الفرق بين التعلم والخبرة العملية في مجال البرمجة

كتير بسمع الفترة الأخيرة عن ناس بيقولوا إحنا بنعلمك وبنديلك خبرة، والخبرة دي تقدر إن أنت تكتبها في السي في وتديلك سنة خبرة جوه السي في بتاعك. وبصراحة الكلام ده كلام مغلوط جداً وفيه مشاكل كتير جداً فيه. أنا محتاج إن أنا أرد عليها وأوضحها، لأنك لا تتخيل يا صديقي إن أي حاجة أنت بتتعلمها في مرحلة التعلم لا تقارن بـ 1% بس من الخبرة اللي أنت ممكن تاخدها في أول ثلاث شهور شغل.

أهلاً وسهلاً بكم في فيديو جديد، أنا علي شاهين المدير التنفيذي لشركة IT Legend، والنهاردة إن شاء الله هنتكلم مع بعض بالتفصيل عن الفرق ما بين التعلم وما بين الخبرة العملية اللي أنت بتاخدها في الشغل. أولاً لو أنت مهتم بفيديوهات عن مجال البرمجة وتتعلم عنه أكتر، أو مهتم بكورسات البرمجة إن كانت مجانية أو مدفوعة، اشترك دلوقتي في قناة IT Legend عشان يوصلك كل الجديد عندنا إن شاء الله.

اللي أنا عايز أفهمه لك يا صديقي، أنت في مرحلة التعلم بتعمل إيه؟ أنت بتاخد مجموعة من المعلومات، مجموعة المعلومات دي أنت بتبتدي تتكونها فوق بعض وبتبتدي إن أنت تضربها مع بعض في الخلاط عشان تطلع لك في الآخر شوية أبلكيشنز صغيرة أنت بتجرب بيها. ولكن أنت في مرحلة التعلم في الغالب حتى لو أنت بتتعلم لوحدك ما بتكونش مضغوط بنسبة كبيرة، بتبقى أنت بتتعلم براحتك، وأي ضغط أنت بتحطه على نفسك بيختلف عن الضغط اللي بيحطه عليك الآخر، أو الضغط اللي بتبقى مجبر عليه الشركة عموماً في التسليمات.

تخيل معايا النهارده لاعيب كورة، لاعيب كورة قاعد عمال يتدرب، مهاراته عالية جداً، قاعد في التدريبات بيطلع مهارات غير عادية، لكن ينزل الماتش ما يعرفش يعمل أي حاجة خالص. يا ترى ممكن يكون اللاعيب ده إيه مشكلته؟ مشكلة اللاعيب مثلاً ممكن يكون ضغط جماهيري، الجماهير عمالة بقى تزعق وتزق ومش عارف إيه وكلام من ده، هو مش مستحمل الضغط، ودانه مع الجماهير مش قادر يركز في الملعب. ده بالظبط بتطبق عندنا في البرمجة، إن أنت النهارده لما بتنزل تشتغل في بروجكت، فأنت قاعد عمال تفكر أنا إمتى هفشل، إمتى مديري هيشوفني وحش، إمتى مديري هيرفدني، إمتى مديري هيقول إن أنا خلاص مش نافع في البرمجة، ده أصلاً بيقولوا لي أصلاً من الأول إن البرمجة ده مجال وحش وإن أنا مش نافع فيه. كل الأفكار السلبية دي بتقعد تلف في دماغك أول ما بتبتدي شغل، فبينتهي بيك المطاف إن أنت ممكن تسيب الشركة اللي أنت شغال فيها، أو الكلام ده بسبب إن أنت مش قادر تركز في الشغل ذات نفسه.

ودايماً اللي احنا بنقوله إن يا جماعة الشاطر في مجالنا ما بيقعدش، أنت لو شاطر هتشتغل، ولكن محتاج إن أنت تدمج بعض المهارات التانية للمهارات التكنيكال بتاعتك. دلوقتي يا صديقي العزيز، أنت قاعد بتت اتعلم، كل اللي عليك أنت اتعلم كويس، امشي في مراحل التعلم كويس اللي أنت ماشي بيها، مرحلة ما قبل التعلم، مرحلة التاسيس، مرحلة التأهيل لسوق العمل، اعمل المشاريع اللي احنا دايماً بنقول لك عليها، واعمل التطبيقات، واحضر معانا تدريبات، التدريبات الأونلاين زي كورس الترينينج مثلاً اللي أنا عامله في الدبلومة بتاعتي، احضر كورس زي ده.

