرهابي في إقليم كشمير، وقتلوا فيه 26 مواطنًا هندوسيًا من الهند. وهنا الدنيا ولعت لسببين: السبب الأول إن الهند مش أول مرة يتقتل لها مواطنين هندوس في إقليم كشمير، والسبب الثاني إن في خناقة أصلًا بين الهند وباكستان على إقليم كشمير. كل ما يتعلق بإقليم كشمير، وأي حاجة حضرتك محتاج تعرفها عن الحرب الهندية الباكستانية، حكيناها لحضرتك في حلقة "حرب كشمير"، تقدر تتفرج عليها لو حابب تعرف كل اللي بيحصل هناك من أوله لآخره. المهم، الهند بعد ما الهجوم الإرهابي ده حصل، قالت لك إن اللي نفذوا الهجوم ثلاثة إرهابيين، اثنين منهم باكستانيين، إما إن الحكومة الباكستانية تسلمها الإرهابيين اللي نفذوا الهجوم، أو الحل الثاني وهو إني هقطع المية عن باكستان، وهعلن الحرب على باكستان. تمام، متفقين؟ فما كان من باكستان إلا إنها قالت لها: "لا، مش متفقين. قطعك للمية في حد ذاته ده إعلان حرب، حتى لو ما ضربتيش نار، فأنت بكده تبقي أعلنت الحرب. أما إعلان الحرب نفسه، فاحنا جاهزين، وصواريخنا جاهزة، وطياراتنا جاهزة، وما عندناش اكت من السلاح. شوف أنت عايزة تحاربي إمتى، واحنا جاهزين". وفعلاً فضل التوتر مستمر خلال الكام ساعة اللي فاتوا، لحد ما جت الهند من كام ساعة وقامت قطعت المية عن باكستان، وقالت لك: "أنا بعلن الحرب، خلاص كده، شكراً، ما فيش مية هتوصل باكستان من نهر السند". وبعدها بدأت تضرب الأراضي الباكستانية بالصواريخ، ضرب ضرب يعني ما فيهوش هزار. لكن ورغم كل الصواريخ اللي اتضربت دي، لأن الجيش الهندي طلع بيان قال لك فيه: "على فكرة بقى، احنا لسه ملتزمين بضبط النفس، ومش عايزين نحارب". ضبط نفس إيه يا عم؟ ده أنت بتحارب فعلاً! الحرب بدأت، أنت بتضربني بالصواريخ. فالهند قالت لك: "لا، أنا صحيح بضربك بالصواريخ، لكن بضرب مواقع تابعة للجماعات الإرهابية، بدليل إن أنا لحد دلوقتي ما ضربتش ولا قاعدة عسكرية تابعة للجيش الباكستاني". فخد بالك بقى وأنت بترد، لأن أنا لحد دلوقتي مش عايز أحارب. الهند بتقول لباكستان إنها مش عايزة الموضوع يكبر، لكن باكستان قالت لك: "ما فيش الكلام ده". باكستان هي كمان طلعت ببيان قالت لك فيه إن الهند ضربت 24 موقع داخل الأراضي الباكستانية بالصواريخ. المواقع اللي اتضربت دي صحيح ما فيش فيها مواقع عسكرية، لكنها في النهاية داخل الأراضي الباكستانية. ده غير إن من بين المواقع اللي الهند ضربتها مساجد، الناس بتصلي فيها. مجمل الضربات اللي نفذتها الهند على كل المواقع اللي ضربتها نتج عنها مقتل 12 مواطن باكستاني، وإصابة 55. نفس العدد أكدت عليه الهند، لكن وصفتهم بالإرهابيين. يعني الجيش الهندي قال لك: "والله احنا نجحنا في قتل 12 إرهابي، وإصابة 55".
