Transcription
صدقوني يا جماعه، أنا بيكون نفسي أتكلم عن كل الحاجات اللي أنتم بتطلبوها مني كلها مرة واحدة. وكل تعليق بتكتبوه مهم عندي، وكل موضوع بتطلبوا مني أن أنا أتكلم عنه بيكون موجود ضمن قائمة طويلة جداً من الموضوعات اللي احنا هنتكلم عنها إن شاء الله في المستقبل القريب.
ولما بلاقي أنه في موضوع معين أنتم بتطلبوه أكتر، بخليه أولوية. الفترة الأخيرة حاجة غريبة جداً، جالي مئات التعليقات كلها: "اتكلمي عن مكملات الناد بلس أو الـ NMN". ومعاكم حق طبعاً، هو موضوع مهم جداً وكان المفروض نتكلم عنه من زمان. فهنتكلم عنه بشكل مفصل شوية النهارده.
إيه هو الناد بلس؟ ليه مهم؟ إيه الفرق بين مكملات الناد بلس، الـ NMN، الـ NR، والنياسين؟ إيه الفرق بينهم؟ كل واحد فيهم بيعمل إيه؟ وامتى مهم أن أنا آخد النوع ده من المكملات أصلاً؟ ولو أنا مش قادرة أشتريها، هل فيه بدائل طبيعية؟ عايزة أقول لكم أن آه، فيه حاجات مجانية بتديكم تأثير مكملات الناد بلس، بس خليكم معايا هنعرف كل التفاصيل دي مع بعض.
هفكركم بس سريعاً أن حجز الاستشارات بيتم عن طريق الموقع الإلكتروني أو عن طريق أرقام الواتساب الموجودة في التعليق المثبت. ما تنسوش تعملوا لايك وشير للحلقة، سبسكرايب للقناة لو أنتم أول مرة تشوفوني، ويلا بينا نبتدي. أنا ندى حرفوش، ودي قناة فولبيينج.
إيه بقى حكاية مكملات الناد بلس اللي بتأخر الشيخوخة وتجدد الخلايا وتفعل العجائب دي؟ قبل ما نتكلم عن المكملات، خلونا في الأول نعرف إيه هو أصلاً الناد بلس. الناد بلس هو عبارة عن إنزيم مساعد في جسم الإنسان، بيكون موجود في كل خلية من خلايا الجسم، لأن أهميته لكل خلية كبيرة جداً.
ما تيجوا نعرف كده إيه هي أهمية وظائف الناد بلس ده؟ بيعمل إيه؟ أولاً، هو مهم لكل خطوة من خطوات إنتاج الطاقة داخل الميتوكوندريا في الخلية. فمن غيره هيكون فيه تعب، هيكون فيه إرهاق، انخفاض في الطاقة.
ثانياً، مهم جداً لعملية إصلاح الـ DNA أو الحمض النووي بتاعنا، عن طريق أن هو بيحفز إنزيمات بتقدر ترمم الحمض النووي. وده مهم جداً لحماية الجسم الجينية ومن السرطانات.
ومسؤول كمان عن تنشيط إنزيمات اسمها السيرتوينز. دي إنزيمات مسؤولة عن تأخير الشيخوخة، وتقليل الالتهابات، وحماية الدماغ والخلايا العصبية. هو يعتبر من أهم، إن ما كانش أهم مكمل للـ anti-aging.
رابعاً، الناد بلس مهم جداً لدعم إنزيمات الكبد المهمة لتنقية الجسم من السموم. هو مهم كمان لتنظيم الجهاز المناعي، الموازنة بين الاستجابات المناعية المفرطة وبين ضعف المناعة. الناس بقى اللي عندها أمراض مناعية تركز معايا.
والناد بلس ده بقى، قد ما هو مهم قوي كده، قد ما مجرد ما إحنا بنعدي سنة 30، الـ 40، بتبدأ مستوياته تقل بشكل كبير. ممكن توصل للنص، ممكن يقل بنسبة توصل لـ 50%. ليه؟ الأسباب كتير. أنا بشوف أن أول سبب هو سوء التغذية، نقص العناصر الغذائية. الناد بلس علشان يتم إنتاجه داخل الجسم بيحتاج عناصر غذائية معينة بكميات كبيرة تدخل في عمليات تحويل متعددة ومعقدة في مسارات معينة علشان تتحول للـ ناد بلس. فالجسم مع التقدم في العمر بيفتقد للعناصر الغذائية دي، وفي نفس الوقت كمان كفاءته في الامتصاص وعمليات التحويل تقل.
وطبعاً فيه أسباب تانية كتير، أهمهم الإجهاد المزمن. الإجهاد بيستهلك الناد بلس بسرعة وبيعيق إعادة تصنيعه. لما مثلاً تكون بتاخد أدوية بشكل متكرر، أهمها المضادات الحيوية، مضادات الاكتئاب، أدوية الضغط، كل الحاجات دي بتجهد الكبد وبتستهلك الناد بلس. الالتهابات المزمنة والأمراض المناعية برضه بتستهلك مستويات عالية جداً من الناد بلس في محاولات من الجسم أن هو يقلل الالتهابات. الإجهاد التأكسدي بيدمر الخلايا وبيزيد حاجة الجسم للـ ناد بلس لإصلاح التلف ده اللي بيسببه الإجهاد التأكسدي. زيادة الأكسديتيف ستريس دي أسبابها كتير: أكل غلط، تدخين، توتر، ستريس. عدوا بقى أنتم براحتكم.
