Transcription
السلام عليكم. فيديو النهارده عباره عن فيديو توضيحي هنشرح فيه ازاي الدماغ بيشتغل وهنتعرف على الأجزاء اللي بتكون الدماغ وهنعرف وظيفة كل جزء فيهم.
واتمنى قبل ما نبدأ ما ننساش نضغط لايك للفيديو واشتراك في القناة تشجيعاً لنا على الاستمرار. ولينك قناتنا الثانية موجود تحت الفيديو بنطلع فيها فيديوهات بوشنا وبنرد فيها على كل الأسئلة والاستفسارات بتاعتكم.
الدماغ عبارة عن مركز تحكم رئيسي للجسم وبيقدر يتحكم في الجسم عن طريق شبكة معقدة مكونة من مليارات الخلايا العصبية اللي بتتبادل الرسائل والإشارات الكهروكيميائية. والإشارات دي هي اللي بتنقل المعلومات من الجسم للدماغ ومن الدماغ للجسم.
وعندنا الدماغ بيتكون من أربع أجزاء رئيسية وهم الدماغ البيني وجذع الدماغ والمخيخ والمخ. وكل جزء فيهم بيتحكم في مهام محددة.
أول جزء وهو المخ وده أكبر جزء في الدماغ وبيتحكم في الوظائف العليا زي التعلم والتفكير والكلام ومسؤول عن الحواس زي السمع والبصر وهكذا.
الجزء الثاني وهو المخيخ ومكانه في الرأس من الخلف. وعلى الرغم من إن حجمه أصغر من حجم المخ بكتير إلا إنه بيحتوي على نفس عدد الخلايا العصبية اللي موجودة في المخ بل إن كمان أنواع الخلايا العصبية اللي بيحتوي عليها المخيخ معقدة جداً. وهو المسؤول عن تنسيق حركات العضلات والحفاظ على توازن الجسم. وأي مهارة هتكتسبها في حياتك الجزء ده من الدماغ هو اللي مسؤول عنها.
الجزء الثالث وهو جذع الدماغ وده الجزء اللي بيربط الدماغ بالحبل الشوكي أو بالجهاز العصبي وده علشان يقدر يتبادلوا الإشارات ما بينهم. بالاضافة ان جذع الدماغ بيتحكم في وظائف الجسم اللا إرادية اللي هي الوظائف اللي جسمك بيعملها تلقائياً من غير ما انت تدخل فيها زي ضربات القلب والتنفس والهضم وحاجات تانية كتيرة.
الجزء الرابع وهو الدماغ البيني أو المعروف بجوهرة الدماغ ودي في حجم حبة المشمش تقريباً وبيتكون من ثلاث مناطق. المنطقة الأولى اسمها المهاد أو الثلامس ودي مركز عصبي عميق بالغ الأهمية وده لأنه بيعالج وينقل المعلومات من جميع الحواس باستثناء حاسة الشم وبيفلطرها قبل وصولها للمخ.
المنطقة الثانية والثالثة في جوهر الدماغ هي منطقة تحت المهاد والغدة النخامية ودول تقدر تقول عليهم مركز التحكم الرئيسي في الدماغ وبيتحكموا في الغدد الصماء وفي هرمونات الجسم كلها.
كده عرفنا أجزاء الدماغ وعرفنا إيه وظيفتها وتعال نجاوب على سؤال مهم هي فين الذاكرة يعني الدماغ بيخزن المعلومات والذكريات فين بالظبط.
بص يا صديقي ما فيش مكان محدد في الدماغ نقدر نقول عليه إن هو ده الذاكرة. إنما المعلومات والذكريات بيتوزعوا على كل أجزاء الدماغ على حسب نوعها. يعني مثلاً عندنا منطقة اسمها فرونتال لوب دي بتخزن المعلومات وانت بتذاكر مباشرة وتعتبر ذاكرة ضعيفة جداً وبتتشتت بسرعة. لكن المعلومات اللي بتثبت فيها بتنتقل لمنطقة أقوى منها اسمها تمبورال لوب ودي بتحتفظ بالحاجات الجديدة تقدر تقول عليها ذاكرة قصيرة المدى.
لكن لما الحاجة بتتكرر أكتر من مرة في دماغك وتثبت أكتر بتنتقل للذاكرة طويلة الأمد ودي عبارة عن شبكة عصبية متوزعة في جميع أنحاء الدماغ. ودي طبعاً أمثلة وشرح مبسط علشان نقدر نفهم إزاي الدماغ بيشتغل. لكن في الحقيقة الدماغ عضو معقد جداً ولحد وقتنا الحالي ما زال العلماء بيكتشفوا حاجات جديدة.
فكل اللي نقدر نقوله هو سبحان الله العظيم وتبارك الله أحسن الخالقين.
وبكده يكون فيديو النهارده خلص واتمنى لو استفدتوا ما تنسوش اللايك والاشتراك وقناتنا الثانية اللي بنطلع فيها فيديوهات بوشنا وبنرد فيها على كل الأسئلة والاستفسارات بتاعتكم اللينك بتاعها موجود تحت الفيديو. اتمنى زيارتها والاشتراك فيها. والسلام عليكم.