طب هل أنا النهارده أقدر أقول لك حتى بعد ما تحضر كورس زي ده، اكتب في السي في بتاعك إن أنت خبرة مثلاً ست شهور أو خبرة سنة؟ أنا لو قلت لك كده أبقى أنا بنصب عليك، ليه؟ لأن الخبرة في الشركات غير الخبرة في التدريب خالص. البروفيشنال اكسبيرينس بتختلف تماماً عن كل ده. بروفيشنال اكسبيرينس يعني أنت اشتغلت في تيم، يعني فيه ستاندرد أنت بتشتغل عليها، يعني اتحطيت وسط ضغوط، يعني حليت مشاكل في وقت ضيق، يعني استحملت مثلاً مديرك وهو بيضغط عليك في ساعتين أوفر تايم، حاجات كتير جداً جداً مش هتتعلمها غير لما تنزل شركة.

ودايماً يا جماعة ركزوا على البيرسوناليتي اللي هي بتبين أصلاً التكنيكال سكيلز بتاعتك فيما بعد. يعني أي حد هيجي يكلمك النهارده ويقول لك الكورس اللي أنا بديهولك ده بيديلك سنة خبرة، حتى لو كان اللي بيقول لك ده الـ ITI نفسهم، قول لهم يا جماعة معلش بعد إذنكم أنتم ما تعرفوش حاجة عن البروفيشنال اكسبيرينس. بروفيشنال اكسبيرينس في شركة لازم تكون أنت قضيتها في شركة، بعد إذنك. عشان بس ما نخليش حد ينصب علينا.

خلص مرحلة التعليم بتاعتك براحتك خالص، ابتدي دور على شركات، إن شاء الله حتى تنزل تدريب من غير فلوس خالص، ما فيش مشكلة، انزل اقعد لك فترة، دي تقدر تكتبها عادي في السي في بتاعك طالما اشتغلت في حاجة برودكشن، اكتبها في السي في بتاعك عادي جداً. اعمل مشاريع فريلانس مع ناس زي مايلك، كده كده عندك برضه ديد لاين، وأكيد ممكن يكون التيم فيه ستاندردز مثلاً بشكل ما. فعلى الأقل لو مش هيديلك بروفيشنال اكسبيرينس زي الشركة، بس هيديلك اكسبيرينس إن أنت عملت حاجة لايف، يعني برضه هيديلك حاجة كويسة.

إنما فكرة إن أنت تيجي تقول لي أصل كورس وهيديني سنة خبرة، يا ريت ننسى الفكرة دي خالص، يعني يا ريت ننساها، ويا ريت أي حد بيكلمك فيها قول له تراجع عن كلامك عشان أنت كده يعني إيه يعني بتسوحنا، لأن ما فيش شركة في الدنيا بتعتمد الكلام ده. يعني أنا النهارده مثلاً قعدت مع ناس كتير في الإنترفيو، قالوا لي إحنا سنة خبرة وسنتين خبرة، والله العظيم وأقعد معاهم يقول لي آه أصل الـ ITI بتتحسب بسنة خبرة، وأصل السنة الخبرة التانية أنا خدتها ست شهور فريلانس على ست شهور كنت بجرب حاجات مع نفسي. طب أنت النهارده بتحسب كل ده اكسبيرينس؟ يعني أنت بتحسب كل ده من الخبرة بتاعتك؟ لا ده أنت فايتك كتير قوي، ده أنت فايتك كتير وعندك مشكلة كبيرة جداً، وده هيعطلك لأنك هتلاقي نفسك بتطلب رواتب بتاع أبو سنتين خبرة وبتقدم على وظائف أبو سنتين خبرة وبتروح وبتترفض وترجع بقى تسألني هو أنا بترفض ليه؟ أنت بتترفض عشان أنت عامل منظومة غلط أصلاً.

المنظومة اللي أنت عايش فيها دي كلها غلط، أنت زيرو خبرة، أنت لسه ما عندكش أي خبرة خالص. مش عيب يا جماعة إن إحنا نقول إن إحنا زيرو خبرة على فكرة، مش عيب. حتى آه أنا مجرب مع نفسي، آه أنا تعبت على نفسي، حاول إن أنت تتواضع في إمكانياتك عشان أنت لما تتواضع في إمكانياتك تبقى أنت مفيد للشركة. الشركة هتقبلك، حتى لو قابلتك بمرتب عادي، المرتب مش مهم في بداية طريقك، بعد كده أنت هتقعد تحط رجل على رجل وتاخد المرتب اللي أنت عاوزه. يا جماعة ركزوا بس في الحاجات اللي بتتقال لكم عشان تبنوا مستقبل لنفسكم كويس إن شاء الله.

الفترة اللي جاية لو عجبك الفيديو اعمل له لايك وشيره مع أصحابك، وأشوفك على خير في فيديو جاي. السلام عليكم.