عاجل: إسرائيل تنقل الحرب إلى مصر وترامب يستأنف قصف إيران! وروسيا والصين في قلب المواجهة

في تحركات عملتها إسرائيل وأنت مش واخد بالك. التحركات دي في منتهى الخطورة، ومصر عينها عليها. في ناس تقول لك: "أصل إسرائيل بعد إيران عينها على باكستان أو مصر أو تركيا". بس الموضوع مش كده، الموضوع أخطر من كده. الموضوع لعب ولعب كبير، واللعب أخطر من فكرة الحروب، خلي بالك.

طيب، ركز معايا. إسرائيل عينها سفير، بس عينها سفير في منطقة خطيرة جداً بالنسبة لمصر، أرض الصومال. إيه حكاية السفير ده؟ وإيه حكاية إن إسرائيل هيكون لها قاعدة عسكرية على البحر الأحمر؟ طبعاً الحجة الحوثيين، وهقول لك إزاي إيران خلت إسرائيل تمتلك الكثير من المنطقة، وهنشرح ده كله مع بعض.

لكن كمان، إيه حكاية روسيا والصين؟ روسيا ممكن تخش على أوروبا في الوقت ده. أوروبا كلها معقولة تحارب؟ أوروبا كلها؟ والصين خلاص شافت إن الوقت المناسب حالياً إن هي تاخد تايوان. النهارده يا جماعة، عندنا كلام مش هتسمعوه غير معايا. أنا بس إزاي الحرب بتتنقل من إيران لمصر، حتى لو حرب غير مباشرة، بس حرب في منتهى الخطورة.

في البداية، بطلب منك تعمل إعجاب على الفيديو، تشيره، ولو حضرتك لسه جديد، اعمل اشتراك. ويلا نبدأ على طول.

نبداً من وزارة الخارجية الإسرائيلية اللي عينت ميخائيل يوتيام. ده رجل خبير اقتصادي وسياسي مخضرم، عينته سفير فين؟ في أرض الصومال. معنى كده رسمياً خلاص الاعتراف بأرض الصومال، وبقى كمان فيه سفير. رغم إن هو غير مقيم، لكن في النهاية بقى ليهم رجل. ودي خدمة ضخمة بتعملها إسرائيل لأرض الصومال اللي بيتمردوا على الصومال، وأكيد مقابل ثمن. إسرائيل عايزة تكون هناك عشان تراقب الحوثيين. الحوثيين اللي إيران حركوهم عشان يضربوا مضيق باب المندب ويضربوا البحر الأحمر. وقلت لك أي تحرك إيراني ليه ثمن. يعني إيه؟ يعني مثلاً، إيران لما تيجي تقفل مضيق هرمز، هل أنت فاكر إن القوى في العالم هتسيبهم كده يقفلوا المضيق في أي وقت؟ ولا هم هيكسروا المضيق ده في المستقبل؟ نفس الكلام، لما أنت تستخدم مضيق باب المندب، هو مش هيسيبك. لأن دي يا جماعة مصالح بمئات المليارات. ما دام الموضوع فيه فلوس، لازم تعرف إن القوى العالمية مش بس أمريكا، بيجتمعوا مع بعض كلهم، ولازم يكسروا أي حد يفكر يوقف التجارة العالمية اللي هي عبارة عن تحرك مئات المليارات يومياً.

إسرائيل كمان رايحة هناك عشان تواجه نفوذ مصر اللي بقت موجودة في الصومال، والنفوذ التركي. وطبعاً فوق ده كله، مراقبة الحوثيين اللي قفلوا لها الطريق في البحر الأحمر. طبعاً ده كله بدعم أمريكي، حتى لو أمريكا نفسها ما اعترفتش لسه بأرض الصومال.

مصر ردت على طول، وبدر عبد العاطي، وزير خارجية مصر، قال إن الجيش المصري في طريقه للصومال، وفي دعم للصومال، وفي تواجد للجيش المصري في الصومال. وده بقى مش مجرد تواجد يا حبيبي، ده شراكة استراتيجية. بس مش كده وبس، مصر دخلت 3000 جندي صومالي للمعسكر المصري في الصومال وبتدربهم شراكة مع الجنود عشان يكون الجيش الصومالي قريب من الجيش المصري. مش كده وبس، بدر عبد العاطي طلع وأدان اعتراف إسرائيل بأرض الصومال المتمردة. وطبعاً هي مساعدة من إسرائيل لإثيوبيا، ومصر بتهاجم إسرائيل وإثيوبيا وبتقول إن وحدة الصومال خط أحمر بالنسبة لمصر.

