خمس عادات لزيادة إنتاجيتك

خمس حاجات من اول ما بدات اعملهم مستوى انتاجيتي اختلف تماما وبقيت اقدر استمر واكمل حتى في اصعب الايام. هقول لك عليهم بسرعه.

أولا ابدا يومك من امبارح. لو عندك ايميل او ريبورت هيتكتب وكل اللي عملته بس انك بدات فيه كتبت كلمتين بدات فايل البروجكت ونمت بيبقى اسهل مليون مره انك لما تصحى تكمل على شغلك بدل ما تقول لعقلك انا لسه عايز ابدا من الصفر.

ثاني حاجه اهم لحظه في اليوم هي اول ما بتفتح عينك. ولو اول حاجه عملتها انك مسكت الموبايل بتغرق عقلك دوبامين يخليك ما تعرفش تتحكم فيه بقيه اليوم خلاص. فمش هقول لك اعمل حاجه معينه لكن ارجوك ابعد عن الموبايل.

ثلاثه خلي دايما في كل الاوقات معاك نوت تكتب فيها اي شيء افتكرت انك لازم تعمله. اكتبها في لحظتها بسرعه على الموبايل عشان ما تتنسيش لان مخك بينسى الموبايل ما بينساش.

رابع حاجه دايما ركز على كسر حاجز البدايه. ما تقولش ورايا هم متلتله ساعتين دراسه وراهم خمس ساعات شغل وراهم وراهم لا. انا هسمي الله وهبدا وانا عارف اني لما ببدا بسخن واكمل. خلي بالك الاهداف الكبيره دي هي سبب كسلك.

واخيرا ما تنساش ابدا حقيقه ان الاستمرار اهم دايما من الكم. لما يجي لك يوم تلاقي عقلك بيقاومك زياده شويه ومش هتقدر تعمل اللي خططت له ماشي اعمل نص الخطه ربعها. المهم ان اليوم يتكتب فيه انك حضرت اثبتت وجودك ما يتاخدش غياب عشان لو النهارده ما كانش قد التوقعات على الاقل افضل سخن وفي مود الشغل علشان اقدر اشد بكره. بالتوفيق.