Transcription
اهم شيء ممكن يخلي شخصيتك قوية وجذابة لأي شخص بيعرفك هي الثقة بالنفس. الثقة بالنفس هي أول مفتاح لنجاحك في أي مجال من مجالات حياتك، سواء في شغلك أو في دراستك، في علاقتك مع الشخص اللي أنت مرتبط بيه أو حتى عايز ترتبط بيه، في علاقتك مع أصدقائك أو حتى في علاقتك مع أي شخص أنت عايز تتعرف عليه. الثقة بالنفس هي السحر اللي ممكن يوصلك لكل اللي بتتمناه في حياتك، لأنها كمان بتعتبر أول وأهم سمة من سمات الشخصية القوية. مستحيل تلاقي حد بيمتلك شخصية قوية وفي نفس الوقت ثقته بنفسه مهزوزة.
والنهارده هشرح لك بالتفصيل إزاي توصل لأعلى مراحل الكاريزما والثقة بالنفس وقوة الشخصية. ناس كتير جداً اتكلمت عن الموضوع ده، بس أنا متأكد إن ما حدش عرف يعلمه لك أو يشرحه لك زي ما أنا هشرحه لك دلوقتي. لأنه للأسف معظم الناس اللي بتتكلم عن تطوير الذات وقوة الشخصية هتلاقيه بيدي لك كلام نظري ما بتتعلم منه أي حاجة. تلاقيه مثلاً بيقول لك: "خليك واثق في نفسك وأنت بتعمل كذا، خليك واثق في نفسك وأنت بتتعامل مع الناس". وساعتها أنت برضه ما بتبقاش عارف تعمل إيه بالظبط عشان تحس الثقة دي تجاه نفسك.
ودلوقتي هقول لك بالضبط وبالتفصيل إزاي تدرب نفسك على شعور الثقة بالنفس ده تجاه نفسك وتطبقه في تعاملك مع أي شخص. يلا نبدأ.
مبدئياً، لازم تفهم إن عمرك ما هتعرف تتعامل مع اللي حواليك بثقة وتجذبهم ليك وتكون بتمتلك الكاريزما والشخصية القوية، إلا لما تتعلم إزاي تتعامل مع نفسك الأول، إزاي تتعامل مع عقلك الأول. عقلك هو اللي قادر يطلعك لسبع سما ويخليك تلمس النجوم بإيدك، وبرضه عقلك هو اللي ممكن ينزلك لسبع أرض ويخليك ما تسواش حاجة. لأن الكاريزما والثقة بالنفس مصدرها داخلي. ثقتك بنفسك بتيجي من الداخل الأول، وتلقائياً لما بتدرب نفسك على الثقة الداخلية دي وتتعلم إزاي تتعامل مع عقلك، فبعد كده تلقائياً الثقة بالنفس دي هتلاقيها ظهرت على شكلك وعلى ملامحك وصوتك وطريقة كلامك وطريقة تصرفاتك مع الناس.
عشان كده فيديو النهارده مقسوم جزئين. الجزء الأول هو إزاي تتعامل مع عقلك وتدرب نفسك على إنك تحس الثقة دي تجاه نفسك. والجزء الثاني هنتعلم فيه إزاي تطبق الثقة بالنفس دي في تعاملك مع اللي حواليك.
وأول وأهم حاجة هتخليك تكون بتمتلك الثقة تجاه نفسك وقوة الشخصية وهي: تأجيل المتعة.
هنفترض مثلاً إن في حاجة معينة بتعملها على مدار يومك بتخليك تكون مستمتع جداً، زي إنك بتاكل أكلة معينة، بتكلم شخص معين فبتستمتع جداً بكلامك معاه، أو بتعمل سلوك معين على مدار يومك بيحسسك بالمتعة أياً كان. كل اللي عايزه منك هنا عشان تدرب عقلك هو إنك تأجل المتعة. كل ما تحس إنك على مدار يومك عايز تعمل الحاجة اللي بتخليك مستمتع دي، عايزك هنا تقول لنفسك: "تمام، أنا هعمل الحاجة اللي بتخليني مستمتع دي بس مش دلوقتي. أنا هكلم الشخص ده بس مش دلوقتي. آخر اليوم أنا هعمل الحاجة اللي بتمتع دي بس في وقت تاني مش النهارده".