المهم، بعد القذف بالصواريخ، الهند بدأت تنفذ ضربات بسلاح الطيران، بعتت طيارات مقاتلة علشان هي كمان تشتبك وتنفذ ضربات جوية. وهنا الخناقة الحقيقية بدأت، لأن سلاح الجو الباكستاني هو كمان طلع طيارات مقاتلة علشان تقابل الطيارات الهندية. الطيارات اتقابلت فوق إقليم كشمير، اشتبكت مع بعض، وكانت النتيجة هي إسقاط خمس طيارات مقاتلة من سلاح الجو الهندي، زائد أربع طيارات مسيرة إسرائيلية تراز "كوات كوبتر". دي نفس الطيارات المسيرة اللي إسرائيل بتستخدمها في حرب غزة، الهند استوردتها من إسرائيل. أما الطيارات المقاتلة الهندية اللي وقعت على إيد الطيارات الباكستانية، كانت واحدة منهم تراز سوخوي 30، والثانية ميج 29، والثلاثة الباقيين طراز رافال الفرنسية. وهنا حصلت مشكلتين: أول مشكلة إن الاشتباكات الجوية دي، ورغم كل الخسائر الهندية اللي حكيناها، إلا إن الطيارين الهنود ما قدروش يوقعوا ولا طيارة باكستانية. الطيارات الباكستانية كلها رجعت قواعدها سليمة، ما فيش فيها خدش واحد، ودي ضربة ثقيلة للجيش الهندي في أول يوم من أيام الحرب. ده احنا لسه بنرُش مية قدام المحل، أقوم أخسر تسع طيارات، خمسة منهم طيارات مقاتلة، دي فضيحة! أما المشكلة الثانية، ويمكن دي الأصعب، إن الطيارات الهندية ما اتضربتش فوق المجال الجوي الباكستاني، دي اتضربت داخل المجال الجوي الهندي. واللي حصل بالضبط، وفقًا لبيان الجيش الباكستاني، إن الطيارات الباكستانية ما استنتش الطيارات الهندية تدخل لها المجال الجوي الباكستاني، لكن طلعت قابلتها داخل المجال الجوي الهندي، أنت شفته بيقرب كده، فطلعت قابلته. الطيارات الباكستانية اشتبكت مع الطيارات الهندية، ووقعتها، وبعدها رجعت تاني لمجالها الجوي الباكستاني. حضرتك متخيل الفضيحة اللي بيعيشها سلاح الجو الهندي النهاردة؟ دي كارثة!
طيب، اللي بعده إيه حكاية قطع المية عن باكستان؟ هقول لك: الهند وباكستان بينهم معاهدة لتقسيم المية، اسمها معاهدة نهر السند. النهر ده، لو حضرتك ما تعرفش، متقسم لست فروع أو ست أنهار، منبعهم كلهم من جبال الهيمالايا، وميتهم كلها بتتقسم بين الهند وباكستان. طيب، هل الأنهار دي مهمة قوي لباكستان للدرجة اللي تخليها تعلن الحرب علشانها؟ أقول لك إن الأنهار دي بتوفر لباكستان 80% من مية الشرب والري والزراعة. يعني لو الأنهار دي اتقفلت، أو حد بس غير مسارها، باكستان هتعطش وتموت. اللي حصل بقى خلال الكام ساعة اللي فاتوا، إن الهند فعليًا قطعت المية عن باكستان، قالت لك: "اتفاقية المية اللي ما بينا دي مالهاش أي لازمة، ومن الآخر كده، ما فيش مية هتوصل لباكستان من النهاردة". الهند قطعت المية فعلاً. صحيح لسه تأثير قطع المية ما ظهرش على باكستان بشكل واضح، لكن خلال الأيام الجاية ممكن يظهر الموضوع لو استمر. باكستان حرفيًا هتموت من العطش.