طيب أعرف إزاي أن أنا عندي نقص في الناد بلس؟ أول ما تلاقي نفسك بتقولي: "أنا عمري 30 بس حاسة كأني عندي 50 سنة". بجد مش بهزر، يعني أنا حسيت أن أنا عمري أكبر من عمري الحقيقي، عمر جسمي أكبر من عمري الحقيقي. الإرهاق، التهابات، ضعف في الطاقة، تجاعيد في الجلد، هرمونات بايظة، مناعة ضعيفة، مفاصلك مش قادرة، وما عندكيش مرض معين هو اللي مسبب لك كل ده. كده عندك نقص في الناد بلس أكيد.
هنا بقى بيجي دور المكملات والحاجات الطبيعية اللي بترفع مستوياته في الجسم. خلونا نتكلم عن المكملات في الأول، علشان أنا عارفة ناس كتير مستنية الكلام عن المكملات بالتحديد، وبعد كده هنتكلم عن باقي الحاجات.
شوفوا، هو مبدئياً، ما فيش مكمل بيقدر يدينا الناد بلس جاهز كده على طول. وده ليه؟ لأنه الجسم ما يقدرش يمتصه كويس من المكملات. طيب بس إحنا بنشوف مكملات اسمها "ناد بلس"؟ أيوه، موجودة فعلاً، لكن ده بيكون اسم تجاري. لو بصيتوا على الـ supplement facts هتلاقوا مكتوب فيها اسم مادة من المواد اللي أنا هقولها دلوقتي دول وهشرح لكم الفرق بينهم.
هتلاقوا الـ Nicotinamide Riboside اللي هي مكملات بيكون اسمها الـ NR. وفي مكملات كمان الـ NMN الشهيرة جداً، وغالباً بيكون اسمها NMN مش NAD+. ودول باختصار شديد عبارة عن أشكال متقدمة جداً من النياسين أو من فيتامين بي 3. الجسم بيقدر يستخدمهم في تصنيع ناد بلس في خطوة أو خطوتين، غير بقى عن سلسلة التفاعلات الطويلة اللي بيحتاجها علشان يصنعه من الأكل العادي أو حتى من النياسين في صورته الأولية. فما حدش يا جماعة يروح ياخد نياسين بصيغة الـ Nicotinamide مثلاً ويقول لي: "أنا كده برفع النادي بلس بسرعة". لا طبعاً، هو هيكون عامل مساعد أه، لكن أقل كفاءة بكتير جداً من مكملات الـ NMN أو الـ NR.
طيب هل فيه بقى فرق بينهم؟ يعني أنا دلوقتي علشان أشتري مكمل يرفع لي النادي بلس، أشتري أنهي واحد فيهم؟ خليني أشرح لكم ببساطة وبسرعة الفرق بين الاثنين. إحنا عندنا شكل اسمه NR، وعندنا شكل اسمه NMN. ركزوا معايا الله يبارك لكم، علشان الحتة دي ممكن يحصل فيها لخبطة شوية.
الـ NR ده هو الشكل الجيد، ولكن ليس الأعلى كفاءة. طيب ليه؟ لأن هو بيحتاج لخطوتين أو عمليتين تحويل يحصلوا داخل الجسم علشان يتحول لـ ناد بلس. هتاخد الـ NR، هيدخل الخلية، هيحتاج إنزيم معين علشان يتحول لـ NMN، وبعد كده الـ NMN ده يحتاج إنزيم تاني علشان يتحول للـ ناد بلس المركب اللي إحنا عايزينه.
طيب لو أنا أخدت بقى الـ NMN ده على طول، مكمل NMN، هيحصل إيه؟ العلماء اكتشفوا سنة 2019 أن مركب الـ NMN ده عنده ناقل خاص بيه في الأمعاء الدقيقة اسمه الـ SLC12A8. هو شغلته الوحيدة بس كده أن هو ياخد الـ NMN من إيده يدخله للخلايا على طول، يتحول جواها بقى مباشرة للـ ناد بلس. فباختصار شديد، مكملات الـ NMN هي الشكل الأفضل والأعلى كفاءة في رفع مستويات الناد بلس داخل الخلية.
المستثنيين الوحيدين لصالح الـ NR هو أن الـ NR اتعمل عليه دراسات سريرية أكتر، ولكن حالياً فيه دراسات متزايدة جداً مؤخراً على الـ NMN. الميزة التانية أن الـ NR أرخص في السعر. الـ NMN من المكملات اللي تعتبر في الفئة السعرية المرتفعة، وده مفهوم طبعاً أن هو واحد من يعني المكملات السوبر.
