ليه فقدنا القدرة على الصبر والتركيز؟

هل لاحظت مؤخرًا أن كل شيء تحول لدوشة؟ صخب.

في الأكل، بقينا نتنافس على مين هيحط أكبر عدد مكونات وصوصات لدرجة ما تبقاش فاهم أنت بتاكل إيه أصلًا. أذواق اللبس وألوانه بقت صارخة وملفتة، مش راقية وشيك.

في معظم الأماكن، الترابيزات بقت لازقة في بعضها، ما فيش مساحة شخصية. والمكان يشغل موسيقى عالية جدًا عشان ما نسمعش بعض أكتر.

وعلى الموبايل، كل فيديو بيحاول يصدمك. الحق الخبر، شوف مين زعق لمين.

الحياة بكل اتجاهاتها تحولت لفقاعة كبيرة من الـ "أوفر ستيميوليشن". عقلنا بقى متحفز طول الوقت، متكهرب، اتعود على العالي من كل حاجة. وإحنا مستغربين ليه ما بقاش عندنا صبر على الحاجات المهمة.

كل المحفزات المحيطة بينا دي خلتنا مش عارفين نقعد ندرس ولا حتى نشوف بودكاست مفيدة ساعتين على بعض. كل الأصوات العالية والدوشة اللي شغالة في وداننا طول اليوم خلتنا ما نعرفش نقعد مع نفسنا ولو نص ساعة نفكر أنت فين في حياتك وعايز إيه.

اقعد كده في سكوت. ملل. المشكلة إن كل خطوة مهمة في حياتنا بتحتاج وقت وبتيجي ببطء وملل. فتبقى دائمًا في حالة خطفك من نفسك، معيشاك في حياة مش شبهك. وقبل حتى ما تفوق وتاخد خطوة، تتشتت بالريل اللي بعده.

في وقت متفشي فيه السرحان والتشتت، لو قدرت أنت تركز، هتقدر ترجع الهدوء لبسك، شغلك، علاقاتك. هدوء في اللي بتسمعه وتشوفه. بتقفل الشباك من الدوشة وتخلي الأولوية الأولى في حياتك هي إن انتباهي يفضل ملكي. لأن عمرنا ما هنوصل لأي حاجة طول ما إحنا ما عندناش سلطة على أساس كل شيء، عقلك.