خسائر أمريكا الضخمة اليوم واشتعال حاملة طائرات فورد | المرشد الجديد يتحدى ترامب هادمر المنطقة

شوف معايا المشهد ده. دي طياره عملاقه أمريكية. فجأة انفجرت ووقعت. وكمان حملة الطيارات فورد حصل فيها ولعة. ما حدش عارف إيه اللي بيحصل. هي دي بركات المرشد الجديد ولا إيه؟ أمريكا امبارح حصل عندها كارثة بمعنى الكلمة. حد هيقول لي بس هم بيقولوا إن ده مش ضربات. بيقولوا إن ده حاجات كلها خارج نطاق الحرب. هقول لك أنا السر فين. وهقول لك كمان ليه هي كارثة. في كلام مهم جدا هنتكلم فيه النهارده عن الموضوع ده بالذات.

لكن كمان عندنا النهارده خمني الصغير اللي هو المرشد الجديد ابن خمانقي ظهر. أي نعم اتكلم بس وطلع يتكلم وقال كلام خطير جدا. من الآخر كده بيقول لك إيه: أنا أصعب من أبويا بمراحل وأنا هولعها. واللي عايز يجرب يقرب من الآخر كده. وطلع نتنياهو رد عليه وهدده إن هو هيموته. الكلام النهارده ده بيقول إيه؟ هي الحرب مطولة ولا هتخلص؟ لأن عندنا حد مختلف بيقول لك أنا مكمل وعايز تعويضات. ده أمريكا لازم تدفع لي تعويضات. طبعًا الكلام ده مستحيل يحصل. بس إيه اللي هو عايزه بجد؟ وهل هو عصب موجود وعايش؟ وليه ما بيظهرش؟ هو مصاب ولا خايف إن يتم رصده؟ الموضوع ده كله لازم نفهمه.

لكن كمان في تطور كبير جدًا حصل في الحرب. ضربة للكويت من العراق. وأنا قلت لك من أول الحرب احذر المشاكل اللي بتيجي ما بين العراق والكويت في نفس الوقت. عشان بس أقول لك الحقيقة كاملة. إيران بتاخد ضربات شديدة جدًا. عملية اغتيال لشخصية مهمة جدًا حصلت معايا هنا. هنقول الحقيقة بس من غير تجميل. في البداية بطلب منك تعمل إعجاب وتشير الفيديو. لو حضرتك لسه جديد اشترك. ويلا نبدأ على طول.

خلينا نبدأ بالطيارة العملاقة الأمريكية اللي سقطت. هي طيارة تزويد بالوقود. إيه أهميتها عندك؟ الطيارة الأف 15 فيها تانك كبير. والقاذفة بي 52 برضه فيها تانك كبير. بس برضه بيخلص لما يكون في مسافات طويلة. لازم تنزل في المطار وتطلع. ودي شغلانة في الحرب. فأمريكا اخترعت طيارة تقدر تزود الطيارة وهم في الجو. يعني بنزين في الجو تديك بنزين وأنت طاير. مش محتاج بقى تنزل وتطلع والكلام ده. الطيارة دي واحدة منهم سقطت امبارح. المشكلة يا جماعة إن الطيارات دي قديمة جدًا. الطيارات دي من 67. وطيارات أمريكا بتفتخر بيها جدًا. بس خلي بالك الطيارات دي برضه هي مركز اتصال ضخم في الجو. طيارة مهمة جدًا. وأمريكا على فكرة عندها عدد قليل منها. ما عندهاش عدد كبير. آه عملت طيارات أحدث منها ودي بطلت إنتاجها. بس في النهاية هي رمز للجيش الأمريكي.

طب إيه اللي حصل؟ في جماعات عراقية بتقول لك إحنا اللي أسقطنا الطيارة دي بالدفاع الجوي. هي سقطت في العراق. لكن أمريكا عندها رواية تانية مختلفة. إن في طيارتين من النوع ده طلعت عشان تمول طيارات. حصل مشكلة وواحدة وقعت. والتانية رجعت بالعافية. يعني عايز يقولوا كده مشكلة فنية. طيب هنصدق مين فيهم؟ العراق اللي وقعتهم؟ ولا الطيارة دي خلل فني حصل مشكلة مثلا في الجو هناك؟ طيارة قديمة؟ نصدق مين فيهم؟ مش لازم تصدق حد فيهم. لأن النتيجة واحدة في النهاية. أمريكا خسرت طيارة مهمة وطيارة غالية. بتتحط في بند الخسائر. لما بتيجي في الآخر بتقول لك خسائرك إيه؟ أنا وقع لي خمس طيارات أف 15. وقع لي طيارة تزويد بالوقود. مات لي 20 واحد. الطيارة طبعًا كان فيها ناس وممكن يكونوا ماتوا كلهم. لسه الخبر ما طلعش. فإذا في النهاية ترامب أمام شعبه خسر امبارح. خسر وخسارة مش قليلة. الطيارة هي كي سي 135. ودي طيارة مهمة جدًا. من غيرها القاذفات الأمريكية تكون مالهاش لازمة. دي طيارة أمريكا غيرت بيها اتجاهات العالم. عملت حروب عن بعد على مسافات طويلة. طيارة مهمة جدًا. فدي حاجة رمزية ومشكله بتحصل في توقيت خطير جدًا.