الفكرة هنا هو إنك لما بتعود نفسك أو لما بتتعود على إنك تتعامل مع نفسك ومع عقلك بطريقة تأجيل المتعة، فتلقائياً بعد فترة معينة بتحس تجاه نفسك إنك بقيت أقوى من دماغك، أقوى من رغباتك ومشاعرك. وتلقائياً هتحس هنا إنك بدأت تمتلك قوة الشخصية والثقة بالنفس بسبب الثقة اللي قدرت تاخدها من قدرتك على تأجيلك للمتعة دي.
كل اللي عايزك تفهمه من النقطة دي إنه أياً كان الشيء اللي بيخليك مستمتع جداً دلوقتي، أجّله لوقت تاني. وضيف على ده حاجة مهمة جداً، إذا دربت نفسك عليها تأكد إن ثقتك بنفسك هتعلى لحد السما، وهي إنك تنسحب في عز ما أنت مستمتع. أياً كان الشيء اللي أنت بتعمله ومستمتع بيه دلوقتي، حاول من وقت للثاني أثناء ما تكون بتعمل الشيء ده هو إنك تنسحب في عز متعتك بالشيء ده.
قلت لك من شوية إنك لو عايز تكلم شخص معين بتستمتع معاه، إنك تأجل كلامك معاه لآخر اليوم. اللي عايزه منك بعدها هو إنك من وقت للتاني تقطع الحديث وتنسحب في عز ما أنت مستمتع. لو قدامك قطعة حلويات بتستمتع جداً بأكلها، فكل نصها بس وانسحب في عز ما أنت مستمتع. وهنا هتلاقي نفسك تلقائياً بدأت تقوي شخصيتك بشكل خرافي، لأنك ساعتها هتكون بتمتلك حاجة ما بيمتلكهاش أغلب الناس وهي: تحكم بعقلك.
أما تاني خطوة، واللي لو دربت نفسك وعقلك عليها تأكد إن عمرك ما هتحس إنك مهزوز أو متردد، وهتوصل لمرحلة مهمة جداً من الثقة بالنفس يمكن ما وصلت لهاش قبل كده، وهي إنك تفكر في شيء جميل أو مريح أو تفكر في شيء يسعدك جداً كل ما حسيت إنك متوتر أو كل ما بدأ يظهر عليك الضغط أو القلق.
بمعنى إنك لو عايز تبين إنك بتمتلك شخصية جميلة وثقة بالنفس عالية، فلازم تعرف إن لازم الأول مشاعرك تكون متوازنة. لكن إزاي ممكن تكون مشاعرك متوازنة وأنت أصلاً متوتر وقلقان؟ الإجابة بسيطة: مشاعرك هتكون متوازنة من خلال إنك تتحكم في أفكارك يا صديقي.
للأسف، ناس كتير جداً بتفكر بطريقة تفكير غلط بتدمرها، من خلال إنك تلاقيه بيقول لنفسه: "خليني دايماً أتوقع الأسوأ عشان لما يحصل حاجة سيئة فعلاً ما أكونش تعشمت على الفاضي وأتصدم". وللأسف دي أكتر طريقة تفكير سلبية في الحياة ممكن تدمرك. لازم تعرف يا صديقي إن كل ما توقعت الأسوأ، كل ما تلقائياً أفكارك بقت سيئة، وكل ما تلقائياً اتوترت. وهتلاقي ده بيظهر على ملامحك وعلى لغة جسدك، وده للأسف من غير ما تحس هيوصل انطباع للناس اللي حواليك إن أنت ما عندكش ثقة بنفسك، وده تلقائياً هيخليك تحس إن شخصيتك ضعيفة جداً.
بالتالي، عشان تتخلص من كل الكلكعة دي في لمح البصر، كل اللي عايزك تعمله هنا عشان تكون بتمتلك الشخصية القوية والمرحة وتكون بتمتلك الشخصية الجذابة لكل اللي حواليك، هو إنك كل ما حسيت بتوتر أو خوف أو قلق في أي وقت أي موقف، فكر في الشيء اللي يسعدك. استحضر ذكرى ممتعة وفكر فيها في لحظات قلقك أو خوفك. كل ما فكرت في الأمور الإيجابية أكتر في عز قلقك، كل ما لقيت نفسك تلقائياً بتبتسم بشكل لا إرادي. هتلاقي نفسك بدأت ترتاح، جسمك بدأ يسترخي. ودي بتعتبر واحدة من أقوى الحيل السريعة ومفعولها قوي جداً، ممكن إن أنت حتى تلاحظ في نفس اللحظة اللي تطبق فيها الحيلة دي.
