Transcription
السلام عليكم. عايز أتكلم النهارده في كونسبت وفكرة والله العظيم يعني بص هو أنا يا إما اخترعتها يا إما قريتها في حتة وناسي مش فاكرة أنا قريتها فين الصراحة. الفكرة دي بتقول: كل ما تقرص على نفسك أكتر، كل ما الدنيا تقرص عليك أقل.
يعني إيه بقى الكلام ده؟ أخد رشفة من النسكافيه. اممم. كل ما تقرص على نفسك، كل ما الدنيا تقرص عليك أقل. يعني إيه؟ يعني كل ما تقرص على نفسك في التمرين مثلاً، تعال نتكلم عن الصحة، عن التمرين، عن الفتنس. كل ما نقرص على نفسنا أكتر، كل ما نتعب في التمرين أكتر، كل ما نبقى مجهدين أكتر جسمانياً، كل ما الدنيا تقرص عليها أقل. نسبة إننا يجيلنا مثلاً مثلاً جلطة في القلب، بعد الشر، جلطة في المخ، تصلب شرايين، شيخوخة، ديمنشيا وزهايمر، الحاجات دي بتقل.
فتخيل، إحنا اهو تعبنا وقرصنا على نفسنا في التمرين، وفي الأكل، وكنا ناس صحية، وبنتعب، وبنبقى هيلثي، وبنبقى تعبانين بس بنتمرن. إحنا قرصنا على نفسنا اهو. الدنيا هتبقى أريح معانا بقى، هترخي. هتبقى شخص إن شاء الله، مع إنك كبير في السن قوي، صحي، ضهرك مش بيوجعك، ركبك مش بتوجعك، ما فيش روماتويد مثلاً، ما عندكش سكر وضغط مثلاً، مش لازم تاخد حقن، مش بتخش مستشفى.
فجدي الله يرحمه كان أغلى شخص ليا في الدنيا، في الحياة كلها. الله يرحمه، هو ما كانش قارص على نفسه في الصحة بصراحة يعني. كان بياكل اللي هو عايزه، أكل بقى مثلاً دهن بالذات، الحلويات. هو مثلاً ما كانش بيعك قوي في الأكل العادي، ولكن الحلويات يا نهار أسود. البسكوت بقى، وكان دايماً يسقي بسكوت في الشاي بلبن. رايق رايق، شخص رايق ومربى. عارف اللي هو الفطار الإنجليزي بقى والإنتركونتيننتال والحاجات دي، زبدة. بس مينلي كانت الحلويات والكوليسترول وكان عالي جداً ومش عارف إيه. كان رياضي وهو شاب، يعني كان رياضي وهو صغير، ولكن لما كبر أكله ما كانش محافظ عليه بصراحة. الله يرحمه جاله زهايمر.
ولكن السبب الزهايمر مش كده. يعني إيه اللي أنا بقوله؟ الزهايمر ممكن يبقى ديمنشيا، اللي هو لما الواحد يبتدي يفقد الفانكشنز بتاعة عقله وينسى كتير. وده ممكن يبقى مالوش سبب معين، ساعتها بنسميه زهايمر، اللي هو مالهاش سبب معين. أو بسبب جلطات صغيرة في المخ، ساعتها الديمنشيا هو اسم وحش، بس الخرف ليه سبب. فما بنقولش عليه زهايمر وخلاص. زهايمر لما الخرف ما يبقاش ليه سبب. طب ليه سبب بنسميه باسمه بقى؟ بنسميه الخرف بسبب الجلطات اللي في المخ. هو ده اللي كان عنده حاجة اسمها فاسكار ديمنشيا. شرايين المخ جالها تصلب من كتر الكوليسترول وجلطات صغيرة في المخ قطعت الأكسجين على المخ. بس مش مرة واحدة زي الناس اللي بتجيلها جلطة مخ وتقع مرة واحدة، على مدار سنين. فجاله نفس فكرة الزهايمر بالظبط بقى. بينسى كتير قوي، ما بقاش بيعرف يتكلم كويس. كان موضوع مؤلم جداً لأنه كان عايش معانا. أنا شفت الدنيا قرصت عليه قد إيه. طبعاً ده ممكن يكون طبعاً طبعاً ابتلاء وتكفير ذنوب، و طبعاً أنا مش معترض على حاجة زي كده. بس أنا بكلمك في فكرة إنه لو كان قرص على نفسه في الأكل وفي التمرين وفي الرياضة مثلاً لغاية سن كبير، ما كانش الدنيا قرصت عليه كده. كان ممكن يبقى يعني كان ممكن الدنيا تبقى أحلى بكتير من كده.