البترول بيطلع. ما حدش عارف الحرب تخلص إمتى. كلام متضارب شوية. يقول لك هخلص بعد أسبوع. وشوية ترامب يطلع يقول لك ده أنا هقعد أكمل لغاية لما أخلص وانتصار ساحق. كلام متناقض دايما. ونسمع نتنياهو يقول لك أنا عندي مفاجات من العيار الثقيل. استنوا هتشوفوا مفاجات. وفي شغل هعمله بعد الحرب. وأنا اديت الفرصة للشعب الإيراني إن هو بعد الحرب يخلص كل حاجة. ده كله بيقول بيقول لك إيه؟ إن إحنا لسه قاعدين مع بعض. كمان الاحتياطي بتاع البترول اللي بيطلع من كل دول العالم بأرقام كبيرة جدًا. ده بيقول لك إن إحنا ممكن نقعد شهر تاني في الحرب دي.

المشكلة التانية بقى إن قنوات زي سي بي إس وسي إن إن بتقول لك إن في كلام طالع إن الحرس الثوري ضرب حاملة الطائرات إبراهام. معقولة؟ قال لك آه. وحصل فيها حريقة واتبهدلت وكمان طلعت من الخدمة. ده كلام الحرس الثوري. ودائمًا في روايتين. رواية طالعة من إيران ورواية طالعة من أمريكا. الرواية الأمريكية بتقول لك لا ده حريق عادي وتم إخماده داخل الحاملة. مالوش علاقة خالص بعمليات حصلت ضد الحاملة. والحاملة لسه شغالة وزي الفل وما خرجتش من الخدمة ولا الكلام ده. خلاص أو بعدت عن مركز العمليات. دي مشكلة الحروب. ما تقدرش تعرف فين ومين اللي صح. وأنا عادة بكون محايد. مش هقول لك الخبر من وجهة نظر. بس اللي عايز يكسب كل الناس بتقول لك من وجهة نظر. الأيران لا.

لكن سيبك من حاملة الطائرات. لأن حاملة الطائرات عملاقة كده وصعب جدًا يحصل فيها ضربة كبيرة. خليك مع الطيارة اللي وقعت. الطيارة اللي وقعت دي خسارة كبيرة جدًا لأمريكا. المهم بقى خامنه الصغير ظهر. في جملة منتشرة جدًا يقول لك إيه: أمريكا بدلت طالبان أن بطالبان. وده حصل في أفغانستان. شالوا طالبان وبعد كده جابوا طالبان تاني. وبدلت خامنائي بخامنائي. شالوا خامنائي وجابوا خامنائي تاني. خامنائي الصغير. بس جابوا بقى إيه حاجة كده إكسترا. حاجة كده كلامها معدي كل الأفكار اللي شفناها قبل كده. مجرد بيتحدى ترامب إلى أبعد الحدود. قال له مضيق هرمز ده مش هيفتح. وده يعني بستخدمه ضغط عليك. وقال له كمان انسى ده أنا لسه بحضر لك مفاجات. هيتفتح عليك أبواب جهنم من جهات أنت ما تعرفهاش. وفي مناطق مش هتعرف ترد عليها.

امبارح كنت كلمتك إن في كلام خطير جدًا من المباحث الفيدرالية الأمريكية إن ممكن يحصل ضربات داخل أمريكا. وهو هنا بيتكلم عن أذرع ما حدش يعرف عنها حاجة. هل إيران ليها أذرع تانية في العالم؟ آه. إيران ليها ذئاب منفردة الآلاف في العالم وفي كل دول العالم. وهم بيعتمدوا على العقيدة في التحرك. والراجل ده بقى إيه عنده العقيدة عالية جدًا وشايف إن إحنا في آخر الزمان وإن الدنيا قربت تخلص. فاتجاهه ما تخرب. إيه المشكلة؟ إحنا في آخر الزمان.