وأضيف على ده حاجة مهمة جداً لازم تدرب نفسك عليها، وهي إنك توجه لنفسك بس الكلام اللي بيعجبك. يعني مثلاً، أثناء تصويري للفيديو ده ممكن إن أنا أتوتر شوية، يمكن أحس بشوية ضغط مثلاً. لكن لو أنا حبيت أبان واثق في نفسي وأتخلص من كل التوتر ده، فكل اللي أنا لازم أعمله هنا هو إن أنا أقول لنفسي: "يا سلام عليا! أنا بيعجبني جداً شكلي على الكاميرا وطريقة توصيلي للمعلومة. قد إيه أنا بمتلك شخصية قوية جداً وممتعة!". تأكد إنك لما تقول لنفسك الأفكار دي جوه دماغك أثناء وجودك في أي موقف، فلازم تعرف إن وقتها بس هتبان واثق في نفسك جداً وهتبان شخصية قوية جداً. في أي موقف صعب، أي موقف تلاقي نفسك فيه توترت، وجه لنفسك الكلام اللي يعجبك. امدح نفسك جوه عقلك. لازم تعرف إن قوة الشخصية والثقة بالنفس هي أمور نفسية، أمور نفسية وبس، يعني أساسها نفسك. فقدر نفسك.
أما الحاجة الثالثة اللي لو دربت نفسك عليها لمدة ثلاث أسابيع بس، تأكد إنك بعدها هتتحول لشخص إيجابي جداً بتمتلك شخصية قوية وثقة بالنفس عالية جداً، وهي إنك تعود نفسك إنك تنفذ أكتر ما تفكر. هنفترض مثلاً دلوقتي إنك فكرت إنك لازم تلعب رياضة، فاللي عايزه منك هنا إنك ما تفكرش في الموضوع مرة تانية، نفذ على طول. البس هدومك وروح اتدرب أياً كان. المهم إنك تنفذ أكتر ما تفكر.
لازم تعرف إن عقلك بيستمد ثقتك بنفسك وبيقوي شخصيتك من خلال التصرفات اللي أنت بتعملها. يعني مثلاً، لو أنت معجب بشخص معين وفكرت بينك وبين نفسك إنك عايز تكلم الشخص ده، فلازم تروح تكلم الشخص ده. لازم توفي بالوعود اللي بتوعدها لنفسك، الوعود اللي بتوعدها لنفسك جوه دماغك، لأن دي أكتر حاجة لو دربت نفسك عليها هتخليك تحس تجاه نفسك بالثقة والقوة، وهتخليك ما تحسش أبداً إنك متردد أو مهزوز.
لازم تعرف إن التردد يا صديقي هو بارت الفرص. كل الفرص اللي ممكن تنقلك في حياتك للأحسن ممكن تضيع في لحظة بسبب التردد. ولذلك اللي عايزك تدرب نفسك عليه هنا هو إنك تنفذ أكتر ما تفكر. قلت لنفسك إنك هتتمرن؟ يبقى لازم تتمرن. قلت لنفسك إنك هتخرج للمكان الفلاني؟ يبقى لازم تخرج. لازم تعود نفسك من النهارده إنك تلتزم بكلامك تجاه نفسك، لأنك كل ما التزمت بكلامك، كل ما لقيت إن معدل قوة شخصيتك ومعدل ثقتك بنفسك بيرتفع أكتر وأكتر، لأنك وقتها هتكون وصلت لمرحلة إن عقلك بقى بيثق فيك.
دلوقتي هننقل على الجزء الثاني من الفيديو، وهو إزاي بعد ما دربت نفسي على الثقة بالنفس أقدر أطبق الثقة بالنفس دي في تعاملي مع الناس.
وأول وأذكى حيلة لازم تاخد بالك منها كويس جداً هو إنك لما تكون مع شخص معين ويكون الشخص ده مهم بالنسبة لك وعايز تبان قدامه إن شخصيتك قوية ويحس إنك شخص جذاب جداً بالنسبة له، فكل اللي عليك هو إنك أثناء وجودك مع الشخص ده تفترض بينك وبين نفسك إن الشخص ده بيحبك جداً جداً. حاول إنك تردد جوه عقلك جملة: "أنا متأكد إنه بيحبني جداً، أنا متأكد إن فلان ده عنده رغبة كبيرة جداً إن أنا أكون معاه". انطق اسمه وكرر الجمل دي كتير جوه عقلك، لكن ما تقولهاش بلسانك.