طيب، باكستان بقى ردت على الكلام ده، واتصرفت إزاي؟ أقول لك إن باكستان عملت حاجة تخض. باكستان جت على الشريط الحدودي اللي بيربط الهند وباكستان، وبدأت تبني ملاجئ للسكان الباكستانيين اللي عايشين على الحدود. ده غير إنها نقلت لهم أكل وشرب وعلاجي يكفيهم لمدة شهرين. وهنا ما حدش كان فاهم هو الموضوع كبير قوي للدرجة دي؟ هي الحرب لسه مطولة لمدة شهرين؟ إذا كانت الهند بتقول إنها بتضرب مواقع الإرهابيين بس، ومش عايزة تصعد الحرب، إنتوا بقى بتبنوا ملاجئ ليه؟ ناويين على إيه؟ لسه ما حدش عارف. كل اللي نعرفه إن الهند وقع لها خمس طيارات، ده غير إن أُثر لها عدد من الجنود، لسه لحد دلوقتي ما حدش يعرف عددهم بالظبط، لا باكستان عايزة تكشف أعداد الجنود اللي أثرتهم من الجيش الهندي، ولا حتى الجيش الهندي عايز يتكلم ويكشف عن عددهم. طيب، إحنا إيه اللي يهمنا هنا في تفصيلة الجنود اللي تم أسرهم من الجيش الهندي دي؟ بعيدًا حتى عن عددهم يا سيدي، أقول لك هنا إن أسر جنود من الجيش الهندي مالوش غير معنى واحد، وهو إنهم حاولوا يخترقوا الحدود الباكستانية. وهنا السؤال: هي الهند كانت بتحاول تنفذ هجوم بري وفشل؟ الجنود اللي أُثروا في باكستان دول أُثروا إزاي وفين؟ اللي نعرفه لحد دلوقتي إنهم أُثروا داخل الأراضي الباكستانية. طب كانوا داخلين باكستان يعملوا إيه؟ ده اللي لسه ما حدش يعرفه. وهنا تفوق عسكري جديد بيحققه الجيش الباكستاني، وهو نجاحه في أسر جنود تابعين للجيش الهندي، في حين إن الهند لسه لحد دلوقتي لا قدرت تؤثر في أسر جنود باكستانيين، ولا حتى قدرت إنها تحرر جنودها اللي وقعوا في الأسر. خد بالك، دي تفصيلة خطيرة جدًا. فكرة إنك تبعت قوات خاصة لاختراق الحدود الباكستانية ده تصرف مفهوم في الحروب، لكن إن قواتك الخاصة تقع في الأسر، وما تقدرش حتى إنك تفك أسرها، وحتى تنقذها، دي كارثة تانية خالص. فالوضع دلوقتي على الأرض بيقول إن الهند خسرت خمس طيارات مقاتلة، وأُثر لها مجموعة من جنودها. خد بالك إن ممكن الأعداد تزيد بمرور الوقت، ممكن وأنت بتسمع الحلقة دلوقتي تكون حصلت أحداث جديدة، وده طبيعي لأن الحرب مستمرة، لكن اللي بنحكيه لحضرتك دلوقتي ده هو اللي حصل لحد لحظة تسجيل الحلقة.
طيب، اللي بعده: الهند سمت الهجوم اللي نفذته ده باسم "عملية سندور". طب يعني إيه سندور دي؟ أقول لك إن سندور ده مسحوق لونه أحمر مشهور جدًا في الهند، موجود تقريبًا في كل بيت هندي، لكن أهميته بتكمن في ارتباطه بعقيدة الامتلاك عند الهنود. يعني مثلًا لو واحدة اتجوزت، يجيبوا مسحوق السندور ده ويعلموا بيه على دماغها وشعرها، وبالتالي يبقى معروف إن خلاص كده البنت دي بقت على ذمة راجل، خلاص اتجوزت، وفي حد امتلكها. بالبلدي كده، بقت تخص حد غيرك، وبالتالي ما ينفعش تقرب لها، ولا حتى تفكر فيها. أيوه، بس إيه علاقة ده بالحرب اللي بين الهند وباكستان؟ أقول لك إن الهند بتقول لباكستان بالبلدي كده إن إقليم كشمير بقى على ذمة راجل، بقى ملك الهند، ما ينفعش حد يقرب له، ولا حتى يفكر فيه. وهنا بفكر حضرتك تاني إنك لو عايز تفهم اللي بيحصل بين الهند وباكستان في إقليم كشمير، هتلاقي كل اللي بتدور عليه في حلقة "حرب كشمير"، حكينا فيها كل اللي بيحصل هناك من يوم ما الحرب بدأت لحد النهاردة.