من هنا بقى نروح للي بيعمله ترامب وهو خنق دولة إيران. ركز في الكلام ده الله يخليك، لأن الكلام ده في منتهى الأهمية، ما حدش بيقوله للأسف. بصوا يا جماعة، إيران عليها عقوبات من أمريكا عشان ما تبيعش بترول. ورغم كده، إيران في السنين اللي فاتت دي كلها، رغم وجود العقوبات، كانت بتقدر تبيع بترول. آه، مش كل الكميات اللي بتتمناها، لكن بتبيع كميات برضه كبيرة بما يعرف بـ "أسطول الالتفاف"، اللي هو أسطول بياخد بترول من إيران بيلتف حوالين العقوبات بطريقة خارج إطار أمريكا.

ترامب بيعمل إيه بقى؟ ترامب عمل حصار. الحصار ده كل يوم بيزيد. المشكلة إن الحصار ما بقاش بس على البترول، لا، ده الحصار وصل كمان للمواد الغذائية اللي بتروح لإيران. لحد النهارده مسكوا 20 سفينة ضخمة. بس اسمع الكلام الخطير ده عشان تعرف إزاي أمريكا بتضغط بكل قوتها على إيران. من أهم المنتجات اللي بتوصل لإيران فول الصويا اللي بيعملوا منه الزيت. وطبعاً ترامب منع وصول فول الصويا، وده هيؤدي لغلاء الأسعار، غلاء الغذاء 110%، وده بدأ بالفعل. فأنت بتضرب لقمة العيش. أنت كده بتحاول تجوع الشعب الإيراني اللي هو أصلاً كان عايش في مشاكل ضخمة جداً، وأساساً عنده تضخم غير عادي، والدولار هناك وصل لمليون و700 ألف ريال إيراني. فإذا الضغوط دي هتؤدي لحاجتين: لا إما إن إيران تخش في مباحثات وتتنازل، لا إما الحرب هترجع تاني وهيبقى الوضع في منتهى السوء. لازم تفهم إن اللعب في موضوع الفلوس هو الأخطر.

عايز أقول لك على حاجة. النهارده أمريكا بتلعب لعبة في منتهى الخطورة، وكله من أجل المال يا جماعة. أمريكا تبحث عن المال. وركز في الكلام ده. أمريكا الفترة دي بتبيع بترول بأسعار غالية جداً لأوروبا وشغالة، لأن الطلب على البترول والغاز غير عادي، وبقت من أكبر مصدرين البترول والغاز. في الوقت ده، دول الخليج تقريبا واقفة. طب إيه كمان حضرتك؟ دول الخليج تقريبا ضربوا كل الدفاع الجوي ومحتاجين أسلحة بمئات المليارات. اللي خلى ترامب يحول مصانع العربيات زي فورد ومصانع ضخمة جداً لمصانع سلاح عشان السنين اللي جاية يفضل يبيع مش بقى بمليارات، تريليونات الدولارات سلاح، والفلوس دي كلها تخش أمريكا. فالمكاسب من الحرب دي مكاسب ضخمة.

بس في نقطة خطيرة جداً. لو الحرس الثوري مش موجود، دول الخليج مش هتشتري سلاح بكميات كبيرة. لو إيران سقطت، دول الخليج مش هتشتري سلاح بكميات كبيرة. إذاً، سقوط الدولة الإيرانية مش في مصلحة أمريكا. إضعافها بس في مصلحة أمريكا. وده لعب خطير جداً، لعب على أخطر مستوى. حد هيقول لي: "بس الانتخابات؟ وهنا البترول هيغلى في أمريكا وده بيأثر على الانتخابات". هيجي يا حبيبي قبل الانتخابات بشهر ويظبط الدنيا كلها ويظبط كل حاجة ويخش الانتخابات كبطل قدر يرجع تاني أسعار البترول. لعب ولعب خطير، وأنت عمال تبص بس على شوية تصريحات هبلة هنا وهنا ومش فاهم إن في لعب وتخطيط على أعلى مستوى.

طب الحتة التانية بقى بالنسبة لإيران. لو إيران ما عرفتش تصدر البترول نتيجة للحصار، مخازن البترول هتتملي في إيران. هنا إيران لازم توقف إنتاج البترول، ودي كارثة بمعنى كلمة كارثة. عشان تقدر تشغل غلق البترول تاني، تشغل الآبار بتاخد شهور. فهمت الكارثة اللي موجودة حالياً وإزاي إن موضوع الحصار ده موضوع في منتهى الخطورة. عشان كده الصين دخلت، لأن الخطر كمان بيصل للصين، اللي أسعار البترول لما بتغلى بتضرها جداً اقتصادياً.

النهارده الصين قالت: "أنا مستعدة آخد اليورانيوم المخصب بتاع إيران 440 كيلو". وفي مسؤول صيني قال لـ "أسوشيتد برس": "الصين فعلاً عرضت العرض ده". هنا الصين لما بتخش، ليها ثقل وكلمتها ثقيلة مع إيران. في بقى لقاء قريب ما بين الرئيس الأمريكي والصيني، وممكن هم يخلصوا القصة مع بعض. فالصين عايزة تخلص، لأن الحصار اللي عملته أمريكا بيضر الصين ضرر بالغ.