فعلى حسب ميزانيتك هتختار الجرعة من الاثنين. فليكسيبل جداً، بتبقى حسب الغرض من الاستخدام. ممكن تبدأ من 125 ملليجرام للدعم الخفيف، وممكن توصل حتى لحد 1000 ملليجرام ده في حالات التعب الشديد، الأمراض الالتهابية، ضعف العضلات والمناعة، ومع التقدم في السن.
طيب إيه هي الحاجات اللي تقدر تساهم في رفع الناد بلس بشكل طبيعي؟ أول حاجة الصيام المتقطع. أثناء الصيام، الجلوكوز والأنسولين بيقلوا في الجسم، وده بيحفز إنزيم اسمه الـ NAMPT. الإنزيم ده عامل أساسي جداً لتصنيع الناد بلس داخل الخلايا. الصيام كمان بيقلل عدد مرات وكميات الأكل، فبيقلل استهلاك الناد بلس في عمليات استقلاب أو حرق مش ضرورية، اللي هي بقى بتحصل بشكل متكرر مع السناكينج الفريكوينت إيتينج، يعني أن إحنا ناكل بعدد مرات تكرار كبير خلال اليوم.
طيب إيه أفضل نمط من الصيام لتحفيز إنتاج النادي بلس؟ الصيام لفترات بتتراوح بين 16 لـ 18 ساعة، ونعمل One Meal A Day أو وجبة واحدة في اليوم مع صيام 23 ساعة. طيب وده ما يلخبطش الهرمونات؟ إحنا عندنا حلقة اتكلمنا فيها من حوالي تلات سنين كده عن موضوع الصيام المتقطع ولخبطة الهرمونات ده. ارجعوا لها يا جماعة. يعني اللي فاكر ولسه عنده فكرة أن الصيام المتقطع بيلخبط الهرمونات، تاني.
ثانياً هي التمارين، وبالتحديد تمارين المقاومة والكارديو. إزاي؟ مفهوم طبعاً أن الرياضة بتستهلك كم كبير جداً من الطاقة، فالجسم بيستهلك كم كبير من عملات الطاقة اللي هي الـ ATP. فلما المخزون بتاعها بينخفض، الجسم بيضطر أن هو يزود إنتاج الناد بلس كآلية تعويض. في تمارين المقاومة بالتحديد، الخلايا العضلية بتتكسر وبيتم تحفيز الجسم لإعادة بنائها مرة تانية، فالجسم بيضطر أن هو يحفز المسارات اللي بتزيد إنتاج النادي بلس، لأنه محتاجه لإنجاز العمليات دي. أما تمارين الكارديو بتحتاج طاقة طبعاً، طاقة أكتر من العادي بكتير، فبتحفز الميتوكوندريا على إنتاج طاقة أكتر. وزي ما قلنا، الميتوكوندريا ما تقدرش تنتج طاقة من غير الناد بلس، فده بيخلي برضه الجسم يضطر أن هو يحفز إنتاجه أكتر.
كل ده جميل جداً، ولكن هنلاقي مشكلة واحدة بتواجهنا. لو ما فيش العناصر المطلوبة علشان الجسم يقدر ينتج الناد بلس تحت الضغط ده، المشكلة هتكون أكبر. طيب العناصر الأولية اللي الجسم بيستخدمها عشان يطلع الناد بلس دي موجودة فين؟ موجودة في البروتين الحيواني بكل أنواعه. الأحماض الأمينية الأساسية اللي بتكون موجودة في البروتين الحيواني، كل ما توفرت كل ما ده سهّل على الجسم تصنيع الناد بلس.
الخضروات الورقية كمان مهمة، خصوصاً الـ Dark Leafy Greens اللي هي حاجات زي الكيل، السبانخ، الجرجير، السلق. كل حاجة خضرا ولونها غامق. صحيح بتحتاج لمسارات طويلة وعمليات تحويل معقدة، لكن طبعاً هتكون أفضل من لا شيء. ومع الاستمرارية النتيجة بتكون جيدة جداً. ولكن طبعاً أسهل طريق هو المكملات، اللي هي مكملات الـ NMN اللي بتدينا النادي بلس. بس مش معنى كده أنك تاخد مكملات وتلخبط في الأكل وما تتحركش من مكانك. ها، ما حدش يفهمني غلط. أنت عمرك ما هتعرف تضحك على جسمك.
طيب إيه تاني مكمل يا ندى بتعتبريه سوبر فود وجيم تشينجر ممكن يغير حياة أي حد يدخله في نظامه؟ قولا واحدا: الفوسفوليبيدز. الدهون الفوسفورية. كل التفاصيل عنها موجودة في الحلقة اللي هتظهر بعد شوية.
ما تنسوش تعملوا لايك وشير للحلقة، سبسكرايب للقناة لو أنتم أول مرة تشوفوني. ما تنسوش كمان تبصوا على رابط وأرقام حجز الاستشارات في التعليق المثبت، وتبصوا كمان على رابط قناة المراجعات. أشوفكم الحلقة الجاية. باي باي.