طيب، اللي بعده: هنفترض إن الحرب استمرت وكبرت بين الطرفين، الهندي والباكستاني، مين فيهم يكسب بالحسابات العسكرية؟ يعني لو حبينا نعمل مقارنة عسكرية بين الطرفين، نقول فيها إيه؟ قبل ما أقول لك الفرق ما بينهم، لازم تبقى عارف إن السلاح بالفرد، وليس الفرد بالسلاح. يعني ممكن يبقى معاك أعظم سلاح في الدنيا، أعظم سلاح في العالم، لكن مش عارف تستخدمه. في المقابل ممكن يبقى معاك أضعف سلاح في العالم، لكن قادر تستخدمه بالشكل اللي يمكنك من الانتصار في الحرب. تمام كده؟ تعال بقى نعمل المقارنة. عدد سكان الهند مليار و400 مليون إنسان، 662 مليون منهم في سن الخدمة العسكرية. ده رقم كبير جدًا، أنت بتتكلم في أكثر من نص مليار جندي. لكن عدد الجنود الفعليين في الجيش الهندي، الناس بقى اللي شايلة سلاح وجاهزة تحارب، مليون و400,000 جندي. ده غير مليون و100,000 جندي موجودين في الاحتياط. ودي برضه أعداد كبيرة بالمناسبة. أنت داخل في 3 مليون جندي جاهزين يحاربوا. سلاح الجو الهندي بيمتلك 229 طائرة حربية، من بينها 513 طائرة مقاتلة، 130 طائرة هجومية، 270 طائرة شحن عسكري، 351 طائرة تدريب، و899 مروحية عسكرية، من بينهم 80 مروحية هجومية. لو حضرتك مش عارف الفرق بين الطيارات المقاتلة والطيارات الهجومية وغيرها من أنواع الطيارات، فاحنا شرحناهم بالتفصيل في حلقة "كيف أسقط F-16"، تقدر تتفرج عليها لو حابب تعرف كل حاجة عن الطيارات المقاتلة. أما فيما يتعلق بسلاح الدبابات والمدرعات وغيرهم، فالهند بتمتلك 4200 دبابة، 150,000 مدرعة، 4000 مدفع، و264 راجمة صواريخ. أما القوات البحرية، فالهند بتمتلك 400 قطعة بحرية، من بينهم حاملتين للطائرات، بتمتلك كمان 14 فرقاطة، و13 مدمرة بحرية، و1 غواصة. طب والأسلحة النووية؟ الهند بتمتلك النهاردة 172 رأسًا نوويًا، وبتصرف على ميزانيتها العسكرية 75 مليار دولار كل سنة.
طب وباكستان؟ أقول لك إن عدد سكان باكستان 252 مليون إنسان، 108 مليون منهم في سن الخدمة العسكرية. لكن عدد الجنود الفعليين في الجيش الباكستاني، الناس بقى اللي شايلة سلاح وبتضرب نار، 654,000 جندي. معاهم في الاحتياط 550,000 جندي، يعني بتاع مليون جندي وشويه. باكستان عندها في سلاح الجو 1399 طائرة حربية، من بينهم 328 طائرة مقاتلة، و90 طائرة هجومية، و373 مروحية عسكرية، من بينهم 57 مروحية هجومية. الجيش الباكستاني بيمتلك 2627 دبابة، و18,000 مدرعة، وأكثر من 3000 مدفع، و600 راجمة صواريخ. أما الأسطول البحري، فباكستان بتمتلك 121 قطعة بحرية، من بينهم ثمان غواصات، وتسع فرقاطات، وثلاث كاسحات ألغام. طب والرؤوس النووية؟ باكستان بتمتلك النهاردة 170 رأسًا نوويًا، وبتصرف على ميزانيتها العسكرية 7.5 مليار دولار كل سنة. الهند بتصرف 75 مليار، أما باكستان بتصرف 7.5، نص مليار. وهنا طبعًا زي ما حضرتك شايف كده، فرق القوى العسكرية بالورقة والقلم مايل لصالح الهند. الهند أقوى بكثير. لكن على الأرض، معركة جوية واحدة بين الطرفين أثبتت تفوق سلاح الجو الباكستاني، قدر يوقع خمس طيارات مقاتلة من سلاح الجو الهندي في ساعتين، لا وبعدها يرجع بكامل طياراته سليمة لقواعدها العسكرية. رغم إن المعركة كلها كانت جوة المجال الجوي الهندي. يعني الطيارات الباكستانية المفروض إنها كانت تحت رحمة الدفاعات الجوية الهندية، لكن بالرغم من كده قدرت إنها تتجاوز كل الدفاعات دي، وترجع لقواعدها سليمة.