لكن أقوى حاجة قالها بقى إيه؟ قال لك إحنا عايزين تعويضات. أنتوا خربتوا لنا البلد كلها. يا جماعة اللي بيحصل في إيران غير طبيعي. أبسط حاجة أقولها لك المطار المدني. كل الطيارات المدنية إيه اتحرقت. البلد دي هتشتغل إزاي بعد كده؟ قال لك إحنا عايزين تعويضات. ولو أنتوا بقى ما دفعتوش التعويضات هنشوف الأصول بتاعتكم فين ونولع فيها بالمقدار اللي حصل عندنا ده. واحد بيتحدى واحد بيتكلم بأسلوب شمشون. خربت عندي فيلا نخربها كلها. وده كلام خطير جدًا على الخليج. لأن هو جاب سيرة الخليج. بس قال لك لا ده أنا هكمل ضرب. وأي حاجة أمريكية في أي مكان هضربها. الأخطر بقى إن هو كمان اتكلم عن ضرب بنوك شركات أمريكية. وهنا الحرب بتخرج لحته تانية خالص. بنية تحتية. وخلي بالك أمريكا مش هتسكت. ممكن تضرب الكهرباء في إيران. تضرب مناطق مدنية. تضرب كل حاجة مدنية. واللي هيشرب في الآخر للأسف والواجهة أصعب حاجة هو الخليج.

أنا لسه سامع عالم ثقيل. في ناس بيقول كلام خطير جدًا على الخليج. بيقول لك إن مثلا فكرة إن أنت تضرب ناقلة بترول. السم اللي بيطلع منه الدخان ده يبوظ حتى الميه مش الهوا. وإن الخليج ممكن يحصل تسمم في الميه. وهو بيعتمد أساسًا على مياه تحلية. بيقول لك المحطات دي كلها ممكن تتسمم. فالكلام ده خطير جدًا. إيران لما بتضرب ناقلة بترول بتخرب الدنيا في البيئة هناك. وخلي بالك قطر كانت حذرت من الموضوع ده. قالت إن الحرب مع إيران ممكن تسمم الميه داخل الخليج والدنيا كلها تخرب في الخليج.

في الآخر بقى مكتب اتكلم كزعيم للمنطقة. وقال لدول الخليج اقفلوا القواعد دي في أسرع وقت ممكن. من الآخر كده خربت لكم الدنيا. لازم تفكروا تقفلوها. بيتكلم بأسلوب الأمر كمان. يعني خلي بالك أنا بهدلت لك الدنيا على خفيف. لو كنت عايز أتقل إيدي كنت تقلّت. وكلنا عارفين الخليج مش عايز يضرب. لأنه عنده أصول بمئات المليارات خايف عليها. وحقه يخاف ليها.

بص يا جماعة خليني أفهمك إيه مشكلة الحرب دي بالنسبة لأمريكا والخليج وإسرائيل. وليه إيران مشكلة. هقول لك إيران ما عادش عندها غالي. يعني اضرب زي ما أنت عايز. هتهد البلد باللي فيها بناسها. مش فارق. أنا هكمل يعني هكمل. ودي أصعب بلد ممكن تحاربها. عارف مصر الرئيس المصري والجيش المصري هيستخدم السياسة ليه؟ لأنه خايف على البلد. مش عايز يهد البلد. مش مصر بس. مصر ودول الخليج وأي دولة خايفة على مستقبلها. لأنك أنت بتخلي إيران كده من غير مستقبل. دي حقيقة. لكن أنا خلاص دخلت المعركة دي بطريقة شمشون ومكمل للأخر. وزي ترامب نجح إن هو ينزل أسعار البترول بعد ما وصلت لـ 110 ونزلها لـ 90 كمان. خام الصغير قدر يرفع أسعار البترول ورفعها الـ 100. ما إحنا عندنا حرب دلوقتي. حرب بترول. ترامب بيحاول ينزلها بالتصريحات. وإيران بتحاول ترفعها بالتحرك والتصريحات. لأن إيران شايفة بتلوي دراع أمريكا بحاجتين. بالخليج مش بإسرائيل على فكرة. والحاجة التانية الأخطر البترول ومضيق هرمز.