نفس فكرة إن الواحد لو قرص على نفسه في إنه يعمل حاجة أوت أوف ذا بوكس. قرص على نفسه في إنه أنا متلجلج في الكلام ومش بتكلم باريحية، لإن أنا حاسس إن أنا ممكن مثلاً بابايا يتفرج على الفيديو ده، وبالتالي مش عايز أبقى بتكلم عن قصة جدي بتفاصيل زايدة قوي توجع. بس الموضوع كان بيوجع، فاهم قصدي؟ الموضوع كان بيوجع لأنه أقرب الناس ليك وأعز شخص عندك وكان عايش معاك وشايفه وهو بيتدهور كده في صحته، وبيتدهور كده، وما بدأش، ما بقاش عارف يتكلم، ما بقاش عارف، ما بقاش عارفك أصلاً. مؤلمة، مؤلمة. قارصة، فاهم؟ قارصة جامدة. لو كان قرص على نفسه ما كانتش الدنيا قرصت قوي كده عليه.
نفس كان في الفلوس في الشغل. أنا حاسس لو الواحد قرص على نفسه وعمل حاجة صعبة بالنسبة له. الواحد مثلاً إيه؟ لا أنا بخاف وبتلجلج أطلع أتكلم قدام الكاميرا مثلاً. طول عمري كده، ولكن قلت لا أنا عايز أقرص على نفسي. عايز أتعلم السكيل دي، سكيل حلوة، عايز أنسباير الناس، عايز يبقى عندي سكيل الستوري تيلينج، أعرف أقول قصة مثلاً الشخص اللي قدامي يستوعبها ويحب القصة ويحب يسمع معاها. ممكن حد تاني ما كنتش ممكن أنا ما كنتش عملت كده. ممكن أفضل طول عمري عبد الوظيفة، فاهم؟ علشان ما قرصتش على نفسي إن أنا أحاول أتعلم سكيل وأحاول أعمل بيزنس معين مثلاً.
كل ما أقرص على نفسي أكتر، كل ما الدنيا تبقى حنينة أكتر. كل ما أنا أبقى حنين على نفسي أكتر. يا عم تمرين إيه وبتاع إيه؟ والتمرين متعب. يا عم ما آكل اللي أنا عايزه. حد واخد منها حاجة؟ حد واخد منها حاجة؟ عارف كلمة الكلام اللي هو المحبط ده؟ حد واخد منها حاجة؟ آه، عادي ممكن آخد منها حاجة عادي وأتبسط عادي وأعيش حاجة كويسة، وفي نفس الوقت أبقى ديسبلين وقارص على نفسي عشان الدنيا ما تقرصش هي عليا. يعني دايماً بتتقال فكرة إيه؟ يا إما تبطل سجاير بمزاجك وأنت واقف على رجليك، يا إما تبطلها في العناية في المستشفى في العناية المركزة. أنت كده كده هتبطلها. تبطلها وتقرص أنت على نفسك ولا الدنيا اللي تقرص عليك؟ فاهم فكرة الكونسبت ده؟