طيب، هل الكلام ده معناه إن الهند ضعيفة قدام باكستان؟ سهلة تتكسر قدام باكستان؟ الإجابة طبعًا لا. المعركة الجوية اللي حصلت دي مجرد معركة واحدة في حرب كاملة. باكستان صحيح ممكن تكون شاطرة في المعارك الجوية، عندها طيارين شاطرين يعني، لكن هتعمل إيه لو حصل لها اجتياح بري؟ هتعمل إيه لو دخلت في معركة بالدبابات؟ هتعمل إيه لو الهند قطعت عنها المية لمدة خمس أو ست شهور، أو حتى سنة؟ الموضوع كبير، مش صغير. دي مش خناقة في شارع.
طيب، حلو قوي. أمريكا والصين بقى موقفهم إيه من كل اللي بيحصل ده؟ أقول لك إن الرئيس الأمريكي ترامب صحيح طلع وقال لك: "عيب كده يا جماعة، ما يصحش كده". لكن في المقابل، وزير الدفاع الأمريكي نفسه طلع قال لك إن الهند من حقها تدافع عن نفسها ضد الجماعات الإرهابية. ده غير إن الجيش الهندي نفسه طلع أعلن بنفسه إنه بينسق تفاصيل الحرب كلها مع الجيش الأمريكي. يعني الهند بتتصل على أمريكا تقول لها: "والله أنا هضرب باكستان بالصواريخ، هضربها بالطيران، هخترق أراضيها وهكذا". ده تصريح رسمي من الجيش الهندي نفسه، هم اللي بيقولوا إنهم بينسقوا مع أمريكا، وده معناه إن الجيش الأمريكي متورط في الهجمات اللي بتتنفذ ضد باكستان، أنت عارف وموافق، وبتدعم بحجة إيه؟ بحجة والله إن الهند بتحارب الإرهاب.
طيب والصين بقى موقفها إيه؟ أقول لك إن الصين موقفها معقد جدًا، لازم حضرتك تبقى فاهم إن أكثر دولة مستفيدة من حرب الهند وباكستان هي أمريكا، وده ليه؟ لأنها بتدق مسمار في ظهر الصين. هما الهند وباكستان فين؟ في ضهر الصين، على حدودها. هما الثلاثة لازقين في بعض، وكلنا عارفين إن الصين عملتها قبل كده، ودبست أمريكا في حرب غزة، وفي حرب أوكرانيا، علشان بس تفضل هي فاضية لوحدها لمُلف جزيرة تايوان، مش كده؟ مش ده اللي حصل؟ طيب النهاردة بقى الوضع شكله إيه؟ أمريكا هي اللي بتدبس الصين في حرب الهند وباكستان. واللي عامل مشكلة للصين في الحرب دي، إن أمريكا بتدعم الهند بكل اللي تحتاجه، وده ببساطة لأن الصين هي أهم حليف عسكري لباكستان في المنطقة. يكفي أقول لك على سبيل المثال، إن سنة 2024، السنة اللي فاتت، 80% من حجم السلاح الموجود في الجيش الباكستاني كله كان سلاح صيني. عارف طائرة الجي 10 سي اللي الصين باعتها لمصر، وعاملة قلق في إسرائيل؟ الصين بايعه منها لباكستان 25 طائرة. الصين بايعه لباكستان 160 طائرة تانية طراز جي إف 17. فأنت بتتكلم في دعم عسكري غير طبيعي. الصين بعتت لباكستان واحدة من أعنف راجمات الصواريخ، اسمها إي إتش إم أر إل. الصين لما حسّت إن الأسطول البحري الهندي بيتفوق على الأسطول البحري الباكستاني، باعت لباكستان ثمان غواصات دفعة واحدة. ومش بس كده، دي صنعت أربعة منهم في الصين، والأربعة الباقيين صنعتهم في باكستان بمشاركة المهندسين والضباط الباكستانيين.