اللي هيحصل هنا إنه من غير ما تحس أنت بتدرب عقلك اللاواعي على إنك تظهر بمظهر الواثق من نفسك قدام الشخص ده، وهتلاقي نفسك فعلاً من غير ما تحس بدأ عقلك يصدق الجمل اللي بتكررها دي. وتلقائياً هتلاقي ده بدأ يظهر على شخصيتك، وهتلاقي هنا قوتك بدأت تظهر. ليه؟ لأنك هتتخلص وقتها من خوفك تجاه الشخص ده، وهتلاقي نفسك بتتعامل معاه على إنه شخص مضمون وآمن تماماً. ودي من أهم الحيل اللي ممكن تجذب لك أي شخص أنت بتتعامل معاه وتقدر تجربها من النهارده.
وأضيف على الحيلة دي حيلة مهمة جداً كمان لازم تاخد بالك منها لو كنت عايز تمتلك الكاريزما والشخصية الجذابة وأنت بتتعامل مع الناس، وهي إنك تعود نفسك على قد ما تقدر إنك تسيب مشاعرك على جنب بمجرد ما تتكلم مع أي شخص أو تقابل أي شخص. إياك إنك تكلمه عن مشاعرك، إياك إنك تشتكي أو تعبر له عن سعادتك أو فرحك أياً كان. بلاش تبين في البداية الجانب العاطفي ده من شخصيتك، خليه غامض.
لكن السؤال هنا: إيه اللي لازم تعمله بدل كده؟ اللي لازم تعمله هنا هو إنك تسمع لمشاعر الشخص اللي قدامك. تعرف إزاي فكر، اعرف هو بيحس بإيه، إيه اللي بيحصل له بالظبط. وده كمان تقدر إن أنت تعمله من خلال حركة بسيطة جداً في لغة الجسد تقدر تستخدمها مع الشخص اللي قدامك وأنت بتتكلم معاه. والحركة دي رغم إن هي بسيطة، لكن تأثيرها بيكون فعال جداً في إنها تخلي الشخص اللي قدامك ياخد عنك انطباع إن أنت بتمتلك شخصية قوية، مستمع جيد، الناس بتفهمك بسرعة أثناء كلامهم معاك، وهي إنك تحرك رأسك أثناء كلامك مع الشخص اللي قدامك ده. وده تلقائياً بيخلي الشخص اللي قدامك يحس إنك بتسمع له كويس، بتفهمه كويس، مركز جداً معاه وحابب الحديث اللي بيدور بينك وبينه.
أما تاني حيلة تقدر تستخدمها في تعاملك مع اللي حواليك، وما تتخيلش الحيلة دي قد إيه تأثيرها على الشخص اللي قدامك في إنها تجذبه ليك وتعلقه جداً بالكلام معاك، وهي إنك تستخدم ماضيك أنت على إنه قصة محفزة للشخص اللي قدامك وأنت بتتكلم معاه.
عايزك لما تكون بتتكلم مع الشخص اللي قدامك ده وتحكي له على موقف مريت بيه، معلومة عدت عليك، أو أي حاجة عملتها في حياتك في الماضي، فعايزك تستعمل ده على إنه قصة محفزة. يعني مثلاً، بدل ما أقول لك: "على فكرة أنا بقى بيتابعني ملايين على السوشيال ميديا"، المفروض إن أنا أقول لك بدل كده: "أنا بقى بيتابعني ملايين الناس، بس بصراحة ده ما جاش بالصدفة. ده جه بعد تعب ودراسة وتفكير، وده خلاني أفهم إن ما فيش نجاح أبداً بيجي بالصدفة". يعني القصة اللي أنت هتحكيها لازم تقولها بشكل محفز للشخص اللي قدامك. وده هيخلي أي شخص أنت بتتكلم معاه عن نفسك أو حياتك هتلاقيه بقى مستمتع جداً بالكلام معاك، وهتلاقيه بقى عنده رغبة أكتر إنه يعرفك أكتر. ليه؟ لأنك بتدي له مشاعر إيجابية كل ما اتكلمت معاه.
أما آخر حيلة، ودي للناس اللي بتتكلم كتير على التاتشات، حاول دايماً إن أنت تكون بطيء في كلامك. كل ما كنت سريع في كلامك على التشات، كل ما كنت ممل. بالتالي، كل ما كنت بطيء، كل ما كنت مستفز. وكل ما طال انتظار الشخص اللي أنت بتكلمه، كل ما حس بالفضول أكتر وأكتر تجاهك. ولازم تعرف إن البطء في العلاقات مهم جداً، لأن هو ده اللي بيبين ثقتك ورزانتك ونضجك.