الحل الفوري لمكافحه الشيخوخه و التقدم في السن #دينا_حسني #تحفيز

الشيخوخه عباره عن إيه؟ أنا مش قادرة أقوم من على الكرسي، أنا تعبانة، عندي التهابات، وزني زيادة، السكر والانسولين زيادة في جسمي، ضمور العضل، هشاشة العظام. جسمنا بيكش وفوقيها أعراض انقطاع الطمث اللي بيها شعرنا بيقع وأسناننا بتتكسر.

القوة الساحرة اللي خلتني أتغلب على كل أعراض انقطاع الطمث، الحاجة اللي خلت جسمي يسترجع الشباب تاني. الحاجة اللي بتقلل 43% من أعراض انقطاع الطمث.

أول حاجة من الثلاث حاجات اللي هقول لكم عليها دلوقتي هي الأوزان والرياضة بحمل الأوزان أو بوزن الجسم. هشاشة العظام بتدخلنا المستشفى وفي ناس بتموت، في ناس لو اتخبطت في الحوض مهما عملت عمليات ما بترجعش تقف على رجلها تاني. في أطفال صغيرة وشباب عندهم هشاشة عظام بسبب سوء التغذية. مهم جداً إننا ناخد بالنا إننا نقلل من الهشاشة بتاعة العظام، نبني جسمنا تاني ونحسن مزاجنا وبشرتنا بتستفيد وجسمنا بيبني العضل اللي بيها بنحرق الدهون الزيادة. جسمك بتقدري تنامي بالليل لما بتلعبي رياضة. العضلات اللي بتبنيها مع حمل الأوزان وأوزان تقيلة لو انتِ متمرسة في الرياضة. اعملي أوزان تقيلة، لو انتِ لسه جديدة على الرياضة ابتدي برياضة خفيفة بوزن جسمك واليوتيوب مليان أمثلة وأنا عاملة حلقات كتيرة في بوكس الشرح.

طب إيه ده؟ كل ده ممكن أخلص منه إزاي؟ ما تستقليش بربع ساعة من حمل الأوزان أربع مرات في الأسبوع. ما تستقليش بالمشي 45 دقيقة كل أسبوع مرتين لثلاث مرات. العروق بتاعتك بتشيل الدهن والكوليسترول بيزيد بيروح بالمشي. ضمور العضلات وإنك تكشي وهرموناتك تضعف وتبقي قاعدة مكسوفة من جوزك وقاعدة مكسوفة من عيالك إن انتِ بتنسي وأعراض انقطاع الطمث مزودة عليكي الحمل ومش قادرة تخدمي نفسك والبيت. العضلات اللي هتبنيها من حمل الأثقال في البيت والأوزان هي الدواء بتاعك. لا الفيتامينات بتعمل نتيجة ولا الهرمونات العلاجية بتعمل نتيجة، لأن كتر ما انتِ قاعدة مكانك والسكر بيزيد والكوليسترول بيزيد والأعراض متقلة عليكي انتِ مش قادرة تقومي تتحركي تخدمي نفسك وبالتالي في سموم كتيرة في جسمك. وطبعاً الرغبة بتقل ومزاجك بيبقى مش حلو.

من هنا الرياضة بتفرق معاكي قوي بالذات حماية جسمك ووجود العضلات. العضلات لما بتتبني زي ما قلت بتزيد مستوى الحرق حتى لو عكتي في الأكل. أنا عندي عضلات بتحرق بالليل وأنا نايمة.

الحاجة اللي بتخلي جسمك يصحى ويقول فوق ما تموتش وخليك بتتحرك وقوم ابني عضمك تاني وابني عضلك تاني هي حمل الأوزان. ما تستقليش بالهواء الفريش والشمس عشان خاطر حماية عظمك من هشاشة العظام. الماشي في الشارع وانتِ ماشية بأكياس تقيلة وماشية 3-4 متر وراجعة تاني وطالعة بيهم السلم ما تستقليش بيهم. ده هو ده السحر اللي هيحميكي من الأمراض والنومة في السرير والناس تخدمك.

أنا هنا ما بتكلمش إن أنا عايزة أعيش لسن 90 سنة، مين عايز يعيش كتير عشان ناخد ذنوب زيادة؟ يا ستي، لكن أنا بتكلم على إن أنا أحافظ على العظم، أحافظ على العضل، أحافظ على بشرتي. مش معنى إني وصلت 50 و60 و70 يبقى أنا خلاص اتركنت جوه الدولاب. أنا محتاجة يبقى شكلي حلو، شعري حلو، أسناني حلوة، بشرتي حلوة، قادرة أقوم من على الكرسي وحاسة بالنشاط، عايزة أقوم أعمل لنفسي حاجة بقوم أعملها. ما أخشش الحمام عشان أستحمى وأنا خايفة من التوازن.

التوازن بتاع الجسم، التمثيل الغذائي، الدورة الدموية، قوة الشرايين، تنظيف الجسم من السموم، الإخراج، المزاج الحلو، التمثيل الغذائي عشان شعرك وجسمك وعضمك يستفيد. كله بيجي من اللي انتِ مستكتراه على نفسك إن انتِ تشيلي أوزان وإن انتِ تمشي. الحاجتين دول هم السحر، هم دول اللي هياخدوا بجسمنا ويبعدونا عن المصحة، يبعدونا عن الموت، يبعدونا عن العيا وخدمة الناس والذل للعيا وللمرض.