طب وهي الصين بتعمل كده ليه مع باكستان؟ ليه واخدة موقف عادي قوي كده من الهند؟ أقول لك لخمس أسباب: أول سبب، إن بينها وبين الهند مشاكل على الحدود، أولها مثلًا إن الجزء اللي الصين بتمتلكه في إقليم كشمير، واللي حكينا قصته في حلقة "حرب كشمير"، الهند بتعتبره ملكها، والصين هي اللي بتحتله منها. وبالمناسبة، الهند عندها حق في الحتة دي، وده لأن باكستان وإقليم كشمير كله على بعضه كانوا جزء من الهند قبل ما ينفصلوا عن بعض، وباكستان تبقى دولة مستقلة. لكن في المقابل برضه الهند هي كمان مش مالك، لأن الهند بتحتل منطقة اسمها أروناتشال براديش، الصين بتعتبرها جزء من هضبة التبت، وبالتالي الصين بتعتبرها جزء من أراضيها. طيب، بلاش كل ده. حضرتك عارف طبعًا إن الصين وأمريكا بيدوروا الضرب في بعض هناك في بحر الصين الجنوبي. فما كان من الهند إلا إنها راحت اشتركت في حلف عسكري اسمه "كواد"، بيضم أمريكا واليابان واستراليا. الحلف العسكري ده معمول مخصوص علشان يقللوا من نفوذ الصين في بحر الصين الجنوبي، ويعملوا حاجة كده زي خط دفاع ضد الأطماع الصينية في جزيرة تايوان. وبالتالي الصين شايفة إن الهند بتنضم لحلف عسكري معمول مخصوص علشان يهدد أمنها القومي. طيب، بلاش كل ده. الصين زي ما حضرتك عارف عندها مشروع اسمه "الحزام والطريق"، اللي هو طريق الحرير، بتحاول من خلاله إنها تسيطر على حركة التجارة العالمية، علشان توقّع الاقتصاد الأمريكي. حلو كده؟ حضرتك تقول لي حلو، أقول لك لا، مش حلو. لأن واحد من أهم الطرق اللي بتربط الصين بباقي دول العالم في المشروع ده بيمر من الأراضي اللي بتمتلكها باكستان في إقليم كشمير. الصين بقى علشان توصل لبحر العرب، ومنه لقناة السويس، ومنها لدول أوروبا، لازم تستخدم الطريق الباكستاني ده. يعني الطريق ده بالنسبة للصين مسألة حياة أو موت، الشريان اللي بيغذيها بالدم، الرئة اللي بتتنفس منها. طب هو الطريق ده مالوش أي بديل؟ ليه يا باشا بديل، لكن البديل الوحيد للطريق ده موجود في مضيق اسمه مضيق ملقا، هناك في بحر الصين الجنوبي. اللي بيسيطر على المضيق ده بقى البحرية الأمريكية، وبالتالي المضيق مقفول قدام الصين. فالحل الوحيد قدام الصين علشان مشروع الحزام والطريق ينجح، إنها تستخدم الأراضي الباكستانية الموجودة في إقليم كشمير. طيب لو الهند جت بقى وانتصرت في الحرب على باكستان، لو الهند استحوذت على إقليم كشمير بالكامل، هتقفل لها الطريق الوحيد اللي فاضل في مشروع الحزام والطريق، وبالتالي يبقى المشروع كله فشل. تخيل ما تيجي النهاردة تقول للصين: "أنا هبوظ لك مشروع الحرير"، تخيل الصين هتقول لك إيه، هتعمل فيك إيه؟ هنا حد من حضراتكم يقول: "طيب وإيه المشكلة لما الهند تتعاون مع الصين اقتصاديًا، وتكبر دماغها من الحرب دي خالص؟" أقول لك: الصين والهند فعليًا بينهم تعاون تجاري كبير جدًا، وصل في 2024، اللي هي السنة اللي فاتت، لـ135 مليار دولار. لكن مشكلة الهند هنا إن الرقم الكبير اللي حضرتك شايفه ده أغلبه بيصب في صالح الصين مش الهند. قيمة العجز في الميزان التجاري اللي بين الهند والصين بالنسبة للهند طبعًا 85 مليار دولار. يعني الصين هي اللي كسبانة من التعاون التجاري اللي بينها وبين الهند. تمام كده؟ حضرتك فهمت ليه الصين واقفة مع باكستان ضد الهند؟ الصين مستحيل تتخلى عن باكستان، أو حتى تسمح للهند بالسيطرة على إقليم كشمير، ده من رابع المستحيلات. لكن في نفس الوقت الصين مش من مصلحتها إنها تتورط في الحرب، وده بكل بساطة لأن هو ده بالضبط اللي أمريكا عايزاه. أمريكا عايزة تورط الصين في الحرب، وتشغلها عن مشاريعها الاقتصادية، فيبقى ترامب بيضغط عليها بالرسوم الجمركية من ناحية، ومن الناحية الثانية بيجبرها إنها تغرز برجليها في حرب هي أصلًا مش عايزاها ولا فاضية لها. دي خلاص كان فاضل لها تكة وتضم جزيرة تايوان، تقوم تطلع لها حرب الهند وباكستان. لذلك، موضوع الهجوم الإرهابي اللي اتنفذ في إقليم كشمير ده أصلًا، واللي الحرب كلها قامت بسببه، هجوم مشكوك فيه. مين المستفيد من الهجوم ده؟ هي أمريكا. طب مين اللي أضر من الهجوم ده؟ هي الصين. أنا مش بقول لك إن أمريكا هي اللي ورا الهجوم الإرهابي، لكن بحاول أفكر معاك بهدوء في إيه اللي استفادته أمريكا من الهجوم الإرهابي؟ الهجوم ما ضافش أي حاجة لباكستان، لذلك هي نفسها كانت بتضغط قبل اندلاع الحرب بشكل كبير علشان المجتمع الدولي هو اللي يحقق في الهجوم ويشوف مين المسؤول عنه. باكستان عارفة كويس إن الهجوم هيتم استخدامه ضدها لتحقيق مصالح دول تانية. الهند من ناحية هتستفيد بدعم المجتمع الدولي، وممكن تنجح في ضم إقليم كشمير، هيقول لك دي دولة بتدافع عن نفسها وبتحارب الإرهاب. ومن الناحية التانية أمريكا هتستفيد بتوريط الصين، واشغالها في حرب بين بلدين نوويين على حدودها. عصفورين يا باشا بحجر واحد. لذلك، دايماً تلاقيني أقول لك إيه: لما تسمع عن هجوم إرهابي، لما تسمع عن حد ضرب حد بصاروخ، لما تسمع عن حد خطف جوز عساكر من حد تاني، قبل ما تفرح وتقول: "هانتصر الحق على الباطل"، اهدى شوية وفكر بالعقل: اللي حصل ده في صالح مين وضد مين؟ هيخدم مصالح مين وهياذي مصالح مين؟ ساعتها بس هتعرف تعرف مين اللي واقف ورا اللي بيحصل، وهتعرف الدنيا رايحة على فين. لك أن تتخيل إن هجوم إرهابي واحد نفذوا ثلاثة عيال إرهابيين، اهتزت له الصين كلها، وممكن يورطها في الحرب، ويشغلها عن ملف جزيرة تايوان، ويقلل ضغطها الاقتصادي على أمريكا، ويعيد تشكيل ميزان القوى بين الهند وباكستان، ويسمح للجيش الأمريكي بالتوسع في بحر الصين الجنوبي بشكل أكبر، يقلل من دعم الصين لروسيا في حرب أوكرانيا، ويقلل من دعم الصين لإيران، وبالتالي يقلل من دعم إيران لميليشياتها زي جماعة الحوثيين. كل ده بسبب إيه؟ ثلاثة عيال إرهابيين ما لهمش أي لازمة، وهجوم إرهابي واحد راح ضحيته 26 مواطنًا هنديًا.