بس بقى المفاجأة القاصية جدًا لترامب هي التقارير بتاعة المخابرات بتاعة أمريكا. وكمان تقارير من داخل إسرائيل بتقول إيه؟ يعني سيبك من إن إيران انضربت ضربات قاسية جدًا وإن هي قدراتها انخفضت. لكن فكرة إسقاط النظام بضربات جوية انسى الكلام ده. وإن النظام متماسك ومكمل ومش هيسقط دلوقتي. ممكن يسقط قدام نتيجة الضغوط الاقتصادية الغير عادية. لكن الحرب دي كنتيجة مباشرة هي ممكن تكون مؤثرة. لكن نتيجة مباشرة توقع النظام ده مش هيحصل. ودي غلطة ترامب الكبرى. إن طلع قال لك أنا هوقع النظام. ما قالش أنا هضعف النظام. ما قالش أنا هضرب الأسلحة أو إن أنا مثلاً همنع إيران. قال لك أنا رايح أوقع النظام. ودي الغلطة اللي وقع فيها ترامب ونتنياهو.

نتنياهو نفسه طلع النهارده وقال لك إيه؟ قال لك إحنا بنساعد على سقوط النظام. لكن أنا ما أقدرش أوقع النظام ده في إيد الشعب الإيراني. مش في إيدي أنا. لكن الكلام الأخطر بقى طلع من ذا أتلانتك. المجلة الشهيرة جدًا الأمريكية قالت لك إيه؟ ترامب جه يوقع النظام دمر البلد. دمر إيران وخلى الشعب الإيراني هيعيش حياة سودا في الأيام اللي جايه. في نفس الوقت شد إيد النظام. أول نظام ده مش كده وبس. ده جاب نظام شبيه بنظام كوريا الشمالية. اللي هو أنا متشدد وأعاد العالم كله. مش أنت بس يا أمريكا. عاد الخليج والشرق الأوسط وأوروبا وأي حد هيقرب مني هضربه. هياخد صاروخ في وشه. ده النظام الجديد. النظام القديم ما كانش كده. كان عنده سياسة وقال لك إن النظام ده هيبقى ماشي بالقوة. استخدام القوة فقط لا غير. طب أنت هديت البلد؟ آه هديت البلد. بس النظام وقع؟ لا مكمل. مكمل.

بس تعالى بقى نسمع كلام واحد مهم جدًا. ديفيد باتريوس. اللي هو كان رئيس المنطقة المركزية الأمريكية. هو القائد بتاعه الحروب في منطقة الشرق الأوسط. اللي كان يعني بيقول لك بالأرقام كده ليه النظام ده صعب يقع. قال لك يا عم بص الأول كده حاجة بسيطة كده شوية أرقام. الحرس الثوري ده اللي هو أقوى حاجة المفروض تكون موجودة في إيران. عددهم كام؟ 150 ألف. وده حرس عقائدي. يعني ممكن ينتحروا كلهم عشان يحموا العقيدة أو يحموا إيران. 150 ألف. مش كده وبس. قال لك في إيران في ميليشيا قوية جدًا. ميليشيا الباسيج. دول بقى مش عسكريين. مش بتوع حروب. بس هم دول المسؤولين عن النظام الداخلي. بيقفوا قدام المظاهرات ويصطادوا الناس. ودول عددهم 200 ألف. وبرضه نظام عقائدي. الناس دي برضه تابعة للثورة. بيحموا الثورة. فما عندوش مشكلة إن هو يقتل ويخش ويدبح. ما دام في خطر على الثورة. القوة التالتة بقى هو الجيش النظامي. زي أي جيش في العالم. اللي هي بقى فيها بقى أسلحة وكلام من ده. وعدده 400 ألف. برضه عدد ضخم. القوة الرابعة الشرطة الوطنية. وعددها 250 ألف. عدد جيش. وبصوا واخدين بالكم عندك جيش. حرس ثوري. كل حاجة عندهم حاجة موازية تابعة للثورة عشان تحافظ على الثورة مش الدولة. بيقول لك لما نعد الأرقام دي كلها حوالي مليون. مليون شخص شغالين في جهات أمنية. فبيقول لك إن النظام الإيراني بيتسند على الجهات الأمنية دي. وفكرة إنك أنت توقع النظام ده من الهوا مستحيل. لازم جيوش على الأرض وجيوش كبيرة جدًا وقوية جدًا.