انتوا في دكاترة كتير بتقول لكم ما تمشيش عشان خشونة. الخشونة؟ خشونة إيه؟ ده أنا لو قعدت زيادة جسمي بيصدي. حاربي، حاربي نفسك وحاربي المجتمع اللي ما علمناش إننا نتحرك وحاربي نفسك وما تخليش ولادك اللي يخدموكي وما تخليكيش إنتِ اللي تخدميهم. ما انتِ جسمك اللي بيموت في الآخر.

أنا بقوم أنضف أوضتي بإيدي، بنضف عربيتي بإيدي، برتب الدنيا، بشيل الشتوي بحط الصيفي، بغير مكان الحاجة، بنزل السلالم، بشيل الأوزان. بحوش عشان أجيب تريد ميل في البيت، المشاية. بحوش عشان أعمل اشتراك زومبا. وماله؟ مش كل الناس أغنياء، لكن كل الناس عندها قدرة إنها تتحرك.

زي ما قلت اللي هيحمينا من الخرف من الضمور ور بتاع عضلة الدماغ هي الرياضة. الحركة الميكانيكية اللي بنعملها واحنا ماشيين بتشحم المفاصل، بتعيد بناء الغضاريف في الجسم. الكولاجين بيتكسر في جسمنا بسرعة من القاعدة وقلة أكل البروتين. فناكل بيضتين وربع رغيف وشوية جبنة زي الفل يبنوا لي العضل ويبنوا لي شعري ويبنوا لي الكولاجين وشي يبقى فيه نضارة والدم بيرد في جسمي.

أول ما بنزل أتمشى، أوعي تكوني فاكرة لما يكون مزاجك مش رايق وقعدتي مكانك انتِ كده اللي كسبانة. ده دايماً في ناس كتيرة أول ما مزاجهم بيبقى مش حلو يقول لك لا لا سيبني سيبني خليني أقوم من هنا أنزل أتمشى شوية وأرجع فعلاً. لأن الحركة بركة. مش بركة بس ما يقصدوش بيها الحركة بركة السعي للرزق لا، والحركة الحركة الجسم. الجهاز الليمفاوي بيصرف السموم، الإخراج بيبقى أحسن، النوم أحسن، مزاجنا أحسن. الفيتامينات اللي بتاخديها بتوصل أسرع مع الدورة الدموية وهي بتتحرك بشوية وهي راكدة. الأكل والهضم بتاعك بيبقى أحسن.

لو أكلتي لك ثلاث تمرات في اليوم اللي هم بيقللوا مستوى الأنسولين بيعدلوا الهرمونات بينظفوا الجسم فيهم معادن منجم فيتامينات ومعادن عمرك ما هتقلقي منهم لما تاكليهم وانتِ ماشية كل يوم ساعة إلا ربع وانتِ بتشوفي الشمس عشان عظامك تستفيد بدل الحبوب بتاعة فيتامين د اللي عمالين ندفع فيها فلوس قد كده. إحنا قاعدين في بلاد مشمسة بس إحنا ما بنرضاش نخرج بره في الشمس.

مستكتره على نفسك قوي إنك تتحركي جوه البيت، تحطي لك فيديو حلو يضحكك. مستكتره على نفسك الوقت اللي هتديه لنفسك. اعمل إيه؟ ما بين الطبخ؟ هو انتِ أول أم ولا آخر الأم؟ تبقي بتشتغلي وبتطبخي وعندك عيال واخده بالك من نفسك؟ انتِ ما بتغيريش شوية من الستات اللي عندها كل المسؤوليات دي ولسه محافظة على جسمها؟ هم عندهم إيه أكتر منك؟ هي عندها إنها منظمة وقتها وإنها بتحب نفسها. معلش، إحنا ما بنحبش نفسنا كفاية. وأنا ما أقدرش أعلمك إزاي تحبي نفسك، لكن أقدر أخوفك على صحتك. آه، عشان صحتنا هي دي بنك الاستثمار بتاعنا ودي العملة اللي لو راحت مش هترجع تاني.

أنا مش عايزة حد النهارده يتفرج على الفيديو ده من غير ما يوعدني وتحطوا لي في التعليقات هتدخلوا المشي والرياضة وحمل الأوزان إزاي. ولو عايزين تفاصيل لنوع التمارين والأوزان والطريقة والعدات كلها موجودة في بوكس الشرح وعلى قناة زاد المرأة. كل الحاجات دي نزلت الأسبوعين اللي فاتوا. طوروا في الفيديوهات يا بنات هتلاقوا تغذية هتلاقوا مكملات هتلاقوا مكملات حرق هتلاقوا كل حاجة. لكن الأساسي أنا عايزاكي تحبي نفسك كفاية عشان تلعبي رياضة عشان تاخدي المكملات عشان تحرقي دهون عشان ثقتك في نفسك ترجع تاني. انتِ مش لوحدك. أنا دينا حسني ودي صفحة زاد المرأة.