طيب، كل اللي فات ده معناه إيه؟ معناه إن حرب الهند وباكستان حرب بالوكالة بين الصين وأمريكا، زي بالضبط حرب روسيا وأوكرانيا، اللي بتعتبر هي كمان حرب بالوكالة بين المعسكر الشرقي والمعسكر الغربي، بين الصين وروسيا من ناحية، وأمريكا وحلف الناتو من ناحية تانية. بالبلدي كده، إحنا بنعيش دلوقتي الحرب العالمية الثالثة، لكنها المرة دي حرب بالوكالة، مش حرب مباشرة زي الحرب العالمية الأولى والثانية. اللي بيحصل دلوقتي إن أمريكا وحلف الناتو، وحتى الصين، بيحاربوا بعض بالوكالة من خلال جيوش ودول تانية. واللي نفسه أطول وهيقدر يكمل للاخر هو اللي هيلم مكاسب. كل الحروب اللي فاتت، طيب هل في أي ملامح لانتصار دولة على دولة تانية في الحرب دي؟ هقول لك: عد معايا. أمريكا اكبرت أوكرانيا على الاستسلام لروسيا، والتوقيع على اتفاقية تسمح لأمريكا بالتنقيب عن المعادن النادرة في أوكرانيا. ده أول مكسب لأمريكا. الحوثيين استسلموا لأمريكا، واتصالحوا معاها بوساطة عمانية، مقابل بس إن أمريكا تبطل ضرب فيهم. وبناء عليه، أمريكا قدرت تأمن حركة الملاحة في البحر الأحمر مرة تانية. ده ثاني مكسب لأمريكا. الصين بتتورط كل يوم أكثر من اللي قبله في حرب الهند وباكستان، بالشكل اللي هيعطلها عن حربها الاقتصادية مع أمريكا. ده ثالث مكسب لأمريكا. ترامب في زيارته للسعودية والإمارات هيمضي عقود استثمارات بقيمة تريليون و400 مليار دولار من الإمارات، وتريليون دولار من السعودية، عايزة تدي له 600 مليار دولار، لكن هو عايز تريليون دولار. وده رابع مكسب لأمريكا. الصين بقى لها سنين عايزة تكمل مشروع الحزام والطريق، اللي هو طريق الحرير، لكن لسه لحد النهاردة مش عارفة، وكل شوية أمريكا تحاول تبوظه لها. أخر محاولات أمريكا هي حرب الهند وباكستان، اللي لو الهند انتصرت فيها، هتضم إقليم كشمير، وهتحرم الصين من الطريق اللي بيوصلها ببحر العرب وقناة السويس وأوروبا. وده خامس مكسب لأمريكا. وبالتالي حضرتك هنا بتدرك إن كل اللي بيحصل من حواليك دلوقتي، كل الحروب والمؤامرات والاشتباكات، ومن كل حاجة، بتصب في صالح أمريكا فقط لا غير. وبالتالي يبقى مين اللي بيصنعها وبيتحكم في تشغيلها؟ هي أمريكا. السعودية علشان تحارب الحوثيين في اليمن، أعلنت حرب كاملة اسمها "عاصفة الحزم"، طيران رايح وطيران جاي، وقذف جو هنا وضرب نار هناك، ومع ذلك الحوثيين ما جر لهمش حاجة، فضلوا موجودين وبكامل قوتهم. إنما أمريكا بمجرد محاولة بس إنها تكسر الحوثيين كسرتهم في 48 ساعة. حضرتك كنت تتخيل إن الحوثيين يستسلموا ويتصالحوا مع أمريكا؟ كنت تتخيلها صلح كامل بوساطة عمانية؟ يعني هم اللي راحوا لسلطنة عمان وقالوا لها: "لو سمحتي بلغي أمريكا توقف ضرب، واحنا هنوقف ضرب، كفاية كده إحنا ما عدناش قادرين". طب وده معناه إيه؟ معناه إن أمريكا لما كانت بتدعي إنها مش قادرة على الحوثيين طول الفترة اللي فاتت، كانت بتمثل مش أكثر، كانت بتضحك علينا. منين بقى؟ أكثر من سنة ونص بتحاول تكسر في الحوثيين، وتأمن حركة الملاحة في البحر الأحمر، ومش عارف، وهوبا فجأة كده في 48 ساعة تخلص الحرب، وتكسر الحوثيين لدرجة إن هم اللي يستسلموا ويطلبوا منك الصلح. كذلك النهاردة في حرب كشمير، ترامب طلع يقول لك: "يا جماعة عيب كده، ما يصحش". في حين إن الجيش الهندي هو اللي طلع بنفسه في بيان رسمي يقول لك إن: "والله عملياتنا كلها بتتم بالتنسيق مع الجيش الأمريكي". وفي الآخر نعرف إن الهند حليف لأمريكا، وباكستان حليف للصين. نعرف إن الصين محتاجة لباكستان، فهتضطر تساعدها في الحرب، وبالتالي تنشغل بها وبحربها مع الهند، فيقوم ضغط الصين على أمريكا واقتصادها يقل، ضغطها على تايوان وحدودها يقل، ضغطها على بحر