أعتقد النقط كده مفهومة. بس أنا عايز آخدك من الحتة دي لحتة خطيرة جدًا. وأنا قلقان جدًا على دول الخليج وبالأخص دولة الكويت. تم إعلان من جماعة اسمها سرايا أولياء الدم إن هم عملوا عملية ضرب داخل الكويت. طب الجماعة دي فين؟ الجماعة دي موجودة داخل دولة العراق. وكلنا عارفين الحساسية ما بين العراق والكويت. طب أعلنت عن إيه؟ إن هي ضربت أهداف أمريكية بسرب طيارات مسيرة. طب ما هيقول لك ما هم ضربوا برضه أهداف أمريكية والمفروض الكويت تسكت والخليج يسكت. أنا هسألك سؤال كمصري. تخيل تم ضرب فندق في مصر. ويقول لك أصل كان فيه أمريكاني قاعد فيه. أو ضرب عمارة في مصر أصل أنتوا كان عندكم أمريكاني قاعد هناك. أو ضرب السفارة الأمريكية في مصر. ده شيء غير مقبول. ما فيش دولة في العالم تضرب بأي حجة. حتى لو عندك أمريكاني ما هو داخل عندك بعهد. ما ينفعش يتضرب وهو عندك. فإذا فكرة أصل أنا بضرب. طب الأمريكان أو بضرب الكلام ده. فإنا ما بضربش السعودية والكويت. الكلام ده مالوش أي معنى. هو بيضرب دول الخليج 100%. وهو همه ياخد دول الخليج أسرى عشان يوقف الضرب التقيل الخطير اللي ممكن يضرب البنية التحتية في إيران. ده الحقيقة. مش قصة بس إن هو عايز يضرب الأمريكان والكلام ده. زي ما البعض بيقولوا. كل الكلام رايح في اتجاه واحد. مش عايزين يقولوا الحقائق. وده مهم جدًا. عايزك دايما تسمع للحقائق.

وبمناسبة الخليج والكويت والخطر اللي على الخليج. كلنا عارفين ترامب طلع وقال لك إيه؟ أنا ممكن أخلي إيران دي كلها ضلمة في ساعة زمن. رد عليه عليرجاني قال لك آه أنت تقدر تعمل كده. بس إحنا هنخلي المنطقة كلها ضلمة. ونقعد بقى نصطاد كده في الأمريكان الهاربين هناك في الضلمة. نطلع لهم ونصطادهم واحد واحد. هي دي القصة. إنك أنت تقدر تعمل عندي هردها لك في الخليج. هضلمها لك في الخليج. وهضرب لك البترول في الخليج. عشان كده ضرب البنية التحتية في إيران صعب. إسرائيل عايزة تعمل كده. وأمريكا ماسكاها.

بصوا يا جماعة عشان بس تبقوا فاهمين الحقيقة كاملة. ما تاخدش طرف بس وتفهم إن الأيران الحقيقة فيها وردي. كل يوم إسرائيل بتصطاد قادة مهمين جدًا داخل إيران. وعلى فكرة بتصطاد كمان علماء وعلماء مهمين جدًا في الظل. آخر حاجة قائد هام جدًا قائد طيران داخل الحرس الثوري. واصطادته داخل منزله. بس المشكلة إن هي ما ضربتوش بطيارة مسيرة ولا صاروخ. لا دي ضربته بمسلحين على الأرض. دخلوا على بيته هاجموا عليه صفوه ومشوا. وأنا قلت لك إن نتنياهو قال لك إحنا عندنا مفاجات. اتخيلوها. هل من ضمن المفاجات إن هيحصل عمليات بناس تابعة لإسرائيل على الأرض في إيران؟ ودي نقطة ضعف كبيرة جدًا لإيران. خلي بالك الراجل ده من جوه جوه برنامج الصواريخ الإيراني. مسؤول ثقيل وخبرة كبيرة جدًا. مات في العملية. خامسة. فمش ضربة عادية. ده راحوا ضربوا حرس. وأنت بتتكلم عن قائد فمعاه حرس. عملية منظمة جدًا. المشكلة إن ده حصل في مدينة أراك اللي هي فيها مفاعل نووي وشغل صواريخ تقيلة. فانت بتتكلم إن إسرائيل بتعرف تختار تقتل مين؟ هي بتحاول تعمل عملية إضعاف عشان إيران عشان تقدر ترجع تاني تحتاج وقت طويل.