لما بدأت أحاول أدخله في كل أسبكت في حياتي، ارتحت. بقيت مبسوط. بقيت مبسوط لما بتعب نفسي في حاجة معينة. ليه؟ أصل الإنسان والعصر إن الإنسان لفي خسر، أو خلقنا الإنسان في كبد. يعني الإنسان عايش حاجة صعبة. الصعوبة دي بقى ممكن أنت تحطها على نفسك بمزاجك، أو تتحط عليك. كده كده في صعوبة. بلانس الصعوبة اهو. كل ما تحط أنت صعوبة على نفسك أكتر، الصعوبة اللي عليك من الدنيا تقل. أنا أحب أختار الصعوبة اللي أنا أختارها لنفسي. أختار صعوبة التمرين، ما أختارش صعوبة الجلطة. أختار صعوبة تبطيل السجاير، ما أختارش صعوبة الالتهاب الرئوي والبلغم اللي مش قادر أتنفس منه، والأكسجين القليل، وجلطات المخ والقلب، وجلطات الرجل، وجلطات العين. أختار صعوبة الدايت والرياضة، ما أختارش صعوبة السكر والضغط والحقن والرجل القدم السكري اللي بيتقطع، والعين اللي بتروح، والكلى اللي بتبوظ. لا أحب أختار أنا صعوبتي بنفسي. ما يترميش عليا صعوبة تانية مالهاش لازمة.
ميتين أم السكر يعني. السكر ما بيتعالجش بدوا. سكر ما فيش دوا سكر بيعالج السكر. إيه؟ إيه؟ علاج؟ علاج؟ حد هياخد دوا السكر لغاية ما يتعالج من السكر ده؟ العلاج؟ ما فيش حد بيتعالج من السكر بدوا سكر. هو بيفضل ياخد الدوا مدى الحياة. يبقى الدوا مش بيعالج، الدوا بيلصم. صح؟ عمرك سمعت؟ أه والله. أنا كان عندي الضغط بس بدأت آخد الدوا الحمد لله لغاية ما خفيت. عمرك سمعت الكلمة دي؟ سيبك، أنت ممكن ما تكونش في طب أصلاً، بس عمرك سمعت الكلمة دي؟ عمرك سمعت دوا الضغط بيتاخد فور إيفر؟ يبقى هل الدوا بيعالج؟ تسمع مثلاً إن أنا كان عندي خراج في درسي، قعدت آخد الدوا لغاية ما خفيت؟ أه دي بتسمعها. بس هل أنا كان عندي سكر، قعدت آخد الدوا لغاية ما خفيت؟ عمرك ما سمعتها.
بس في ناس عندها السكر، دايت سليم وتمارين سليمة وديسبلين والتزام، بطلوا الدوا، خفوا. زمان كانوا بيقولوا إن ده مستحيل. لا، خفوا. الناس خفت. الناس خفت بجد. شقرا. هتلاقي إن في ناس بدأت تقدر تريفيرس السكر، تقدر تريفيرس الضغط. إيه؟ خفوا؟ يعني بطلوا ياخدوا دوا وضغطهم مظبوط؟ بطلوا ياخدوا دوا السكر وسكرهم مظبوط عادي من غير الدواء؟ فاهم؟ هل عايزة صعوبة وعايزة قرص؟ أه، بس ما هو لازم القرص يجي من حتة. أنا ما ينفعش أبقى آكل اللي أنا عايزه ومريح وما بتمرنش ومرخي. يعني أنا اهو ما فيش قرص من ناحيتي، والدنيا كمان ما تقرصش؟ لا، الدنيا هتقرص جامد قوي بقى.
كل ما تقرص على نفسك أكتر، كل ما الدنيا تقرص عليك أقل. في الفلوس، في الجسم، في الصحة. أقسم بالله في كل حاجة. دي رسالة سريعة، لأن والله العظيم الكونسبت ده أنا بحاول أعيش بيه الفترة اللي فاتت. والله العظيم بحاول أعيش بيه. فربنا يكرم يعني. إلى لقاء آخر بإذن الله.