بس خلي بالك بقى، الصين عندها مشهد مهم جداً. إيه هو المشهد ده؟ هي بتقول إن ترامب ما عرفش يجر معاه حلف الناتو، ما عرفش يجر معاه دول أوروبا لحرب في إيران، اللي هي مهمة جداً بالنسبة لأوروبا وخطيرة على أوروبا. إيران خطيرة على أوروبا، ممكن تضرب عليها صواريخ في المستقبل. هيقدر بقى يجرهم لحرب من أجل إن هم يخشوا على منطقة خطيرة جداً وهي منطقة تايوان ويحاربوا الصين من أجل تايوان؟ قال لك مستحيل طبعاً. ده ما رضوش يروحوا إيران، هيروحوا تايوان. فهنا الصين شايفة إن لو هي خدت تايوان، الاتحاد الأوروبي لا يمكن هيتدخل. مين اللي ممكن يتدخل؟ اليابان وكوريا الجنوبية ودول شرق آسيا مع أمريكا. حتى ده بقى صعب بعد اللي حصل داخل إيران، لأن علاقاتهم الغير عادية الاقتصادية مع الصين تمنعهم.

والأخطر بقى، الصين شايفة إن ترامب مؤمن إن لازم في النهاية الصين تاخد تايوان، وما عندوش مشكلة إن هو يتنازل عن تايوان. المشكلة عند الصين مش في ترامب، المشكلة في الانتخابات القادمة. ولو جه حد من الحزب الديمقراطي اللي بيعتبر تايوان ما ينفعش تروح للصين. هقول لك على حاجة غريبة جداً. أكتر حد شد مع الصين كان بايدن، لما كان بيبعت مسؤولين على أعلى مستوى يزوروا تايوان كأنها دولة مستقلة. فالحزب الديمقراطي بالنسبة للصين، تخيل أخطر من ترامب في موضوع تايوان.

بس أخطر حاجة اتقالت بقى هو اللي قالها الكاتب المشهور ديفيد إجناتيوس في "واشنطن بوست". بيقول إيه؟ بيقول لك بوتين مجروح وعنده مشكلة، واليومين دول أوكرانيا بتعمل ضربات صعبة صعبة جداً على روسيا، وبيقول لك إن بوتين بالفعل محاصر. وده كلام خطير جداً. بس بيقول لك بقى بوتين ممكن يعمل حركة تقلب العالم كله، يقلب الترابيزة بالكامل. طب إزاي؟ قال لك يغزو أوروبا. يغزو أوروبا؟ معقولة الكلام ده؟ قال لك استنى بس واسمع. بيقول لك إن في فرصة ذهبية لبوتين. أولاً، ترامب سحب قوات أمريكية كبيرة جداً من شرق أوروبا. لسه أوروبا ما عملتش القوة اللي هي عايزة تعملها عشان تواجه روسيا. لسه ضعيفة بالنسبة لروسيا. فقال لك إن الفرصة الذهبية دي لو أنا ما استخدمتهاش حالياً، مش هعرف استخدمها بعد كده. روسيا نشرت عناوين شركات ألمانية، بريطانية، إيطالية بتمد أوكرانيا بالمسيرات عشان تكون دي أول ضربة. ده غير إن هي ممكن تخش دول في شرق أوروبا. تخيلوا هنا طبعاً الحرب على 100% 100%. وطبعاً يقول لك: "هو أمريكا هتخش ولا مش هتخش؟" 100% أمريكا هتخش، بس مش على طول. ودي طريقة أمريكا، سيبهم يضربوا ببعض ويخربشوا بعض، وفي الآخر ممكن تخش تنهي الحرب.

بس كده، إحنا بنتكلم عن حرب ممكن تحصل تصل للنووي، ودي تبقى النهاية. هل ده ممكن نشوفه زي ما الكاتب شايف المشهد المرعب؟ ولا بوتين أعقل من كده بكتير؟ في رأيي، بوتين أعقل من كده وصعب جداً يكون الوضع يصل لهذه الدرجة، لأن إحنا في النهاية أمام دول نووية.

بصوا يا جماعة، شرحت لك الأمور كلها كما هي. مصر دولة قوية جداً، تحيا مصر فعلاً. وتحركات إسرائيل ضد مصر هتكون تحركات لمحاولة مضايقة مصر، خنق مصر، ومصر هترد بنفس القوة والطريقة. وده اللي هنشوفه في الأيام اللي جاية.

النهاردة أقولها لك دايماً: تحيا مصر، والخزي والعار لأعداء مصر في الداخل وفي الخارج. أشكركم وأشوفكم على خير في لقاء قادم إن شاء الله. مع السلامة.