خلي بالك نتنياهو النهارده قال كلام خطير جدًا. قال إن إحنا بقى لنا 47 سنة بنعمل عمليات داخل إيران وبنحاول نعطلهم. يعني إيران كان بيتعمل فيها عمليات اغتيال وأكل ويتحركوا. يعني شغل المخابرات بقى له 47 سنة. بيقول لك بنحاول نعطلهم من بدري. معنى كده لولا إسرائيل كانت إيران زمانها دلوقتي معدية في موضوع الصواريخ والأسلحة. يعني ده اللي وصلوا له رغم تعطيل إسرائيل. ولما إسرائيل لقت إن لازم تدخل بقوة لأن إيران بعد فترة ما حدش يقدر يعمل لها حاجة اتدخلت.

طب هو إيه اللي هيحصل الفترة اللي جايه؟ البترول مشكلة كبيرة جدًا. ترامب عايز انتصار. مش هيخرج من غير انتصار. والنهارده قال لك أنا طلعت الاحتياطي والعالم طلع الاحتياطي. نقعد بقى شهر نقعد اكت. المهم انتصر انتصار كبير. أنا أعتقد إن بيتم تحضير لعملية كبيرة مشتركة ما بين إسرائيل وأمريكا. ودي المفاجات اللي بيتكلم عنها نتنياهو. العملية دي هتكون عملية على الأرض وهتكون عملية هوليودية. يعني تعمل دوشة كبيرة جدًا. وقبلها هتكون في ضربات ضخمة جدًا على إيران. واحتمال في الآخر يضربوا بنية تحتية غير عادية مع العملية دي. يطلع بعدها ترامب يقول لك أنا انتصرت وخلاص. هلم القوات وهمشي. ولو إيران كملت ضرب إحنا هنكمل ضرب وإسرائيل هتكمل ضرب. وطبعًا إيران هتضطر في النهاية توقف. لأن برضه هي تحت ضغط غير عادي. وخلي بالك ما فيش دولة في العالم بتضرب يجي لها فرصة توقف الحرب مش هتوقفها. حتى لو بيقولوا عكس كده. فانت أمام مشهد قريب جدًا. هتحاول أمريكا تعمل ضربات غير مظبوطة. فاكر لما قالوا إحنا لسه ما ضربناش بالقنابل التقيلة؟ هتعمل ده بصورة هيبقى المشهد مرعب للعالم كله. وبعديها هيحصل عملية هوليودية. يقول لك خدنا يورانيوم. جزء من اليورانيوم. بوظنا المفاعلات. أياً كان العملية. ويقول لك إحنا انتصرنا. ويطلع بقى ترامب في مؤتمر صحفي ومعاه بقى كل الفريق بتاعه وابتسامات ويبوسوا بعض وأحضان وهله به. قصة خلصت. هو ده اللي بيعمله.

عملوا نتنياهو وترامب. بس هم ليه بيطولوا الحرب؟ هم عايزين يضعفوا إيران على قد ما يقدروا. مش عايزين الحرب دي تتكرر بعد تلات أربع سنين. عايزين إيران تكون ضعيفة لمدة 20 سنة. لأن هم كمان ده طلع في خطط لإسرائيل. عندهم خطط لما بعد الحرب. إزاي يضغطوا على إيران أكتر من خلال ضغط اقتصادي. وإزاي يضغطوا على إيران أكتر بشغل جواسيس على الأرض في الداخل. تخريب طول وقت.

جماعة دي واحدة من أكبر العمليات في التاريخ. واحدة من أصعب الحروب في التاريخ. ما تستقلش بيها. وإيران مش دولة بسيطة ولا ضعيفة. إيران من أقوى دول العالم في الحرب. فانت بتشوف دولة بيتم تدميرها بالكامل وهي مصممة تكمل. حد هيشوف ده صح. وحد تاني هيشوف ده غلط جدًا. لأن السياسة فن الممكن. يعني إيه فن الممكن؟ كده يعني أنا بشوف هو أنا لو دخلت مع أمريكا راس براس هنتصر؟ هيقول لك آه ممكن تنتصر أمريكا في النهاية. برضه ممكن ترجع لورا. بس إيه النتيجة؟ خراب لدولتي. فده معناه إن أنا هخسر خسائر غير عادية. في حد تاني يقول لك العكس. مش مهم الخسارة. تتعوض هتتعوض. المهم إن أنا أصل لدرجة إن أنا أكون تحديت أمريكا ورجعت تها للخلف.

اكتب لي رأيك. مين الصح؟ اللي يحاول يحافظ على الدولة ويبقى خسائر قليلة؟ ولا اللي يوصل لأبعد حدود مهما حصلت خسائره؟ في النهاية يا جماعة بشكركم وأشوفكم على خير في لقاء قادم إن شاء الله. مع السلامة.