Transcription
خليني اقول لحضرتك على ست نقاط. يلا، ثلاثة ما تعملهم وثلاثة انت لازم تعملهم.
يلا، أول حاجة في الثلاثة اللي ما تعملهم: لا تنتظر الشيء الجيد من الشخص السيء. ما تنتظرش الحاجة الكويسة من بني آدم كرر معاك الحاجة الوحشة 100 مرة.
اثنين: ما تعملش للبني آدم اللي مالوش قيمة قيمة. أنا آسف، ما تعملش للرخيص قيمة. انت بتيجي على بني آدم ملوش قيمة تعمل له قيمة، فيبدأ يعني يتنطط عليك ويبدأ يوجعك.
ثلاثة: ابعد عن الناس اللي بيستكتروا عليك النعمة اللي ربنا بيديها لك. يا ساتر! اللي ما يعرفوش انت بذلت إيه وضحيت بإيه عشان الحاجة دي.
ثلاثة دول، ثلاث نقاط لازم ما تعملهم.
أيوه، ثلاثة تانيين انت لازم تعملهم.
لازم تدي لأهل بيتك وأسرتك جزء من وقتك. لازم تراقبهم. ممكن بكرة ما يكونوش موجودين. حاجات كتيرة قوي يعني انت بتشوفها في حياتك مهمة، لكن صدقني مافيش أهم من إنك تديهم من وقتك، حتى لو كل يوم خمس دقايق.
اثنين: جه الوقت إنك تصالح الناس اللي انت مزعلهم منك واللي انت عارف إن انت مزعلهم وممكن تكون واخد حقوقهم وانت ما انتش واخد بالك. أخوك، أختك، شريك لك في الحياة، واحد معاك في الشغل. مش هتخسر حاجة لو رجعت واديت لهم حقهم.
ثلاثة: والله العظيم الأخلاق هي اللي بتفتح الأبواب المقفولة. اتعامل مع كل الناس اللي بتقابلك في حياتك بأدب واحترام وأخلاق. قدر كل الناس اللي بتقابلك، هتلاقي العالم كله بيقدرك.
ست خطوات لسنة جديدة مختلفة عن كل ما سبق في التعامل مع الآخرين.